ລູກລະເບີດໄດ້ແຕກຂື້ນສອງຄັ້ງຢູ່ໃນກຸງ Damascus ເມືອງຫລວງ ຂອງຊີເຣຍ ຂະນະ
ທີ່ການລຸກຮືຂື້ນຕໍ່ຕ້ານປະທານາທິບໍດີ Bashar al-Assad ແລະການປາບປາມ ຢ່າງ
ໂຫດຮ້າຍທາລຸນຂອງລັດຖະບານ ພວມກ້າວເຂົ້າເປັນປີທີສອງແລ້ວ.
ໂທລະພາບຂອງລັດຖະບານຊີເຣຍ ລາຍງານກ່ຽວກັບເຫດການນີ້ວ່າ “ເປັນການໂຈມຕີ
ຂອງພວກກໍ່ການຮ້າຍ” ໃນຕອນເຊົ້າວັນເສົາມື້ນີ້ ທີ່ເຮັດໃຫ້ເຈົ້າໜ້າທີ່ຕໍາຫລວດ ແລະ
ພົນລະເຮືອນຈຳນວນນຶ່ງເສຍຊີວິດ.ໂທລະພາບຊີເຣຍແຈ້ງວ່າ ລາຍງານໃນຂັ້ນຕົ້ນແມ່ນ
ໃຫ້ຮ່ອງຮອຍວ່າເຫດລະເບີດທັງສອງເປັນລະເບີດລົດ ທີ່ແນ່ໃສ່ຕຶກຮັກສາຄວາມປອດ
ໄພຂອງຕໍາຫລວດ ແລະຕຶກຂອງພວກສືບລັບ.
ອົງການສະຫະປະຊາຊາດກ່າວວ່າ ຫຼາຍກວ່າ 8000 ຄົນແລ້ວໄດ້ເສຍຊີວິດນັບຕັ້ງແຕ່
ໄດ້ເລີ້ມມີການປະທ້ວງມາໄດ້ນຶ່ງປີໃນວັນພະຫັດຜ່ານມານີ້. ໂຄສົກຂອງເລຂາທິການ
ໃຫຍ່ສະຫະປະຊາຊາດ ໄດ້ຖິ້ມໂທດການ ກໍ່ຄວາມຮຸນແຮງ ໃສ່ການຕັດສິນໃຈຂອງລັດ
ຖະບານຊີເຣຍ ໃນການ“ເລືອກເອົາການກົດຂີ່ຢ່າງຄວາມຮຸນແຮງແທນການເຈລະຈາ
ທາງດ້ານການເມືອງແບບສັນຕິ.”
ໃນວັນສຸກວານນີ້ ອະດີດຫົວໜ້າສະຫະປະຊາຊາດທ່ານ Kofi Annan ໄດ້ຮຽກຮ້ອງ
ໃຫ້ສະມາຊິກສະພາຮັກສາຄວາມໝັ້ນຄົງທັບມ້າງສະພາບການບໍ່ໄປບໍ່ມາ ໃນການກົດ
ດັນຊີເຣຍກ່ຽວກັບການປາບປາມຢ່າງນອງເລືອດນັ້ນ.
ໃນການລາຍງານຈາກນະຄອນເຈນີວານັ້ນ ທູດພິເສດຂອງອົງການສະ ຫະປະຊາຊາດ
ແລະສັນນິບາດອາຣັບ ກ່າວວ່າທ່ານຈະສົ່ງເຈົ້າໜ້າທີ່ຄະນະນຶ່ງໄປຍັງກຸງ Damascus
ໃນອາທິດໜ້າເພື່ອເຈລະຈາຫາລືກ່ຽວກັບແຜນການທີ່ຈະສົ່ງພວກນັກສັງເກດການ
ນາໆຊາດເຂົ້າໄປໃນຊີ ເຣຍ. ທ່ານ Annan ຍັງໄດ້ກ່າວຕໍ່ບັນດານັກຂ່າວວ່າ ຄວາມ
ວຸ້ນວາຍທາງດ້ານການເມືອງຂອງຊີເຣຍຕ້ອງໄດ້ກໍາກັບຢ່າງລະມັດລະວັງເພື່ອ ຫລີກ
ລ້ຽງບໍ່ໃຫ້ມີການ “ຄາດຄະເນທີ່ພິດພາດໃດໆ” ທີ່ຈະນໍາໄປສູ່ການ “ການເພີ່ມທະວີ
ຄວາມເຄັ່ງຕຶງທີ່ສຳຄັນ” ຊຶ່ງຈະເປັນຜົນສະທ້ອນມາສູ່ຂົງເຂດທັງໝົດ.
ຖະແຫລງການສະບັບນຶ່ງທີ່ນຳອອກເຜີຍແຜ່ກ່ອນໜ້າການລາຍງານຂອງທ່ານ Annan
ນັ້ນເວົ້າວ່າ ລັດຖະບານຊີເຣຍໄດ້ປະກາດໃຫ້ຄຳໝັ້ນສັນຍາທີ່ຈະໃຫ້ການຮ່ວມມືໃນການ
ຊອກຫາຊອງທາງເພື່ອ “ແກ້ໄຂທາງດ້ານການເມືອງ” ຕໍ່ວິກິດການດັ່ງກ່າວ. ແຕ່ແນວໃດ
ກໍຕາມກະ ຊວງການຕ່າງປະເທດຊີເຣຍ ອີກຄັ້ງນຶ່ງຍັງໄດ້ຖິ້ມໂທດໃສ່ພວກກໍ່ການຮ້າຍ
ແລະການແຊກແຊງຂອງຕ່າງປະເທດ ກ່ຽວກັບສ່ວນໃຫຍ່ຂອງ ຄວາມຮຸນແຮງທີ່ເກີດ
ຂຶ້ນນັ້ນ.
