ທີ່ປະເທດ ບູຣຸນດີ ບັນດາຜູ້ເຫັນເຫດການ ລາຍງານໃນວັນອາທິດມື້ນີ້ວ່າ ມີຢ່າງໜ້ອຍ 2 ຄົນເສຍໄດ້ຊີວິດ ໃນການກໍ່ຄວາມຮຸນແຮງຂ້າມ ຄືນໃນນະຄອນຫຼວງ ບູຈຸມບູຣາ ເຊິ່ງຄວາມເຄັ່ງຕຶງໄດ້ເພີ່ມຂຶ້ນ ໃນໄລຍະກ່ອນການເລືອກຕັ້ງ ທີ່ເປັນເລື່ອງຖົກຖຽງກັນນັ້ນ.
ພັກຝ່າຍຄ້ານຂອງ ບູຣຸນດີ ກ່າວວ່າ ພວກເຂົາຈະບໍ່ເຂົ້າຮ່ວມໃນການເລືອກຕັ້ງແຫ່ງຊາດ ເພື່ອປະທ້ວງຕໍ່ຄວາມພະຍາຍາມຂອງປະທານາ ທິບໍດີທີ່ຈະລົງແຂ່ງເອົາຕຳແໜ່ງ ປັນສະໄໝທີສາມນັ້ນ.
ກຸ່ມຝ່າຍຄ້ານກ່າວວ່າ ພວກເຂົາຈະຂວັ້ມບາດ ທັງການເລືອກຕັ້ງ ສະພາແຫ່ງຊາດ ໃນວັນຈັນມື້ອື່ນ ແລະ ການເລືອກຕັ້ງປະທານາທິບໍດີ ໃນວັນທີ 15 ກໍລະກົດນັ້ນ ໂດຍອ້າງວ່າມັນເປັນໄປບໍ່ໄດ້ທີ່ຈະຈັດການເລືອກຕັ້ງທີ່ເປັນທຳ.
ບັນດາພວກທີ່ວິຈານ ປະທານາທິບໍດີ Pierre Nkurunziza ກ່າວວ່າ ທ່ານໄດ້ລະເມີດ ຂໍ້ຈຳກັດໃຫ້ດຳລົງຕຳແໜ່ງແຕ່ພຽງສອງສະໄໝ ໃນ ລັດຖະທຳມະນູນ ແລະ ຂໍ້ຕົກລົງທີ່ໄດ້ເຮັດໃຫ້ສົງຄາມກາງເມືອງຂອງ ບູຣຸນດີ ຍຸດຕິລົງ. ສານລັດຖະທຳມະນູນຂອງ ບູຣຸນດີ ໄດ້ກ່າວວ່າ ທ່ານປະທານາທິບໍດີ ແມ່ນສາມາດທີ່ຈະລົງສະໝັກເລືອກຕັ້ງໄດ້ອີກ ເພາະວ່າ ທ່ານໄດ້ຖືກເລືອກໂດຍ ສະພາແຫ່ງຊາດ, ບໍ່ແມ່ນບັນດາຜູ້ເລືອກຕັ້ງ, ສຳລັບການດຳລົງຕຳແໜ່ງຫ້າປີຄັ້ງທຳອິດຂອງທ່ານ ໃນປີ 2005 ນັ້ນ.
ການພະຍາຍາມ ທີ່ຈະລົງແຂ່ງຂັນເລືອກຕັ້ງອີກຂອງທ່ານ Nkurunziza ໄດ້ກະຕຸ້ນໃຫ້ມີການ ພະຍາຍາມກໍ່ລັດຖະປະຫານທີ່ລົ້ມເຫຼວ ໃນເດືອນແລ້ວນີ້. ຄວາມບໍ່ສະຫງົບຍັງໄດ້ບັງຄັບໃຫ້ຊາວ ບູຣຸນດີ ຫຼາຍກວ່າ 100,000 ຄົນ ຕ້ອງຫຼົບໜີໄພ ເຂົ້າໄປໃນບັນດາປະເທດເພື່ອນບ້ານ.