ບັນດາເຈົ້າໜ້າທີ່ໃນມຽນມາ ກ່າວວ່າ ປະຊາຊົນ 2 ຄົນ ເສຍຊີວິດ
ໃນຄວາມວຸ້ນວາຍ ລະຫວ່າງຊາວພຸດ ແລະຊາວມຸສລິມ ໃນເມືອງ
ມັນດາເລ ເມືອງໃຫຍ່ສຸດອັນດັບສອງ ຂອງປະເທດ.
ການເສຍຊີວິດດັ່ງກ່າວ ໄດ້ເກີດຂຶ້ນ ໃນລະຫວ່າງຄືນທີສອງຂອງ
ຄວາມວຸ້ນວາຍ ທີ່ໄດ້ເລີ້ມຂຶ້ນໃນວັນອັງຄານມື້ກ່ອນນີ້ ເວລາແກ໋ງ
ຊາວພຸດໂຈມຕີ ຮ້ານຂາຍນ້ຳຊາແຫ່ງນຶ່ງ ລຸນຫຼັງທີ່ມີຂ່າວຊ່າລືວ່າ
ເຈົ້າຂອງຮ້ານຂາຍນ້ຳຊາທີ່ເປັນຄົນມຸສລິມທຳການຂົ່ມຂືນຊຳເລົາ
ແມ່ຍິງທີ່ຖືສາສະໜາພຸດຄົນນຶ່ງ.
ໃນຄວາມວຸ້ນວາຍ ທີ່ເກີດຂຶ້ນ ໃນຄືນທຳອິດນັ້ນ ຕຳຫຼວດ ກ່າວວ່າ
ພວກເຂົາເຈົ້າໄດ້ໃຊ້ລູກປືນຢາງ ຍິງເຂົ້າໃສ່ ເພື່ອຂັບໄລ່ພວກທີ່ກໍ່ການຈະລາ ຈົນຫລາຍຮ້ອຍຄົນ ທີ່ມີກ້ອນຫີນແລະມີດພ້າເປັນອາວຸດ ເຮັດໃຫ້ປະຊາ ຊົນ 5 ຄົນໄດ້ຮັບບາດເຈັບ. ຕໍ່ມາໃນວັນພຸດວານນີ້ ສະຖານະການໄດ້ງຽບສະຫງົບລົງ ແຕ່ຄວາມວຸ້ນວາຍໄດ້ເກີດຂຶ້ນອີກ ໃນແລງວານນີ້ ເຮັດໃຫ້ຊາວພຸດຄົນນຶ່ງ ແລະຊາວມຸສລິມຄົນນຶ່ງ ໄດ້ເສຍຊີວິດໄປ.
ຊາວພຸດ ແລະມຸສລິມ ປະທະກັນ ຢູ່ ມຽນມາ
ມຽນມາໄດ້ປະສົບກັບຄື້ນຟອງແຫ່ງການກໍ່ຄວາມຮຸນແຮງຕໍ່ຕ້ານຊາວມຸສລິມເປັນບາງຄັ້ງບາງຄາວ ນັບແຕ່ເດືອນມິຖຸນາ ປີ 2012 ເປັນຕົ້ນມາ ເວລາການຈະລາຈົນລະເບີດຂຶ້ນຫຼັງຈາກເກີດບັນຫາຂັດແຍ້ງ ທາງດ້ານສາສະໜາ ລະຫວ່າງຊາວພຸດຊຶ່ງເປັນຊົນກຸ່ມໃຫຍ່ແລະຊາວມຸສລິມ ໂຣຮິງຢາ ຊຶ່ງເປັນຊົນກຸ່ມນ້ອຍ ໃນລັດ Rakhine ນັ້ນ.
ນັບແຕ່ນັ້ນມາ ຄວາມຮຸນແຮງ ໄດ້ແຜ່ລາມໄປຍັງແຫ່ງອື່ນໆ ເຮັດໃຫ້ປະຊາຊົນຢ່າງໜ້ອຍ 200 ຄົນເສຍຊີວິດ ສ່ວນໃຫຍ່ເປັນຊາວມຸສລິມ. ນອກນັ້ນ ຍັງມີປະຊາຊົນອີກຫຼາຍໝື່ນຄົນ ບໍ່ມີທີ່ຢູ່ອາໄສ.
ຄວາມຮຸນແຮງທາງດ້ານສາສະໜາ ຂະໜາດໃຫຍ່ ບໍ່ເຄີຍເກີດຂຶ້ນໃນເມືອງມັນດາເລມາກ່ອນ ຊຶ່ງເປັນສູນປະຫວັດສາດແຫ່ງສາສະໜາພຸດ ບ່ອນທີ່ພວກປະຊາຄົນທັງສອງສາສະໜາ ສ່ວນໃຫຍ່ເຄີຍຢູ່ຮ່ວມກັນມາຢ່າງສັນຕິນັ້ນ.
ມຽນມາ ເປັນປະເທດທີ່ມີພົນລະເມືອງ 60 ລ້ານຄົນ ກຳລັງຟື້ນໂຕຄືນ ຈາກການປົກຄອງ ທີ່ເຂັ້ມງວດ ແລະໂດຍກົງຂອງພວກທະຫານມາໄດ້ 50 ປີ ຊຶ່ງໄດ້ສິ້ນສຸດລົງຢ່າງເປັນທາງການ ໃນປີ 2011 ຜ່ານມານີ້.
