ທະຫານອາເມຣິກັນສອງຄົນ ແລະອັງກິດຜູ້ນຶ່ງ ໄດ້ເສຍຊີວິດ ພ້ອມທັງສິບກວ່າຄົນໄດ້ຮັບບາດເຈັບ ຫຼັງຈາກຈະຫຼວດລູກນຶ່ງໄດ້ຕົກລົງໃສ່ຄ້າຍຕາຈີທີ່ຕັ້ງຢູ່ທາງເໜືອຂອງນະຄອນຫຼວງແບັກແດັດ ຊຶ່ງເປັນບ່ອນທີ່ກຳລັງຂອງກຸ່ມແນວໂຮມພັກເຊົາຢູ່ນັ້ນ.
ອີງຕາມເຈົ້າໜ້າທີ່ສະຫະລັດ ແລະອີຣັກແລ້ວ ການໂຈມຕີດັ່ງກ່າວມີຂຶ້ນໃນຕອນແລງຂອງວັນພຸດວານນີ້ ໂດຍພວກຫົວຮຸນແຮງທີ່ໃຊ້ລົດບັນທຸກດັດແປງໃຫ້ເປັນລົດຍິງຈະຫຼວດ ໄດ້ຍິງຈະຫຼວດກາຢຸດຊາ 30 ລູກ ເຂົ້າໃສ່ຄ້າຍຕາຈີ ມີແຕ່ 18 ລູກໄດ້ຕົກຖືກຄ້າຍດັ່ງກ່າວ.
ໂຄສົກຂອງກອງບັນຊາການກຳລັງສະຫະລັດໃນພາກຕາເວັນອອກກາງ ຮ້ອຍເອກບິລ ເອີແບນ ໃຫ້ການຢືນຢັນກ່ຽວກັບການເສຍຊີວິດຂອງທະຫານອາເມຣິກັນສອງຄົນ. ເຈົ້າໜ້າທີ່ທະຫານຄົນນຶ່ງກ່າວວ່າ ບຸກຄົນທີສາມແມ່ນມາຈາກປະເທດອັງກິດ.
ມີຜູ້ໄດ້ຮັບບາດເຈັບຫຼາຍກວ່າ 12 ຄົນ ຮວມທັງທະຫານອາເມຣິກັນແລະທະຫານແນວໂຮມ ແລະກໍມີພະນັກງານສັນຍາຈ້າງຄົນນຶ່ງ.
ເຈົ້າໜ້າທີ່ກອງທັບອີຣັກ ຊຶ່ງເປັນເຈົ້າໜ້າທີ່ຈຸທຳອິດທີ່ໄດ້ເປີດເຜີຍໃຫ້ຊາບກ່ຽວກັບການໂຈມຕີດ້ວຍຈະຫຼວດ ໄດ້ສົ່ງຮູບຜ່ານທາງທວີດເຕີ້ ແລະລົດບັນທຸກທີ່ຖືກປະຖິ້ມໄວ້ ຊຶ່ງເຂົາເຈົ້າກ່າວວ່າ ພົບເຫັນຢູ່ໃກ້ໆຄ້າຍນັ້ນ.
ເຈົ້າໜ້າທີ່ສະຫະລັດ ມາຮອດປັດຈຸບັນນີ້ ຍັງບໍ່ໄດ້ມີການຖິ້ມໂທດໃດໆກ່ຽວກັບການໂຈມຕີດັ່ງກ່າວ ໂດຍກ່າວວ່າ ການສືບສວນພວມດຳເນີນຢູ່. ແຕ່ເຈົ້າໜ້າທີ່ທະຫານຄົນນຶ່ງທີ່ຂໍສະຫງວນຊື່ ກ່າວຕໍ່ວີໂອເອວ່າ ສະຫະລັດເຊື່ອວ່າ ພວກທະຫານບ້ານທີ່ໄດ້ຮັບການໜຸນຫຼັງຈາກອີຣ່ານ ທີ່ຮູ້ກັນໃນຊື່ ໜ່ວຍລະດົມກຳລັງມະຫາຊົນ ເປັນຜູ້ຮັບຜິດຊອບ.
ນີ້ບໍ່ແມ່ນເທື່ອທຳອິດ ທີ່ໄດ້ຖືກໂຈມຕີໂດຍພວກທະຫານບ້ານທີ່ໄດ້ຮັບການໜຸນຫຼັງຈາກອີຣ່ານທີ່ແນເປົ້າໝາຍໃສ່ທະຫານສະຫະລັດແລະກຳລັງແນວໂຮມ ແລະການໂຈມຕີໃນວັນພຸດວານນີ້ ອາດເປັນສັນຍາຂອງການເລີ້ມຕົ້ນ ໃນການເປັນປໍລະປັກກັນຄືນໃໝ່.
ໃນເດືອນທັນວາຜ່ານມາ ການໂຈມຕີທີ່ຄ້າຍຄືກັນນີ້ ຂອງກຸ່ມທະຫານບ້ານຄາຕາອີບ ເຮັສໂບລລາໄດ້ສັງຫານພະນັກງານສັນຍາຈ້າງຂອງສະຫະລັດຄົນນຶ່ງທີ່ຄ້າຍທະຫານຕັ້ງຢູ່ໃກ້ໆເມືອງເກີກຸກ ທີ່ອຸດົມສົມບູນໄປດ້ວຍນ້ຳມັນຂອງອີຣັກ.
