ບັນດາເຈົ້າໜ້າທີ່ ເທີກີ ໄດ້ສະຫຼຸບວ່າ ນັກຂ່າວຄົນ ຊາອຸດີ ອາຣາເບຍ, ຜູ້ທີ່ໄດ້ອາໄສຢູ່
ໃນ ສະຫະລັດ ແບບການເນເທດຕົນເອງນັ້ນ, ໄດ້ຖືກຂ້າຕາຍ ເມື່ອສັບປະດາທີ່ຜ່ານມາ
ຢູ່ສະຖານກົງສຸນ ຊາອຸດີ ອາຣາເບຍ ໃນນະຄອນ ອິສຕັນບູລ, ໃນເວລາທີ່ລາວໄປທີ່ນັ້ນ
ເພື່ອເອົາເອກະສານສຳລັບການແຕ່ງງານຂອງລາວເມື່ອບໍ່ດົນນີ້.
ບັນດາເຈົ້າໜ້າທີ່ ຊາອຸດີ ອາຣາເບຍ ເວົ້າວ່າ ການກ່າວຫາທີ່ວ່ານັ້ນ ແມ່ນບໍ່ມີມູນຖານ,
ເຖິງແມ່ນວ່າ ນັກຂ່າວທ້າວ ຈາມາລ ຄາຊອກກີ ອາຍຸ 53 ປີນັ້ນຈະບໍ່ໄດ້ຖືກພົບເຫັນ
ເປັນເວລາຫຼາຍວັນກໍຕາມ.
ຄູ່ໝັ້ນຂອງທ້າວ ຄາຊອກກີ, ນາງ ຮາຕິສ ເຊັນກິສ, ຜູ້ທີ່ໄດ້ລໍຖ້າລາວຢູ່ນອກກົງສຸນ ໃນ
ວັນອັງຄານທີ່ຜ່ານມາເວົ້າວ່າ ລາວບໍ່ໄດ້ອອກມາຈາກຕຶກຫຼັງນັ້ນເລີຍ.
ປະທານາທິບໍດີ ເທີກີ ທ່ານ ຣີເຊັບ ໄຕຢິບ ເອີດູອານ ໄດ້ກ່າວຕໍ່ບັນດານັກຂ່າວ ໃນວັນ
ອາທິດວານນີ້ວ່າ “ຂ້າພະເຈົ້າກຳລັງຕິດຕາມເຫດການດັ່ງກ່າວນັ້ນ ແລະ ພວກເຮົາຈະ
ແຈ້ງໃຫ້ໂລກຮູ້ ບໍ່ວ່າຜົນຈະອອກມາແບບໃດກໍຕາມ” ກ່ຽວກັບ ການກວດສອບຢ່າງເປັນ
ທາງການ. ບາງເທື່ອພວກເຮົາອາດຈະບໍ່ໄດ້ປະເຊີນກັບສະຖານະການທີ່ພວກເຮົາບໍ່
ຢາກພົບກໍເປັນໄດ້.”
ທ່ານ ເອີດູອານ ໄດ້ກ່າວວ່າ ຕຳຫຼວດແມ່ນກຳລັງເບິ່ງວິດີໂອຈາກກ້ອງວົງຈອນປິດຂອງ
ທາງເຂົ້າ ແລະ ທາງອອກຂອງສະຖານກົງສຸນນັ້ນຢູ່, ພ້ອມກັບສະໜາມບິນ ອິສຕັນບູລ.
ຕຳຫຼວດໄດ້ກ່າວກ່ອນໜ້ານີ້ວ່າ ຄົນຊາອຸດີ ອາຣາເບຍ ປະມານ 15 ຄົນໄດ້ເດີນທາງ
ຮອດນະຄອນ ອິສຕັນບູລ ໃນ 2 ຖ້ຽວບິນ ເມື່ອວັນອັງຄານທີ່ຜ່ານມາ ແລະ ໄດ້ຢູ່ສະ
ຖານກົງສຸນນັ້ນ ໃນເວລາທີ່ດຽວກັບທ້າວ ຄາຊອກກີ.
ທ້າວ ຄາຊອກກີ, ຄົນສັນຊາດ ຊາອຸດີ ອາຣາເບຍ ແລະ ເປັນນັກຂ່າວຂອງໜັງສືພິມ ວໍ
ຊິງຕັນ ໂພສ, ໄດ້ອາໄສຢູ່ນອກປະເທດໃນປີທີ່ຜ່ານມາ ເມື່ອບັນດາເຈົ້າໜ້າທີ່ ຊາອຸດີ
ອາຣາເບຍ ໄດ້ເລີ່ມປາບປາມການອອກຄວາມຄິດຕໍ່ຕ້ານ. ນັກຂ່າວຄົນດັ່ງກ່າວ ໄດ້ຕຳ
ໜິວິຈານຢ່າງແຮງ ອົງມົງກຸດ ຊາອຸດີ ອາຣາເບຍ ມູຮຳມັດ ບິນ ຊາລມານ.
ເມື່ອຖືກຖາມເຖິງລາຍງານຕ່າງໆ ກ່ຽວກັບ ນັກຂ່າວຄົນນັ້ນວ່າ ໄດ້ຖືກຂ້າຕາຍຢູ່ສະ
ຖານກົງສຸນ ຊາອຸດີ ອາຣາເບຍ ນັ້ນ, ໂຄສົກກະຊວງການຕ່າງປະເທດ ສະຫະລັດ ກໍ
ຕອບວ່າ “ພວກເຮົາຍັງບໍ່ພ້ອມທີ່ຈະໃຫ້ການຢືນຢັນ ກ່ຽວກັບ ລາຍງານພວກນີ້ເທື່ອ,
ແຕ່ພວກເຮົາກຳລັງຕິດຕາມສະຖານະການຢ່າງໃກ້ຊິດຢູ່.”
