ເທີກີ ໄດ້ທຳການໂຈມຕີທາງອາກາດ ໃນເຊົ້າວັນອັງຄານມື້ນີ້ ຕໍ່ພວກກະບົດຊາວເຄີດ
ໃນພາກເໜືອຂອງອີຣັກແລະພາກຕາເວັນອອກສຽງເໝືອຂອງຊີເຣຍ.
ຖະແຫຼງການຂອງກອງທັບເທີກີ ກ່າວວ່າ ການໂຈມຕີດັ່ງກ່າວ ແມ່ນແນໃສ່ ເພື່ອປ້ອງກັນ
ບໍ່ໃຫ້ພວກກະບົດ ການຂົນອາວຸດ ລູກກະສຸນແລະດິນລະເບີດ ຂ້າມຊາຍແດນເຂົ້າໄປ
ໃນເທີກີ.
ເຈົ້າໜ້າທີ່ເທີກີ ໄດ້ເຕືອນວ່າ ພວກກະບົດ ຈາກພັກກຳມະກອນເຄີດດິສຖານຫຼື PKK
ທີ່ຖືກຫ້າມນັ້ນ ບໍ່ໃຫ້ໃຊ້ເທີກີເປັນບ່ອນຫລົບລີ້ ແລະມັກຈະເຊື່ອມໂຍງກຸ່ມ PKK
ໃສ່ພວກນັກລົບຊາວເຄີດກຸ່ມອື່ນໆ ທີ່ອາໄສຢູ່ທີ່ນັ້ນ ເຊັ່ນກຸ່ມກຳລັງປົກປ້ອງປະຊາຊົນ
ຫຼື YPG ທີ່ສະຫະລັດ ໜຸນຫຼັງ.
ກຸ່ມສິ້ງຊອມສິດທິມະນຸດໃນຊີເຣຍ ທີ່ມີຫ້ອງການຢູ່ອັງກິດ ຊຶ່ງໄດ້ຕິດຕາມເບິ່ງບັນຫາ
ຂັດແຍ້ງໃນຊີເຣຍ ກ່າວເຖິງການໂຈມຕີທາງອາກາດໃນວັນອັງຄານມື້ນີ້ວ່າ ໄດ້ສັງຫານ
ພວກນັກລົບຂອງກຸ່ມ YPG ແລະເຈົ້າໜ້າທີ່ສື່ສານ ຢ່າງນ້ອຍ 18 ຄົນ.
ພັກ PKK ໄດ້ທຳການຕໍ່ສູ້ ເພື່ີອຮຽກຮ້ອງເອົາສິດທິໃນການປົກຄອງຕົນເອງເພີ່ມຂຶ້ນ
ແລະສ້າງຕັ້ງເຂດປົກຄອງຕົນເອງໃນເທີກີ ນັບຕັ້ງແຕ່ປີ 1984 ເປັນຕົ້ນມາ. ບັນຫາ
ຂັດແຍ້ງນີ້ ໄດ້ເຮັດໃຫ້ມີ 45 ພັນຄົນ ເສຍຊີວິດ. ເທີກີ ສະຫະລັດ ແລະສະຫະພາບ
ຢູໂຣບ ພາກັນລະບຸພັກ PKK ວ່າ ເປັນກຸ່ມກໍ່ການຮ້າຍ.
ໃນຮອບສອງປີທີ່ຜ່ານມານີ້ ເຮືອບິນລົບຂອງເທີກີ ໄດ້ປະຕິບັດງານ ໂຈມຕີເປັນ
ບາງຄັ້ງຄາວ ໃສ່ເຂດເຄີດດິສຖານໃນພາກເໜືອຂອງອີຣັກ ແລະທາງພາກຕາເວັນ
ອອກ ສຽງໃຕ້ຂອງເທີກີ.
ສົງຄາມທີ່ຍັງດຳເນີນຢູ່ຕໍ່ມາ ໃນຊີເຣຍ ຍັງໄດ້ເພີ່ມຄວາມຢ້ານກົວໃຫ້ແກ່ເທີກີ ທີ່ວ່າ
ພວກນັກລົບຊາວເຄີດ ໄດ້ເຂົ້າຍຶດເອົາບໍລິເວນສ່ວນໃຫຍ່ ທາງພາກເໜືອຂອງຊີເຣຍ
ຈາກພວກນັກລົບກຸ່ມລັດອິດສລາມ. ເທີກີ ໄດ້ທຳການຕອບໂຕ້ໃນທ້າຍປີກາຍ
ໂດຍເປີດສາກບຸກໂຈມຕີເຂົ້າໄປ ໃນຊີເຣຍ ໂດຍໃຫ້ການສະໜັບສະໜຸນຕໍ່ພວກຕໍ່
ຕ້ານລັດ ຖະບານຊີເຣຍ ຜູ້ຊຶ່ງໃນປັດຈຸບັນນີ້ ໄດ້ເຂົ້າຍຶດເອົາຂົງເຂດ ທີ່ຍາວຢຽດ
ຕາມຊາຍແດນລະຫວ່າງເຂດທີ່ຄອບຄອງໂດຍຊາດເຄີດ ຕັ້ງແຕ່ພາກຕາເວັນອອກ
ແລະຕາເວັນຕົກ.
