ລິ້ງ ສຳຫລັບເຂົ້າຫາ

logo-print

ນັກ​ສືບ​ສວນ ເທີ​ກີ ເຂົ້າ​ໄປ ໃນ​ກົງ​ສຸນ ຊາ​ອຸ​ດີ ອີກ ຂະ​ນະ​ທີ່ ທ່ານ​ພອມ​ພຽວ ຈະ​ລາຍ​ງານ ຕໍ່ ປ. ທ​ຣຳ


ເຈົ້າ​ໜ້າ​ທີ່​ສືບ​ສວນ​ຂອງ​ເທີ​ກີ ໄປ​ຮອດ​ບ້ານ​ພັກ ຂອງ​ກົງ​ສຸນໃຫຍ່ ຊາ​ອຸ​ດີ ອາ​ຣາ​ເບຍ ​ທ່ານ​ໂມ​ຮຳ​ມັດ ອາ​ລ ໂອ​ໄຕ​ບີ ທີ່​ນະ​ຄອນ​ອິ​ສ​ຕັນ​ບູ​ລ. (ວັນ​ທີ 17 ຕຸ​ລາ 2018)

ເຈົ້າ​ໜ້າ​ທີ່​ສືບ​ສວນ​ຂອງ​ເທີ​ກີ ໄດ້​ຄົ້ນ​ສະ​ຖານ​ກົງ​ສຸນຊາ​ອຸ​ດີ ອາ​ຣາ​ເບຍແລະ​ບ້ານ​ພັກ​ກົງ​ສຸນໃຫຍ່ ທີ່​ຕັ້ງ​ຢູ່​ໃກ້​ຄຽງ ໃນ​ນະ​ຄອນ​ອິ​ສ​ຕັນ​ບູ​ລ ໃນ​ວັນ​ພະ​ຫັດ​ມື້ນີ້ ຖານ​ເຊື່ອມໂຍງ​ກັບ​ການ​ຫາຍ​ຕົວ​ໄປ​ຂອງທ່ານຈາມ​າ​ລ ຄາ​ຊອກ​ກີ ​ນັກ​ຂ່າວ​ຊາ​ອຸ​ດີທີ່​ອາ​ໄສ​ຢູ່​ໃນສະ​ຫະ​ລັດນັ້ນ.

​ຄະ​ນະ​ສືບ​ສວນ​ຂອງ​ເທີ​ກີ ໄດ້​ເຂົ້າ​ໄປ​ໃນ​ສະ​ຖານ​ກົງ​ສຸນ​ຊາ​ອຸ​ດີ ​ມາ​ແລ້ວ​ເທື່ອ​ນຶ່ງ​ ໃນ​ວັນ​ຈັນ​ຜ່ານ​ມາ ເພື່ອ​ຄົ້ນ​ຫາ​ຮ່ອງ​ຮອຍ​ວ່າ ແມ່ນ​ຫຍັງ​ໄດ້​ເກີດ​ຂຶ້ນ​ກັບ​ທ່ານຄາ​ຊອກ​ກີ ຫຼັງ​ຈາກ​ຜູ້​ກ່ຽວ​ໄດ້​ເຂົ້າ​ໄປ​ໃນ​ກົງ​ສຸນ ເມື່ອ​ວັນ​ທີ 2 ຕຸ​ລາ​ຜ່ານ​ມາ.

ທ່ານຄາ​ຊອກ​ກີ ​ຜູ້​ຕ້ອງ​ຕິ​ລັດ​ຖະ​ບານທີ່​ເປັນ​ນັກ​ຂ່າວ​ໃຫ້​ໜັງ​ສື​ພິມວໍ​ຊິງ​ຕັນໂພ​ສທ໌ນັ້ນ ໄດ້​ຫາຍ​ຕົວ​ໄປ​ນັບ​ແຕ່ມື້ນັ້ນ​ມາ.

ນັກ​ຂ່າວ​ຈາ​ມາ​ລ ຄາ​ຊອກ​ກີ
ນັກ​ຂ່າວ​ຈາ​ມາ​ລ ຄາ​ຊອກ​ກີ

ເຈົ້າ​ໜ້າ​ທີ່​ເທີ​ກີ​ກ່າວ​ວ່າ ສາຍ​ລັບ​ຂອງ​ຊາ​ອຸ​ດີ ໄດ້​ຂ້າ ແລະ​ກໍ​ຕັດ​ຕົນ​ໂຕ​ຂອງ​ທ່ານ ຄາ​ຊອກ​ກີ​ເປັນ​ຕ່ອນໆ ໃນ​ຂະ​ນະ​ທີ່​ຊາ​ອຸ​ດີ​ກ່າວ​ວ່າ ລາວ​ໄດ້​ຍ່​າງ​ອອກ​ໄປ​ຈາກ​ກົງສຸນ​ດ້ວຍ​ຕົວ​ລາວ​ເອງ. ​ປະ​ເທດ​ທັງ​ສອງ ​ຕ່າງ​ກໍ​ບໍ່​ໄດ້​ນຳ​ສະ​ເໜີ​ຫຼັກ​ຖານ​ເພື່ອໃຫ້ການ​ສະ​ໜັບ​ສະ​ໜຸນແກ່​ການ​ກ່າວ​ອ້າງ​ຂອງ​ຕົນ.

ລັດ​ຖະ​ມົນ​ຕີ​ການ​ຕ່າງ​ປະ​ເທດ ສະ​ຫະ​ລັດ ທ່ານ ໄມ​ຄ໌ ພອມ​ພຽວ ໄດ້​ເດີນ​ທາງ​ໄປ​ພົບ​ປະ​ກັບ​ພວກ​ຜູ້​ນຳ​ທັງ​ຂອງ​ປະ​ເທດ​ຊາ​ອຸ​ດີ ອາ​ຣາ​ເບຍ ແລະ​ຂອງ​ເທີ​ກີ​ເພື່ອສະ​ແດງ​ຄວາມ​ເປັນ​ຫ່ວງ​ກ່ຽວ​ກັບ​ຄະ​ດີນີ້ ແລະຄວາມ​ປະ​ສົງ​ຂອງປະ​ທາ​ນາ​ທິ​ບໍ​ດີ​ດໍ​ໂນ​ລ ທ​ຣຳ ທີ່​ຢາກ​ຮູ້​ຈັກ​ວ່າ​ແມ່ນ​ຫຍັງ​ແທ້​ໄດ້​ເກີດ​ຂຶ້ນ.

ເຈົ້າ​ໜ້າ​ທີ່​ສືບ​ສວນ​ຂອງ​ເທີ​ກີ ໄປ​ຮອດ​ບ້ານ​ພັກ ກົງ​ສຸນ​ໃຫຍ່ ຊາ​ອຸ​ດີ ອາ​ຣາ​ເບຍ ທີ່​ນະ​ຄອນ​ອິ​ສ​ຕັນ​ບູ​ລ. (ວັນ​ທີ 17 ຕຸ​ລາ 2018)
ເຈົ້າ​ໜ້າ​ທີ່​ສືບ​ສວນ​ຂອງ​ເທີ​ກີ ໄປ​ຮອດ​ບ້ານ​ພັກ ກົງ​ສຸນ​ໃຫຍ່ ຊາ​ອຸ​ດີ ອາ​ຣາ​ເບຍ ທີ່​ນະ​ຄອນ​ອິ​ສ​ຕັນ​ບູ​ລ. (ວັນ​ທີ 17 ຕຸ​ລາ 2018)

​ມີ​ກຳ​ນົດ​ວ່າ​ທ່ານ​ພອມ​ພຽວ​ຈະ​ລາຍ​ງານ​ໃຫ້​ປະ​ທາ​ນາ​ທິ​ບໍ​ດີ​ທ​ຣຳ​ຊາບຢູ່​ທີ່​ທຳ​ນຽບ​ຂາວ​ໃນ​ຕອນ​ເຊົ້າ​ວັນ​ພະ​ຫັດ​ມື້ນີ້.

ທ່ານ​ທ​ຣຳ​ກ່າວ​ໃນ​ວັນ​ພຸດ​ວານນີ້​ວ່າ ທ່ານ​ຕ້ອງ​ການ​ຢາກ​ເຫັນ​ວີ​ດີ​ໂອ​ແລະ​ສຽງ​ບັນທຶກ​ຂອງ​ພວກ​ເຈົ້າ​ໜ້າ​ທີ່​ສືບ​ລັບ​ຈາກ​ເທີ​ກີ “ຖ້າ​ຫາກ​ມັນ​ມີ​ແທ້.”

ການ​ຮຽກ​ຮ້ອງ​ຂອງ​ທ່ານ ມີ​ຂຶ້ນ​ໃນ​ຂະ​ນະ​ທີ່​ທ່ານ​ສະ​ແດງ​ການ​ສະ​ໜັບ​ສະ​ໜຸນ​ຕໍ່​ຊາ​ອຸ​ດີ ອາ​ຣາ​ເບຍ ພັນ​ທະ​ມິດ​ມາ​ເປັນ​ເວ​ລາ​ດົນ​ນານ​ຂອງ​ສະ​ຫະ​ລັດແລະ​ກ່າວວ່າ ທ່ານ​ຄາດ​ວ່າ​ການ​ສືບ​ສວນ​ກ່ຽວ​ກັບ​ການ​ຫາຍ​ສາບ​ສູນ​ຂອງ​ທ່ານຄາ​ຊອກ​ກີຈະ​ເສັດ​ສິ້ນ​ລົງ​ພາຍ​ໃນ​ທ້າຍ​ອາ​ທິດນີ້.

​ລັ​ດ​ຖະ​ມົນ​ຕີ​ຕ່າງ​ປະ​ເທດ​ ສ​ຫລ ທ່ານ​ໄມ​ຄ໌ ພອມ​ພຽວ ພົບ​ປະ​ກັບ ອົງ​ມົງ​ກຸດ​ຣາ​ຊະ​ກຸມ​ມານ ຂອງ​ຊາ​ອຸ​ດີ ອາ​ຣາ​ເບຍ ທີ່​ນະ​ຄອນ​ຫຼວງ​ຣິ​ຢາດ (ວັນ​ທີ 16 ຕຸ​ລາ 2018)
​ລັ​ດ​ຖະ​ມົນ​ຕີ​ຕ່າງ​ປະ​ເທດ​ ສ​ຫລ ທ່ານ​ໄມ​ຄ໌ ພອມ​ພຽວ ພົບ​ປະ​ກັບ ອົງ​ມົງ​ກຸດ​ຣາ​ຊະ​ກຸມ​ມານ ຂອງ​ຊາ​ອຸ​ດີ ອາ​ຣາ​ເບຍ ທີ່​ນະ​ຄອນ​ຫຼວງ​ຣິ​ຢາດ (ວັນ​ທີ 16 ຕຸ​ລາ 2018)

​ເມື່ອ​ມີ​ການ​ຖາມ​ວ່າ ທ່ານ​ຈະ​ເຮັດ​ຫຍັງ ຖ້າ​ຫາກ​ພວກ​ເຈົ້າ​ໜ້າ​ທີ່​ສືບ​ສວນ​ຂອງ​ຊາ​ອຸ​ດີ​ພົບ​ວ່າ ຜູ້​ນຳ​ຂອງ​ຊາ​ອຸ​ດີ ກະ​ສັດ​ຊາ​ລ​ມານ ແລະ​ອົງ​ມົງ​ກຸດ​ຣາ​ຊະ​ກຸມ​ມານ ​ເຈົ້າຟ້າ​ຊາຍ​ໂມ​ຮຳ​ເມັດ ບິນ ຊາ​ລ​ມານ ເປັນ​ຜູ້​ຮັບ​ຜິດ​ຊອບ​ໃນ​ເລື້ອງນີ້ ທ່ານ​ທ​ຣຳ​ໄດ້ກ່າວ​ໃນ​ການ​ໃຫ້​ສຳ​ພາດ ​ຕໍ່​ໂທ​ລະ​ພາບ​ຟັອກ​ສ໌​ທຸ​ລະ​ກິດ​ວ່າ “ດີ​ແລ້ວ ຂ້າ​ພະ​ເຈົ້າຫວັງ​ວ່າ ພວກ​ເຮົາ​ຈະ​ຢູ່​ໃນ​ຂ້າງ​ທີ່​ດີ ຂອງ​ສຳ​ມະ​ການ.”

ທ່ານ​ທ​ຣຳ ເວົ້າ​ວ່າ “ທ່ານ​ຄົງ​ຮູ້​ດີ ພວກ​ເຮົາ​ຕ້ອງ​ການ​ຊາ​ອຸ​ດີ ອາ​ຣາ​ເບຍ ເມື່ອ​ເວົ້າ​ເຖິງ​ການ​ຕໍ່​ສູ້​ກັບ​ພວກ​ກໍ່​ການ​ຮ້າຍ ທຸກ​ຢ່າງ​ທີ່​ກຳ​ລັງ​ເກີດ​ຂຶ້ນ​ຢູ່​ໃນ​ອີ​ຣ່ານ​ແລະແຫ່ງ​ອື່ນໆ.”

ເມື່ອ​ມີ​ການ​ຖາມ​ວ່າ ສະ​ຫະ​ລັດ​ຈະ​ວາງ​ໂຕ​ອອກ​ຫ່າງ​ຈາກ​ຊາ​ອຸ​ດີ ອາ​ຣາ​ເບຍ​ຫຼື​ບໍ່ ກ່ຽວ​ກັບ​ຄະ​ດີ​ທ່ານຄາ​ຊອກ​ກີນັ້ນ ທ່ານ​ທ​ຣຳຕອບ​ວ່າ “ຂ້າ​ພະ​ເຈົ້າ​ບໍ່​ຕ້ອງ​ການ​ຈະເຮັດ​ຈັ່ງ​ຊັ້ນ ແລະ​ທີ່​ຈິງ​ແລ້ວ ພວກ​ເຂົາ​ເຈົ້າ​ ມີ​ການ​ສັ່ງ​ຊື້​ເປັນ​ຈຳ​ນວນ​ຫຼວງ​ຫຼາຍ 110 ພັນ​ລ້ານ​ໂດ​ລາ” ຊຶ່ງ​ທ່ານ​ໝາຍ​ເຖິງ​ສັນ​ຍາ​ທີ່​ຊາ​ອຸ​ດີ ຈະ​ຊື້​ອາ​ວຸດ​ຈາກ​ສະຫະ​ລັດ ໃນ​ໄລ​ຍະ​ສອງ​ສາມ​ປີ​ຂ້າງ​ໜ້ານີ້.

ອ່ານ​ຂ່າວນີ້​ຕື່ມ​ເປັນ​ພາ​ສາ​ອັງ​ກິດ

ທ່ານອາດຈະມັກເລື້ອງນີ້ຄືກັນ

XS
SM
MD
LG