ນາຍົກລັດຖະມົນຕີເທີກີ ທ່ານ Recep Tayyip Erdogan
ໄດ້ໄຊຊະນະ ການເລືອກຕັ້ງ ປະທານາທິບໍດີ ໂດຍກົງຄັ້ງ
ທຳອິດ ໃນປະເທດຂອງທ່ານ ຊຶ່ງຮັບປະກັນ ໃຫ້ທ່ານຈະຍັງ
ດຳລົງຕຳແໜ່ງເປັນຜູ້ນຳ ຂອງເທີກີ ຫ້າປີຕື່ມອີກ.
ຄະນະກຳມະການເລືອກຕັ້ງຂອງເທີກີ ກ່າວໃນວັນອາທິດ
ວານນີ້ ວ່າ ຫຼັງຈາກການນັບບັດຄະແນນສຽງ ເກືອບທັງໝົດ
ແລ້ວ ຜົນອອກມາໃນເບື້ອງຕົ້ນ ສະແດງວ່າ ທ່ານ Erdogan
ໄດ້ຮັບໄຊຊະນະ ດ້ວຍສຽງສ່ວນຫຼາຍຢ່າງເດັດຂາດ.
ຜົນຂອງການນັບບັດທັງໝົດ ສະແດງວ່າທ່ານໄດ້ຊະນະ
ພວກຄູ່ແຂ່ງທັງສອງຄົນ ຢ່າງງ່າຍດາຍ ທ່ານ Ekmeleddin Ihsanoglu ອະດີດ
ຫົວໜ້າຂອງອົງການອິສລາມເພື່ອການຮ່ວມມື ຜູ້ທີ່ໄດ້ຮັບສຽງສະໜັບສະໜຸນ
ປະມານ 39 ເປີເຊັນ ແລະຜູ້ສະມັກຊາວ Kurds ທ່ານ Selahattin Demirtas
ໄດ້ຮັບສຽງສະໜັບ ສະໜຸນ 9 ເປີເຊັນ.
ທ່ານ Erdogan ຊະນະ ການເລືອກຕັ້ງໃນເທີກີ
ລາຍງານຂ່າວໂທລະພາບ ຂອງເທີກີ ກ່າວວ່າ ທ່ານ Erdogan ໄວ 60 ປີ ທີ່ມີຄວາມ
ເຫລື້ອມໃສໃນສາສະໜາມຸສລິມ ໄດ້ໄປໂບດມຸສລິມ ເພື່ອທຳການໄຫວ້ພະ ກ່ອນທີ່
ຄາດກັນວ່າ ຈະຂຶ້ນຖ້ຽວບິນໄປຍັງນະຄອນຫລວງ Ankara ເພື່ອກ່າວຄຳປາໄສຮັບ
ເອົາໄຊຊະນະຄັ້ງນີ້.
ທ່ານ Erdogan ແມ່ນເປັນນາຍົກລັດຖະມົນຕີ ຢູ່ໃນສະໄໝ ທີສາມ ແລະ ການໄດ້ຮັບເລືອກຕັ້ງອີກ ຈະຕໍ່ການຄອບຄອງດ້ານການເມືອງຂອງເທີກີ ເປັນເວລານຶ່ງທົດສະວັດ
ຂອງທ່ານໄປຕື່ມອີກ.
