ປະທານາທິບໍດີ ເທີກີ ທ່ານ Recep Tayyip Erdogan ໄດ້ກ່າວວ່າ ການປະຕິບັດການ ຂອງທະຫານ ທີ່ໄດ້ເລີ່ມຕົ້ນຂຶ້ນ ໃນວັນພຸດມື້ນີ້ ຢູ່ໃນພາກເໜືອຂອງຊີເຣຍ ນັ້ນ ແມ່ນໄດ້ ແນເປົ້າໝາຍໃສ່ ພວກນັກລົບລັດອິສລາມ ແລະ ພວກຊາວເຄີດໃນຊີເຣຍ ໃນຄວາມ ພະຍາຍາມເພື່ອຈະຍຸຕິການຂົ່ມຂູ່ຂອງພວກການຮ້າຍ ຢູ່ຕາມເຂດຊາຍແດນ.
ເທີກີ ຖືວ່າ ພວກຊາວເຄີດທີ່ໜູນຫຼັງໂດຍສະຫະລັດ ຢູ່ໃນຊີເຣຍນັ້ນ ເປັນພັນທະມິດກັບ ພວກຊາວເຄີດ ໃນພາກຕາເວັນອອກສຽງໃຕ້ຂອງເທີກີ ທີ່ໄດ້ຕໍ່ສູ້ຕ້ານລັດຖະບານເທີກີ ມາເປັນເວລາຍາວ ຫຼາຍທົດສະວັດແລ້ວ.
ການປະຕິບັດການ ໃນວັນພຸດມື້ນີ້ ປະກອບດ້ວຍ ການຍິງປືນໃຫຍ່ ແລະ ການໂຈມຕີ ທາງອາກາດດ້ວຍເຮືອບິນອາຍພົ່ນຂອງເທີກີ ໂດຍໄດ້ຮັບການສະໜັບສະໜູນ ຈາກ ເຮືອບິນລົບອື່ນໆ ຂອງກອງກຳລັງປະສົມ ທີ່ນຳພາໂດຍສະຫະລັດ ທີ່ໄດ້ແນເປົ້າໝາຍ ໃສ່ ກຸ່ມລັດອິສລາມ ມາເປັນເວລາປະມາ 2 ປີ. ລົດຖັງຈຳນວນນຶ່ງຂອງເທີກີ ກໍໄດ້ເຂົ້າ ຮ່ວມໃນການຕໍ່ສູ້ນຳດ້ວຍ ຢູ່ໃນຟາກເຂດຊາຍແດນຂອງຊີເຣຍ ຂະນະທີ່ພວກເຂົາເຈົ້າ ພະຍາຍາມທີ່ຈະກົດດັນໃຫ້ພວກຫົວຮຸນແຮງ ອອກໄປຈາກເມືອງ Jarablus.
ການປະຕິບັດການ ມີຂຶ້ນ ມື້ນຶ່ງ ຫຼັງຈາກທີ່ລັດຖະມົນຕີການຕ່າງປະເທດ ເທີກີ ທ່ານ Mevlut Cavusoglu ໄດ້ກ່າວວ່າ ເທີກີ ຈະໃຫ້ ການສະໜັບສະໜູນ ເພື່ອຕໍ່ສູ້ກັບ ກຸ່ມລັດອິສລາມ “ທຸກໆຮູບແບບ” ຢູ່ໃນບໍລິເວນອ້ອມເມືອງ Jarablus. ໃນວັນຈັນ ຜ່ານມາ ລັດຖະບານເທີກີ ໄດ້ປະຕິຍານວ່າ ຈະ “ກວດລ້າງ” ກຸ່ມລັດອິສລາມ ຫຼັງ ຈາກການໂຈມຕີດ້ວຍລະເບີດສະຫຼະຊີບໃກ້ກັບເມືອງ Gaziantep.
ກຸ່ມລັດອິສລາມ ໄດ້ຄວບຄຸມ ເຂດຊາຍແດນອັນຍາວຢຽດ ລະຫວ່າງເທີກີ ແລະ ຊີເຣຍ ໃນຕົ້ນປີ 2015 ແຕ່ພວກນັກລົບຊາວເຄີດ ໄດ້ຍຶດຄືນພາກສ່ວນອັນໃຫຍ່ ຂອງດິນແດນດັ່ງກ່າວ ໂດຍສະເພາະ ແມ່ນຢູ່ທາງພາກຕາເວັນອອກ ຂອງເມືອງ Jarablus.
ການທີ່ບໍ່ໃຫ້ພວກຫົວຮຸນແຮງ ເຂົ້າເຖິງເຂດຊາຍແດນໄດ້ ໂດຍຕັດຂາດເສັ້ນທາງລຳລຽງ ສຳພາລະ ແລະນຳເອົາພວກນັກລົບເຂົ້າໄປໃນຊີເຣຍ ແຕ່ເທີກີກໍມີຄວາມລະມັດລະວັງ ໃນໄຊຊະນະທີ່ຕົນໄດ້ຮັບມາ ຮ່ວມກັບ ພວກຊາວເຄີດ ທີ່ໄດ້ຂະຫຍາຍການຄວບຄຸມ ຂອງພວກເຂົາເຈົ້າ ຢູ່ໃນ ພາກເໜືອຂອງຊີເຣຍ.
ອ່ານຂ່າວນີ້ຕື່ມ ເປັນພາສາອັງກິດ
