ກອງທັບເທີກີ ໄດ້ເຂົ້າໄປປະຕິບັດງານໃນຊີເຣຍ ເມື່ອຄືນຜ່ານ
ມານີ້ ເພື່ອຍົກຍ້າຍພວກທະຫານ ທີ່ຍາມສຸສານຂອງມື້ລາງ
Suleyman Shah ພໍ່ຕູ້ຂອງຜູ້ກໍ່ຕັ້ງອານາຈັກ Ottoman ຂຶ້ນ
ມານັ້ນ.
ບັນດາເຈົ້າໜ້າທີ່ເທີກີ ກ່າວວ່າ ພວກລົດຖັງ ແລະອາວຸດໜັກ
ອື່ນໆ ໄດ້ເຄື່ອນເຂົ້າໃນຊີເຣຍ ໂດຍຜ່ານເມືອງຊາຍແດນ ໂຄ
ບານີ ຊຶ່ງພວກນັກຕໍ່ສູ້ຊາວເຄີດຊີເຣຍ ໄດ້ຍຶດເອົາຄືນມາໃນ
ເດືອນແລ້ວນີ້ ຫຼັງຈາກການສູ້ລົບກັນຢ່າງດຸເດືອດ ກັບກຸ່ມລັດ
ອິສລາມ.
ບັນດາເຈົ້າໜ້າທີ່ເວົ້າວ່າ ການອອກປະຕິບັດງານໄດ້ຮັບຄວາມສຳເລັດ ໂດຍໄດ້ນຳເອົາ
ພວກທະຫານຍາມເຫຼົ່ານັ້ນ ກັບຄືນມາຍັງເທີກີ ແລະໃຫ້ຂໍ້ສັງເກດວ່າ ມີທະຫານຄົນນຶ່ງ
ເສຍຊີວິດ ຍ້ອນອຸບັດເຫດ.
ສຸສານດັ່ງກ່າວ ຊຶ່ງຢູ່ເລິກເຂົ້າໄປໃນດິນຊີເຣຍ ປະມານ 35 ຫຼັກກິໂລແມັດ ໃນແຂວງ Aleppo ນັ້ນ ຖືວ່າຢູ່ໃນດິນແດນຂອງເທີກີ ອີງຕາມສົນທິສັນຍາທີ່ໄດ້ລົງນາມກັນ ໃນ
ປີ 1921.
ທ່ານ Ahmet Davutoglu ນາຍົກລັດຖະມົນຕີເທີກີ ກ່າວວ່າ ສຸສານດັ່ງກ່າວຈະຖືກ
ຍົກຍ້າຍໄປຕັ້ງຢູ່ບ່ອນອື່ນໃນຊີເຣຍ ໃກ້ກັບຊາຍແດນເທີກີຫລາຍຂຶ້ນ.
ລັດຖະບານເທີກີ ກ່າວໃນປີແລ້ວນີ້ວ່າ ພວກຫົວຮຸນແຮງລັດອິສລາມພວມຄືບໜ້າໄປ
ຍັງສຸສານດັ່ງກ່າວ ທີ່ມີທະຫານເທີກີຫຼາຍສິບຄົນຍາມຮັກສາຢູ່.
