ລິ້ງ ສຳຫລັບເຂົ້າຫາ

ນາຍົກລັດຖະມົນຕີ​ເທີກີ ທ່ານ Tayyib Recep Erdogan ກ່າວ​ວ່າ ລັດຖະບານ​ຂອງ​ທ່ານ​ຈະ​ວາງ​ການ​ລົງ​ໂທດຂອງຕົນ​ຕໍ່​ຊີ​ເຣຍ ​ເຖິງ​ແມ່ນ​ຮ່າງຍັດ​ຕິຂອງ​ສະຫະພາບ​ຢູ​ໂຣບບໍ່​ໄດ້ຖືກ​ຮັບຮອງ​ເອົາ​ຈາກ​ສະພາ​ຄວາມ​ໝັ້ນຄົງສະຫະ​ປະຊາ​ຊາດ​ກໍ​ຕາມ.

ຣັດ​ເຊຍ​ແລະ​ຈີນ​ໃຊ້​ສິດ​ຍັບ​ຍັ້ງ​ຕໍ່​ຮ່າງ​ຍັດຕິ​ດັ່ງກ່າວ​ໃນ​ວັນ​ອັງຄານ​ວານ​ນີ້ ກະ​ຕຸ້ນ​ໃຫ້​ສະຫະລັດ​ແລະ​ສະຫະພາບ​ຢູ​ໂຣບເກີດ​ຄວາມ​ຄຽດ​ແຄ້ນ. ມາດ​ຕະການ​ດັ່ງກ່າວ​ແມ່ນ​ບັນຈຸ​ການ​ອ້າງ​ອິງ​ຕ່າງໆ​ກ່ຽວກັບການລົງ ໂທດທີ່ອາດມີຂຶ້ນ​ໄດ້​ຕໍ່​ຊີ​ເຣຍ ຖ້າ​ຫາກ​ຄະນະ​ນໍາພາ​ຂອງ​ຊີ​ເຣຍຍັງດໍາ​ເນີນການ​ປາບ​ປາມຢ່າງໂຫດຮ້າຍຕໍ່​ພວກ​ປະ​ທ້ວງ​ຝ່າຍ​ຄ້ານ​ຕໍ່​ໄປ​ນັ້ນ.

ທ່ານ Erdogan ກ່າວໃນ​ລະຫວ່າງ​ການ​ກ່າວ​ປາ​ໄສ​ທີ່​ອາ​ຟຣິກາ​ໃຕ້​ໃນວັນ​ພຸດ​ມື້​ນີ້​ວ່າ ຮ່າງ​ຍັດຕິ​ທີ່​ປະສົບ​ກັບ​ຄວາມ​ລົ້ມ​ແຫລວ​ນີ້​ ຈະ​ບໍ່ສາມາດສະກັດ​ກັ້ນ​ເຕີ​ກກີ​ແລະ​ບາງ​ປະ​ເທດ​ໃນ​ຢູ​ໂຣບໃຫ້ທໍາ​ການ​ເຄື່ອນ​ໄຫວ​ດັ່ງກ່າວໄດ້.

ທ່ານ​ນາງ Susan Rice ​ເອກ​ອັກຄະ​ລັດຖະທູດ​ສະຫະລັດ​ປະ​ຈໍາ​ອົງການ​ສະຫະ​ປະຊາ​ຊາດ​ກ່າວ​ວ່າ ຮ່າງ​ຍັດຕິ​ດັ່ງກ່າວ​ແມ່ນ​ສະ​ເໜີ​ຂຶ້ນໂດຍ​ຝຣັ່ງ ອັງກິດ ​ເຢຍຣະມັນ​ແລະປອກຕຸຍ​ການນີ້​ ໄດ້​ຖືກ​ຄັດຄ້ານ​ໂດຍ​ພວກ​ປະ​ເທດ​ທີ່ຢາກ​ຂາຍ​ອາວຸດ​ ໃຫ້​ແກ່​ອໍານາດ​ປົກຄອງ​ຊີ​ເຣຍນັ້ນ. ທ່ານ​ນາງ Rice ກ່າວ​ວ່າ ລັດຖະບານ​ກຸງ​ວໍ​ຊິງ​ຕັນ​ມີ​ຄວາມ​ໂກດ​ແຄ້ນ​ນໍາ​ການ​ລົງມະຕິ​ດັ່ງກ່າວ ຂະນະ​ດຽວ​ກັນ ທູດ​ຂອງຝຣັ່ງ​ໃຫ້​ຄໍາ​ໜັ້ນສັນຍາ​ວ່າ ການ​ໃຊ້​ສິດ​ຍັບ​ຍັ້ງ​ທີ່​ວ່າ​ນີ້ຈະ​ບໍ່​ສາມາດສະກັດກັ້ນໃຫ້​ພວກ​ເຮົາ​ຢຸດ​ເຊົາໄດ້.

ທ່ານ​ນາງ Rice ​ແລະ​ຄະນະ​ຜູ້ຕາງໜ້າ​ສະຫະລັດ​ໄດ້​ພາກັນ​ຍ່າງ​ອອກຈາກກອງປະຊຸມ​ສະພາ​ຄວາມ​ໝັ້ນຄົງ ຂະນະ​ທີ່​ຜູ້ຕາງໜ້າ​ຂອງ​ຊີເຣຍທໍາ​ການ​ປະນາມ​ຢ່າງ​ແຂງ​ແຮງ​ຕໍ່​ພວກ​ປະ​ເທດ​ທີ່ພະຍາຍາມ​ທໍາ​ການ​ເຄື່ອນ​ໄຫວ​ຕໍ່ຕ້ານ​ປະທານາທິບໍດີ Bashar al-Assad ນັ້ນ.

ທ່ານ Vitaly Churkin ທູດຣັດ​ເຊຍ​ປະ​ຈໍາ​ສະຫະ​ປະຊາ​ຊາດ ກ່າວ​ວ່າ ກຸງ​ມອສກູ​ຄັດຄ້ານ​ຕໍ່​ການ​ລົງ​ໂທດ ​ໂດຍ​ສະ​ເພາະ ​ເພາະວ່າ​ພວກປະຊາຊົນ​ຊີ​ເຣຍຫລາຍ​ຄົນ ບໍ່​ສະໜັບສະໜຸນ​ຂະ​ບວນການ​ຕໍ່ຕ້ານລັດຖະບານນັ້ນ. ທ່ານ Churkin ກ່າວໃນ​ອັນ​ທີ່​ທ່ານເອີ້ນວ່າວິທີ​ການ​ປະ​ເຊີນໜ້າ​ກັນ​ຂອງ​ພວກ​ປະ​ເທດ​ໃນ​ຢູ​ໂຣບ ​ແມ່ນ​ຂັດ​ຕໍ່​ການ​ແກ້​ໄຂ​ວິ​ກິດ​ການ​ໂດຍ​ສັນຕິວິທີ​ນັ້ນ.

ກະຊວງ​ການ​ຕ່າງປະ​ເທດ​ຈີນ​ກ່າວ​ຢູ່​ໃນ​ຖະ​ແຫລ​ງການ​ສະບັບ​ນຶ່ງ​ວ່າ ຂໍ້ສະ​ເໜີ​ທີ່​ຮ່າງ​ຂຶ້ນ​ນີ້ ຈະ​ທໍາ​ຄວາມ​ກົດ​ດັນ​ຢ່າງ​ຫລັບ​ຫູ​ຫລັບ​ຕາ​ຕໍ່​ຊີ​ເຣຍ​ແລະ​ຈະ​ບໍ່​ຊ່ອຍ​ຜ່ອນຄາຍ​ສະຖານະ​ການ​ໃນ​ຊີ​ເຣຍລົງແຕ່ຢ່າງໃດເລີຍ.

XS
SM
MD
LG