ລັດຖະມົນຕີການຕ່າງປະເທດສະຫະລັດ ທ່ານໄມຄ໌ ພອມພຽວ ໄດ້ຮຽກຮ້ອງໃຫ້
ຊາວດີອາຣາເບຍ ສະໜັບສະໜຸນການສືບສວນຢ່າງໂປ່ງໄສ ໃນການຫາຍຕົວ
ຂອງນັກຂ່າວຊາວດີອາຣາເບຍ ຄົນນຶ່ງ ຄືທ່ານຈາມາລ ຄັສຊອກກີ ຊຶ່ງຫາຍສາບສູນ
ນັບຕັ້ງແຕ່ໄດ້ເຂົ້າໄປຍັງສະຖານກົງສຸນຂອງປະເທດຊາວດີອາຣາເບຍ ໃນນະຄອນ
ອິສຕັນບູລ ໃນສັບປະດາແລ້ວນີ້.
ເຈົ້າໜ້າທີ່ເທີກີ ກ່າວວ່າ ທ່ານຄັສຊອກກີ ໄດ້ຖືກສັງຫານ ໃນສະຖານທີ່ການທູດ
ດັ່ງກ່າວ ໃນຂະນະທີ່ ຊາວດີອາຣາເບຍ ກ່າວວ່າ ຜູ້ກ່ຽວໄດ້ອອກຈາກຕຶກດັ່ງກ່າວ
ຢ່າງປອດໄພ.
ທ່ານ ພອມພຽວ ກ່າວໃນຖະແຫຼງການສະບັບນຶ່ງໃນວັນຈັນວານນີ້ ວ່າ “ພວກເຮົາ
ໄດ້ເຫັນລາຍງານທີ່ບໍ່ກົງກັນ ກ່ຽວກັບຄວາມປອດໄພ ແລະທີ່ຢູ່ ວ່າທ່ານຈາມາລ
ຄັສຊອກກີ ນັກຂ່າວທີ່ມີຊື່ສຽງແລະເປັນຜູ້ຂຽນລາຍງານສົ່ງໃຫ້ໜັງສືພິມ the
Washington Post ວ່າ ຢູ່ໃສ. ພວກເຈົ້າໜ້າທີ່ອະວຸໂສກະຊວງການຕ່າງປະເທດ
ໄດ້ໂອ້ລົມກັບພະລາດຊະອານາຈັກຊາວດີອາຣາເບຍໂດຍທາງການທູດ ກ່ຽວກັບ
ເລື້ອງດັ່ງກ່າວ.”
ເຊີນຊົມ: ເທີກີ ຕ້ອງການຫຼັກຖານ
ຄວາມເຫັນຂອງທ່ານ ໄດ້ມີຂຶ້ນບໍ່ເທົ່າໃດຊົ່ວໂມງ ຫຼັງຈາກປະທານາທິບໍດີສະຫະລັດ
ທ່ານ ດໍໂນລ ທຣຳ ໄດ້ສະແດງອອກຊຶ່ງຄວາມເປັນຫ່ວງເປັນໃຍກ່ຽວກັບສະຖານະ
ການນີ້.
ທ່ານ ທຣຳ ໄດ້ບອກພວກນັກຂ່າວທີ່ທຳນຽບຂາວວ່າ “ດຽວນີ້ບໍ່ມີຜູ້ໃດຮູ້ຫຽັງກ່ຽວກັບ
ເລື້ອງນີ້. ຂ້າພະເຈົ້າບໍ່ມັກ.”
ໃນວັນຈັນວານນີ້ ເທີກີ ໄດ້ຮ້ອງຂໍໃຫ້ໄດ້ຮັບອະນຸຍາດກວດຄົ້ນສະຖານກົງສຸນ ຊາອຸດີ
ເພື່ອຊອກຫາຮ່ອງຮອຍ. ອົງມົງກຸດລາດກຸມມານຂອງຊາວດີອາຣາເບຍ ໂມຮາເມດ ບິນ
ຊາລມານ ໄດ້ກ່າວໃນສັບປະດາແລ້ວນີ້ວ່າ ຣີຢາດ “ພ້ອມແລ້ວທີ່ຈະຕ້ອນຮັບລັດຖະບານ
ຂອງເທີກີ ໃຫ້ຊອກຄົ້ນສະຖານທີ່ດັ່ງກ່າວ,” ເພາະວ່າ “ມັນບໍ່ມີຫຍັງຕ້ອງປິດບັງ”
ກ່ຽວກັບການຫາຍຕົວຂອງນັກຂ່າວທ່ານນີ້.
ແຕ່ວ່າ ມັນບໍ່ເປັນທີ່ແຈ້ງຂາວ ໃນທັນໃດ ທີ່ວ່າ ເຈົ້າໜ້າທີ່ເທີກີ ແມ່ນໄດ້ຮັບອະນຸຍາດ
ໃຫ້ເຂົ້າໄປຍັງສະຖານທີ່ກົງສຸນ ຫຼັງຈາກການຮ້ອງຮຽນໃນວັນຈັນວານນີ້. ເຈົ້າໜ້າທີ່ຊາວດີອາຣາເບຍ ກ່າວວ່າ ການກ່າວອ້າງຂອງພວກສືບສວນເທີກີ ວ່າ ທ່ານຄັສຊອກກີ
ໄດ້ຖືກສັງຫານນັ້ນ ແມ່ນ “ບໍ່ມີພື້ນຖານ.”
ອ່ານຂ່າວນີ້ເພີ້ມຕື່ມເປັນພາສາອັງກິດ
