ນາຍົກລັດຖະມຸນຕີເທີກີກ່າວວ່າ ພວກທີ່ໄປລົງປະຊາມະຕິດປະມານ 58% ໄດ້ເຫັນດີນໍາການປ່ຽນແປງຈໍານວນນຶ່ງໃນກົດໝາຍລັດຖະທໍາມະນູນທີ່ຂຽນຂຶ້ນ ຕັ້ງແຕ່ສະໄໝການປົກຄອງຂອງພວກທະຫານເມື່ອ 30 ປີ ຜ່ານມາແລ້ວນັ້ນ.
ນາຍົກລັດຖະມຸນຕີ Recep Tayyip Erdogan ໄດ້ປະ ກາດຜົນຂອງການລົງປະຊາມະຕິໃນວັນອາທິດວານນີ້ໃຫ້ຮູ້ ໃນເວລາພຽງບໍ່ເທົ່າໃດຊົ່ວໂມງ ຫລັງຈາກການລົງຄະແນນສຽງປິດລົງແລ້ວ. ທ່ານກ່າວຕໍ່ໄປວ່າ ປະຊາຊົນອອກໄປລົງຄະແນນສຽງ ໃນຈໍານວນເກືອບ 78%.
ໄດ້ມີການກໍ່ຄວາມຮຸນແຮງລົບກວນການລົງປະຊາມະຕິໃນຫລາຍຫົວເມືອງ. ພັກຂອງຊາວເຄີດຊຶ່ງເປັນພັກຝ່ານຄ້ານສໍາຄັນ ໄດ້ຮຽກຮ້ອງໄປຍັງຊາວເຄີດ ບໍ່ໃຫ້ອອກໄປປ່ອນບັດເພາະພັກດັ່ງກ່າວເວົ້າວ່າການປ່ຽນແປງຕ່າງໆເຫລົ່ານັ້ນ ບໍ່ແກ້ໄຂບັນຫາຂອງຊາວເຄີດເລີຍ. ຕໍາຫລວດໄດ້ຈັບກຸມປະຊາຊົນຫລາຍຄົນ ທີ່ພາກັນທໍາການ ປະທ້ວງຢ່າງຮຸນແຮງແລະການຂົ່ມຂູ່ຜູ້ໄປລົງຄະແນນສຽງໃນເມືອງ Mersin ທາງພາກໃຕ້ ຂອງເທີກີນັ້ນ.
ປະຊາຊົນເທີກີຈໍານວນ 49 ລ້ານຄົນໄດ້ລົງທະບຽນ ເຂົ້າປະກອບສ່ວນໃນການລົງປະຊາມະ ຕິໃນວັນອາທິດວານນີ້ ຊຶ່ງມີຂຶ້ນໃນວັນຄົບຮອບການກໍ່ລັດຖະປະຫານໂດຍພວກທະຫານໃນປີ 1980 ພໍດີ. ພວກໄປປ່ອນບັດ ມີສິດລົງຄະແນນສຽງໄດ້ພຽງແຕ່ສຽງດຽວວ່າ ເຫັນດີ ຫລືບໍ່ເຫັນດີ ນໍາການປະຕິຮູບລັດຖະທໍາມະນູນ 26 ຂໍ້ ທີ່ທາງລັດຖະບານເວົ້າວ່າ ຈະເຮັດໃຫ້ກົດໝາຍລັດຖະທໍາມະນູນຂອງຕົນ ສອດຄ່ອງກັບກົດໝາຍຂອງພວກປະເທດໃນສະຫະພາບ ຢູໂຣບ ຫລາຍຂຶ້ນນັ້ນ.
ມີການມອງເຫັນວ່າ ການປະຕິຮູບເຫລົ່ານີ້ມີຄວາມສໍາຄັນຕໍ່ຄວາມພະຍາຍາມຂອງເທີກີ ເພື່ອໃຫ້ໄດ້ເຂົ້າຮ່ວມໃນສະຫະພາບຢູໂຣບນັ້ນ.
