ປະຊາຊົນເທີກີທີ່ມີສິດລົງຄະແນນສຽງພາກັນອອກໄປປ່ອນບັດໃນວັນອາທິດມື້ນີ້ ໃນການລົງປະຊາມະຕິກ່ຽວກັບການປ່ຽນແປງກົດໝາຍລັດຖະທໍາມະນູນຂອງເຂົາເຈົ້າ ທີ່ຂຽນຂຶ້ນມາໄດ້ເກືອບ 30 ປີແລ້ວ ພາຍໃຕ້ການປົກຄອງຂອງທະຫານນັ້ນ. ການລົງປະຊາມະຕິດັ່ງກ່າວ ແມ່ນມີຂຶ້ນໃນວັນຄົບຮອບການກໍ່ລັດຖະປະຫານ ໂດຍພວກທະຫານໃນປີ 1980 ພໍດີ.
ປະຊາຊົນເທີກີຈະໄປລົງມະຕິວ່າ ເຫັນດີຫລືບໍ່ເຫັນດີນໍາ ຂໍ້ສະເໜີປະຕິຮູບກົດໝາຍລັດຖະທໍາມະນູນ 26 ຂໍ້. ລັດຖະ ບານກ່າວວ່າ ຂໍ້ແກ້ໄຂໃໝ່ເຫລົ່ານີ້ຈະເຮັດໃຫ້ລະບອບປະ ຊາທິປະໄຕແຂງແຮງຂຶ້ນ ແລະເຮັດໃຫ້ລັດຖະທໍາມະນູນ ຂອງເທີກີ ມີຄວາມຖືກຕ້ອງສອດຄ່ອງຫລາຍຂຶ້ນ ກັບກົດ ໝາຍໃນຢູໂຣບ. ການປະຕິຮູບທີ່ວ່ານີ້ແມ່ນເປັນກະແຈສໍາ ຄັນ ໃນຄວາມພະຍາຍາມຂອງເທີກີ ທີ່ຢາກເຂົ້າຮ່ວມເປັນສະມາຊິກຂອງສະຫະພາບຢູໂຣບນັ້ນ.
ຂໍ້ສະເໜີທີ່ເປັນບັນຫາຂັດແຍ້ງກັນຫລາຍທີ່ສຸດ ແມ່ນຮວມທັງຂໍ້ດັດແປງແກ້ໄຂທີ່ຈະປ່ຽນແປງໂຄງສ້າງຂອງສານລັດຖະທໍາມະນູນ ແລະສະພາປົກຄອງສູງສຸດຂອງພວກພິພາກສາ ແລະພວກໄອຍະການ ຊຶ່ງພວກຕໍາໜິຕິຕຽນກ່າວວ່າ ການປ່ຽນແປງໃໝ່ຈະມີຜົນກະທົບຕໍ່ສິດອໍາ ນາດຂອງ ຝ່າຍຕຸລາການນັ້ນ.
ພາຍໃຕ້ມາດຕານຶ່ງອີກ ພວກຜູ້ນໍາທະຫານທີ່ຮັບຜິດຊອບໃນການກໍ່ລັດຖະປະຫານຂຶ້ນ ໃນປີ 1980 ນັ້ນ ກໍຈະບໍ່ໄດ້ຮັບສິດຍົກເວັ້ນພິເສດອີກຈາກການດໍາເນີນຄະດີ ແລະມາດຕະການອື່ນໆແມ່ນເພີ່ມສິດທິໃຫ້ ພວກເສຍອົງຄະ.
