ສະວີເດັນ ໄດ້ກ້າວເຂົ້າໃກ້ໃນການເປັນສະມາຊິກຂອງອົງການ NATO ໃນວັນຈັນວານນີ້ ເມື່ອປະທານາທິບໍດີຂອງເທີກີ ທ່ານຣີເຊັບ ຕາຍຢິບ ເອີດວານ (Recep Tayyip Erdogan) ໄດ້ຍື່ນຮ່າງກົດໝາຍຕໍ່ລັດຖະສະພາ ເພື່ອຂໍການອະນຸມັດໃຫ້ແກ່ປະເທດ ນໍດິກ ເຂົ້າຮ່ວມເປັນພັນທະມິດທາງທະຫານ.
ສໍາລັບ 31 ປະເທດສະມາຊິກອື່ນໆຂອງອົງການ NATO ໄດ້ໃຫ້ການອະນຸມັດ ການເຂົ້າເປັນສະມາຊິກຂອງ ສະວີເດັນ ແລ້ວ, ເຮັດໃຫ້ ເທີກີ ແລະ ຮັງກາຣີ ເປັນປະເທດສຸດທ້າຍທີ່ຍັງບໍ່ໄດ້ເຮັດເທື່ອ.
ທ່ານເອີດວານ ໄດ້ໃຫ້ຄຳໝັ້ນສັນຍາກັບບັນດາປະເທດພັນທະມິດອົງການ NATO ຂອງທ່ານວ່າ ທ່ານຈະນຳໃຊ້ຮ່າງກົດໝາຍຢືນຢັນການເຂົ້າເປັນສະມາຊິກຂອງ ສະວີເດັນ ເມື່ອສະພາແຫ່ງຊາດເປີດຄືນໃໝ່ ໃນວັນທີ 1 ຕຸລານີ້ ແລະຮ່າງກົດໝາຍດັ່ງກ່າວ ກໍໄດ້ຖືກຍື່ນໄປໃນວັນຈັນວານນີ້.
ໃນກ່ອນໜ້ານັ້ນ, ເທີກີ ໄດ້ອ້າງເຖິງຂໍ້ກ່າວຫາ ກ່ຽວກັບວ່າ ສະວີເດັນ ໄດ້ໃຫ້ທີ່ພັກພິງແກ່ພວກກໍ່ການຮ້າຍ ມາເປັນເຫດຜົນທີ່ເຮັດໃຫ້ຫຼ້າຊ້າ. ອັງກາຣາ ກ່າວວ່າ ສະຕັອກໂຮມ ຈໍາເປັນຕ້ອງໄດ້ໃຊ້ມາດຕະການທີ່ຮຸນແຮງຫຼາຍຂຶ້ນເພື່ອປາບປາມພັກແຮງງານຊາວເຄີດ, ຫຼື ທະຫານບ້ານ PKK, ກ່ອນທີ່ສະມາຊິກຂອງສະວີເດັນຈະຂໍການຢືນຢັນ.
ກຸ່ມ PKK ຖືວ່າ ເປັນອົງການກໍ່ການຮ້າຍໂດຍ ເທີກີ, ສະຫະລັດ ແລະສະຫະພາບຢູໂຣບ.
ການຕັດສິນໃຈຂອງ ເທີກີ ແມ່ນໄດ້ຮັບການຕ້ອນຮັບໂດຍອົງການ NATO ພ້ອມດ້ວຍ ສະວີເດັນ, ເຊິ່ງທັງສອງໄດ້ອອກຖະແຫຼງການຍ້ອງຍໍ ທ່ານເອີດວານ.
