ເຈົ້າໜ້າທີ່ເທີກີກ່າວວ່າ 19 ຄົນຖືກຂ້າຕາຍໃນການສູ້ລົບກັນຕະຫຼອດຄືນ ລະຫວ່າງທະຫານເທີກີ ແລະພວກກະບົດຊາວເຄິດ ຢູໃກ້ເຂດຊາຍແດນຕິດກັບອີຣັກ ທາງພາກຕາເວັນອອກສຽງໃຕ້ຂອງເທີກີ ນັ້ນ.
ເຈົ້າໜ້າທີ່ກ່າວອີກວ່າ ທະຫານຫົກຄົນ ທະຫານບ້ານລັດສອງຄົນ ແລະພວກກະບົດຫົວຮຸນແຮງຊາວເຄິດ 11 ຄົນຖືກຂ້າຕາຍ ແລະຢ່າງໜ້ອຍມີທະຫານ 15 ຄົນໄດ້ຮັບບາດເຈັບໃນການໂຈມຕີຂອງພວກກະບົດໃນແຂວງ Hakkari.
ການປະທະກັນລະຫວ່າງທະຫານຂອງລັດຖະບານແລະພວກກະບົດແມ່ນໜັກໜ່ວງຫຼາຍຂຶ້ນໃນໄລຍະບໍ່ເທົ່າໃດອາທິດຜ່ານມາ ເວລາເທີກີເປີດສາກ ການປະຕິບັດການທາງພາກພື້ນດິນແລະທາງອາກາດບັ້ນໃຫຍ່ ເພື່ອກວດລ້າງພວກກະບົດ.
ມີປະຊາຊົນຫຼາຍກວ່າ 40,000 ຄົນ ຖືກຂ້າຕາຍ ສ່ວນໃຫຍ່ແມ່ນຊາວເຄິດ ນັບຕັ້ງແຕ່ພັກຄົນງານຊາວເຄີດ Kurdistan Workers ຫຼື PKK ລຸກຂຶ້ນມາຖືອາວຸດ ຕໍ່ສູ້ກັບຝ່າຍລັດຖະບານ ໃນປີ 1984 ເພື່ອທວງໃຫ້ແຍກດິນແດນເປັນລັດ Kurdish ຕ່າງຫາກນັ້ນ.