ອົງການຂ່າວຂອງລັດຖະບານເຕີກີ ກ່າວວ່າ ພວກກຸ່ມກະບົດເຄີດໄດ້ ຂ້າທະຫານເຕີກີຄົນນຶ່ງ ແລະອີກຄົນນຶ່ງບາດເຈັບ ໃນການໂຈມຕີຄ້າຍປະຕິບັດ ການທະຫານແຫ່ງນຶ່ງໃນເຂດຕາເວັນອອກຂອງປະເທດ.
ອົງການຂ່າວ Anatolia ກ່າວໃນວັນອາທິດມື້ນີ້ວ່າ ການໂຈມຕີໃກ້ເມືອງ ປາລູ ໃນພາກຕາເວັນອອກສຽງໃຕ້ຂອງແຂວງອີລາຊິກນັ້ນ ຍັງຜົນໃຫ້ທະຫານ ເຕີກີເສຍຊີວິດເພີ່ມຂື້ນເປັນຈຳນວນ 12 ຄົນໃນການໂຈມຕີສອງມື້ຜ່ານມາ.
ເຮືອບິນທະຫານຂອງເຕີກີ ໄດ້ທຳການໂຈມຕີທາງອາກາດ ຕໍ່ທີ່ໝັ້ນ ຫລາຍແຫ່ງຂອງພວກຕ້ອງສົງໃສວ່າ ເປັນກຸ່ມກະບົດຊາວເຄີດ ທີ່ຕັ້ງຢູ່ທາງໃນເຂດ ພາກເໜືອຂອງອີຣັກໃນວັນເສົາວານນີ້ ຫລັງຈາກມີການ ປະທະກັນຫລາຍໆບັ້ນ ລະວ່າງພວກທະຫານເຕີກີ ແລະພວກຫົວຮຸນແຮງທີ່ໄດ້ຍັງຜົນໃຫ້ມີ ຜູ້ເສຍຊີວິດ ຢ່າງໜ້ອຍ 23 ຄົນ. ອົງການຂ່າວຝລັ່ງລາຍງານວ່າກຳລັງທະຫານຂອງເຕີກີ ໄດ້ເຂົ້າໄປໃນເຂດພາກເໜືອຂອງອີຣັກໃນຄ່ຳຄືນຜ່ານມານີ້ ຂ້າມຊາຍແດນເຂົ້າໄປສິບກິໂລເມດ ເພື່ອຊອກຫາກຸ່ມຫົວຮຸນແຮງຊາວເຄີດນັ້ນ.
