ລິ້ງ ສຳຫລັບເຂົ້າຫາ

ເທີກີ ຊ່ອຍຜູ້ລອດຊີວິດ ອີກຄົນນຶ່ງ ອອກມາຈາກ ຊາກຫັກພັງ

  • ໄພສານ ວໍຣະຈັກ

ທ້າວ Ferhat Tokay ອາຍຸ 13 ປີ ທີ່ຖືກພວກກູ້ໄພຊ່ອຍອອກມາ ຈາກຊາກຫັກພັງຢູ່ເມືອງ Erics (28 ຕຸລາ 2011)

ພວກກູ້ໄພ Turkey ໄດ້ຊ່ອຍເດັກຊາຍໄວລຸ້ນຄົນນຶ່ງອອກມາຈາກຊາກຫັກພັງໃນວັນສຸກມື້ນີ້
100 ກວ່າຊົ່ວໂມງລຸນຫຼັງທີ່ໄດ້ເກີດແຜ່ນດິນໄຫວຂະໜາດແຮງ 7.2 ຊຶ່ງໄດ້ສ້າງຄວາມເສຍ
ຫາຍໃຫ້ແກ່ບໍລິເວນສ່ວນໃຫຍ່ໃນເຂດພາກຕາເວັນອອກສຽງໃຕ້ຂອງປະເທດໃນມື້ວັນອາທິດ
ຜ່ານມາ.

ພວກເຂົາເຈົ້າໄດ້ພົບເຫັນເດັກຊາຍຄົນນີ້ບໍ່ເທົ່າໃດຊົ່ວໂມງ ຫຼັງຈາກໄດ້ພົບເຫັນເດັກຊາຍອີກ
ຄົນນຶ່ງທີ່ເມືອງ Erics ໃນມື້ວັນພະຫັດວານນີ້ ແຕ່ຄວາມຫວັງໃນການທີ່ຈະພົບເຫັນຜູ້ລອດ
ຊີວິດມາໄດ້ຕື່ມອີກນັ້ນ ພວມຄ່ອຍໆໝົດໄປ ຂະນະທີ່ສະພາບອາກາດໜາວ ແລະຫິມະຕົກ ໄດ້ເປັນອຸບປະສັກຂັດຂວາງຕໍ່ການປະຕິບັດງານກູ້ໄພ ຢູ່ທີ່ເມືອງ Erics ຊຶ່ງເປັນເມືອງທີ່ໄດ້
ຮັບຄວາມເສຍຫາຍຮ້າຍແຮງສຸດຕະຫຼອດທັງຫົວເມືອງແລະໝູ່ບ້ານອື່ນໆຢູ່ໃນຂົງເຂດ.

ເຈົ້າໜ້າທີ່ໄດ້ເລັ່ງລັດຈັດຫາບ່ອນພັກພາອາໄສໃຫ້ແກ່ຜູ້ປະສົບໄພແຜ່ນດິນໄຫວຈຳນວນຫຼາຍ
ພັນຄົນ. ໃນຕອນເຊົ້າຂອງວັນສຸກມື້ນີ້ເຈົ້າໜ້າທີ່ເວົ້າວ່າ ຈຳນວນຜູ້ເສຍຊີວິດໄດ້ເພີ່ມຂຶ້ນເປັນ
570 ຄົນແລະຜູ້ໄດ້ຮັບບາດເຈັບກໍເພີ່ມຂຶ້ນເປັນບໍ່ຕໍ່າກວ່າ 2,500 ຄົນ. ພວກເຈົ້າໜ້າທີ່ຄາດ
ວ່າໂຕເລກຜູ້ເສຍຊີວິດ ຍັງຈະສືບຕໍ່ມີຈຳນວນສູງຂຶ້ນ ຂະນະທີ່ມີການພົບເຫັນຊາກສົບຢູ່ຕາມ
ຊາກຫັກພັງເພີ່ມຕື່ມ.

ສະຫະພັນສະພາກາແດງນາໆຊາດກ່າວວ່າສະພາກາແດງຂອງ Turkey ກຳລັງດຳເນີນງານ ເພື່ອໃຫ້ຄວາມຊ່ອຍເຫຼືອແກ່ພວກທີ່ລອດຊີວິດມາໄດ້ ແລະໄດ້ແຈກຢາຍຕູບຜ້າຕັ້ງຫຼາຍກວ່າ
7,500 ອັນແລະຜ້າຫົ່ມ 22,000 ຜືນຕະຫຼອດທັງເຕົາຫູງຕົ້ມ ອາຫານແລະນໍ້າສະອາດນຳ
ດ້ວຍ.

ພວກທີ່ບໍ່ມີບ່ອນພັກພາອາໄສຈຳນວນນຶ່ງພາກັນຈົ່ມທຸກວ່າ ລັດຖະບານບໍ່ໄດ້ດຳເນີນການໄວ
ພຽງພໍໃນການແຈກຢາຍຄວາມຊ່ອຍເຫຼືອ. ເຖິງແມ່ນໄດ້ມີການເຂົ້າແຖວລໍຖ້າເປັນເວລາຫຼາຍ
ຊົ່ວໂມງກໍຕາມບາງຄົນກໍຍັງບໍ່ໄດ້ຮັບຕູບຜ້າຕັ້ງຫຼືບ່ອນພັກພາອາໄສເລີຍ. ຜູ້ຄົນຈຳນວນນຶ່ງ
ໄດ້ຖືກບັງຄັບໃຫ້ນອນຢູ່ກາງແຈ້ງດ້ວຍການຕຸ້ມຜ້າຫົ່ມໃກ້ໆກັບກອງໄຟ.

ມີລາຍງານວ່າ ບາງຄົນໄດ້ຮັບຕູບຜ້າຕັ້ງພິເສດ ເກີນກວ່າຄວາມຕ້ອງການແລ້ວກໍນຳໄປຂາຍ
ເອົາກຳໄລຂະນະທີ່ອົງການກາແດງຂອງ Turkey ກ່າວວ່າລົດບັນທຸກປັດໄຈບັນເທົາທຸກຂອງ
ຕົນ 17 ຄົນໄດ້ຖືກປຸ້ນເອົາເຄື່ອງໃນມື້ວັນພຸດຜ່ານມານີ້.

XS
SM
MD
LG