ພວກຊ່ອຍກູ້ໄພໃນພາກຕາເວັນອອກສຽງໃຕ້ຂອງເທີກີກໍາລັງສືບຕໍ່ຊອກ ຄົ້ນຫາພວກທີ່ອາດລອດຊີວິດມາໄດ້ ຈາກໄພແຜ່ນໄຫວ ທີ່ສ້າງຄວາມເສຍຫາຍຢ່າງຮ້າຍແຮງໃນວັນອາທິດຜ່ານມານີ້ ທີ່ໄດ້ເອົາຊີວິດຜູ້ຄົນໄປແລ້ວຢ່າງໜ້ອຍ 459 ຄົນແລະບາດເຈັບຕື່ມອີກ 1300 ຄົນນັ້ນ.
ໃນເຊົ້າວັນພຸດມື້ນີ້ ພວກພະນັກງານກູ້ໄພ ໄດ້ຊ່ອຍກູ້ຊີວິດແມ່ຍິງໄວ 27 ປີຄົນນຶ່ງອອກມາຈາກຊາກຫັກພັງ ຂອງຕຶກອາຄານຫລັງນຶ່ງທີ່ຫັກພັງລົງ. ເຖິງຢ່າງໃດກໍດີ ທາງການເທີກີກ່າວວ່າ ຄວາມຫວັງທີ່ຈະພົບເຫັນຜູ້ທີ່ອາດລອດຊີວິດມາໄດ້ຕື່ມນັ້ນ ແມ່ນພວມໝົດໄປ ຊຶ່ງຍັງມີປະຊາຊົນຕື່ມ ອີກຫລາຍຮ້ອຍ ຫລືຫລາຍພັນຄົນຍັງຄົງຄ້າງຢູ້ກ້ອງຊາກຫັກພັງຂອງ ພວກຕຶກອາຄານນັ້ນ.
ແຜ່ນດິນໄຫວທີ່ມີຄວາມແຮງ 7.2 ຣິກເຕີໃນວັນອາທິດຜ່ານມານີ້ ໄດ້ເຮັດໃຫ້ປະຊາຊົນຫລາຍພັນຄົນຂາດທີ່ພັກພາອາໄສ.
ກອງທັບອິສຣາແອລ ໄດ້ຕອບສະໜອງຕໍ່ຄໍາຮຽກຮ້ອງຈາກທາງການເທີກີເພື່ອຂໍການຊ່ອຍເຫລືອນັ້ນດ້ວຍການໃຫ້ຄໍາໝັ້ນສັນຍາທີ່ຈະສົ່ງເຄື່ອງອຸບປະກອນພິເສດ ຮວມທັງເຄື່ອງສຳລັບປຸກບ່ອນພັກພາອາໄສສຸກເສິນໄປໃຫ້ເທີກີ ໃນເວລາໄວທີ່ສຸດທີ່ຈະເປັນໄປໄດ້. ກ່ອນໜ້ານີ້ ເທີກີໄດ້ປະຕິເສດຕໍ່ການສະເໜີໃຫ້ການຊ່ອຍເຫລືອຈາກອິສຣາແອລ ສໍາລັບຊ່ອຍເຫລືອພວກປະຊາຊົນທີ່ເຮືອນຊານຂອງເຂົາເຈົ້າໄດ້ຮັບຄວາມເສຍຫາຍຈາກແຜ່ນດິນໄຫວນັ້ນ.
ມີເກືອບ 90 ປະເທດສະເໜີໃຫ້ການຊ່ອຍເຫລືອ ແຕ່ທໍາອິດນັ້ນ ເທີກີ ພຽງແຕ່ຮັບເອົາການຊ່ອຍເຫລືອຈາກອີຣ່ານແລະ Azerbaijan ຊຶ່ງມີ ຊາຍແດນຕິດກັບຂົງເຂດທີ່ເກີດໄພແຜ່ນດິນໄຫວນັ້ນ.
ບັນດາເຈົ້າໜ້າທີ່ກ່າວວ່າ ແຜ່ນດິນໄຫວໃກ້ກັບຊາຍແດນຕິດກັບອີຣ່ານ ໄດ້ຮັບຄວາມເສຍຫາຍຫລາຍກວ່າໝູ່ໃນເມືອງ Ercis 90 ຫລັກກິໂລແມັດໄປທາງທິດເໜືອຂອງເມືອງ Van ຊຶ່ງໄດ້ເຮັດໃຫ້ໄຟຟ້າມອດ ແລະນໍ້າປະປາບໍ່ມີໃຊ້ໃນຫລາຍເຂດ.
ແຜ່ນດິນໄຫວຂະໜາດນ້ອຍທີ່ຕິດຕາມມາຫລາຍຮ້ອຍຄັ້ງ ໄດ້ສັ່ນສະເທືອນຂົງເຂດມາຕັ້ງແຕ່ເກີດແຜ່ນດິນໄຫວຄັ້ງທໍາອິດ ຮວມທັງແຜ່ນດິນໄຫວຄັ້ງນຶ່ງທີ່ມີຄວາມແຮງພໍປານກາງ ເກີດຂຶ້ນໃນວັນອັງຄານວານນີ້ ຊຶ່ງວັດແທກໄດ້ 5.4 ຣິກເຕີ ທີ່ໄດ້ເຮັດໃຫ້ປະຊາຊົນພາກັນແຕກໄປຢູ່ຕາມຖະໜົນຫົນທາງສາຍຕ່າງໆນັ້ນ.
ພວກນັກໂທດທີ່ມີຈິດໃຈບໍ່ສະບາຍຈາກແຜ່ນດິນໄຫວທີ່ຕິດຕາມມານີ້ ພາກັນສ້າງຄວາມວຸ້ນວາຍຂຶ້ນ ແລະເລີ້ມເອົາໄຟຈູດເຜົາຄຸກແຫ່ງນຶ່ງ ໃນເມືອງ Van ຊຶ່ງພວກນັກໂທດເຫລົ່ານີ້ຢາກໃຫ້ມີການອົບພະຍົບເຂົາເຈົ້າອອກຈາກຄຸກ ແຕ່ພວກກໍາລັງຮັກສາຄວາມປອດໄພປິດລ້ອມຄຸກໄວ້ເພື່ອຮັກສາບໍ່ໃຫ້ພວກນັກໂທດເຫລົ່ານີ້ຫລົບໜີໄປ.
