ກອງກຳລັງ ເທີກີ ໄດ້ຍິງເຮືອບິນລົບຂອງ ຊີເຣຍ ຕົກໃນແຂວງ ອິດລິບ ຂອງ ຊີເຣຍ ໃນວັນອັງຄານວານນີ້, ໃນການຂະຫຍາຍການໂຈມຕີຂອງກອງທັບ ເທີກີ ຕໍ່ກອງກຳລັງລັດຖະບານ ຊີເຣຍ. ການໂຈມຕີຂອງລັດຖະບານ ອັງກາຣາ ແມ່ນການແກ້ແຄ້ນສຳລັບການສັງຫານກອງທະຫານ ເທີກີ 34 ຄົນໃນການໂຈມຕີທາງອາກາດທີ່ໄດ້ຖິ້ມໂທດໃສ່ລັດຖະບານ ດາມາສກັສ ຂອງ ຊີເຣຍ.
ການຕໍ່ສູ້ດັ່ງກ່າວໄດ້ເພີ່ມໄພຂົ່ມຂູ່ ກ່ຽວກັບ ການປະເຊີນໜ້າກັນລະຫວ່າງກອງກຳລັງ ເທີກີ ກັບ ຣັດເຊຍ, ເປັນອັນຕະລາຍທີ່ປະທານາທິບໍດີ ຣັດເຊຍ ແລະ ເທີກີ ຈະພະຍາຍາມຫຼີກລ່ຽງ ເມື່ອພວກເພິ່ນພົບຈະພົບປະກັນໃນວັນພະຫັດນີ້. ຣັດເຊຍ ໃຫ້ການໜູນຫຼັງການໂຈມຕີຂອງລັດຖະບານ ຊີເຣຍ ໃກ້ກັບເຂດຊາຍແດນ ເທີກີ.
ການຕໍ່ສູ້ທາງທະຫານຂອງ ເທີກີ ໄດ້ສະແດງໃຫ້ເຫັນສັນຍານການບັນເທົາລົງພຽງເລັກນ້ອຍເທົ່ານັ້ນ, ໂດຍເຮືອບິນລົບ ຊີເຣຍ ລຳທີສາມໄດ້ຖືກຍິງຕົກໂດຍກອງທັບອາກາດ ເທີກີ ນັບຕັ້ງແຕ່ວັນອາທິດທີ່ຜ່ານມາ. ກະຊວງປ້ອງກັນປະເທດ ເທີກີ ໄດ້ກ່າວໃນວັນອັງຄານວານນີ້ວ່າ ໃນ 24 ຊົ່ວໂມງທີ່ຜ່ານມາ, ທະຫານ ຊີເຣຍ ຫຼາຍກວ່າ 300 ຄົນໄດ້ຖືກຂ້າຕາຍ ແລະ ລົດຖັງຫຼາຍກວ່າສິບຄັນ, ລົດຫຸ້ມເກາະ ແລະ ລະບົບລູກສອງໄຟຂີປະນາວຸດຕ່າງໆໄດ້ຖືກທຳລາຍ.
ການໂຈມຕີຂອງ ເທີກີ ແມ່ນໄດ້ສຸມໃສ່ແຂວງ ອິດລິບ, ເຊິ່ງແມ່ນຖານທີ່ໝັ້ນແຫ່ງສຸດທ້າຍຂອງພວກຕໍ່ຕ້ານລັດຖະບານ, ເຊິ່ງກອງກຳລັງ ຊີເຣຍ ທີ່ໄດ້ຮັບການໜູນຫຼັງໂດຍກຳລັງທາງອາກາດ ຣັດເຊຍ ນັ້ນ, ໄດ້ຕໍ່ສູ້ເພື່ອຍຶດຄອງ. ການໂຈມຕີທີ່ກຳລັງດຳເນີນຢູ່ຂອງລັດຖະບານ ອັງກາຣາ ແມ່ນຄາດວ່າຈະດຳເນີນຕໍ່ໄປຢ່າງໜ້ອຍຈົນຮອດວັນພະຫັດນີ້, ເມື່ອປະທານາທິບໍດີ ເທີກີ ທ່ານ ຣີເຊັບ ໄຕຢິບ ເອີດູອານ ຈະພົບປະກັບຄູ່ຮ່ວມຕຳແໜ່ງ ຣັດເຊຍ ທ່ານ ວລາດິເມຍ ປູຕິນ ໃນນະຄອນຫຼວງ ມົສກູ.
