ກອງທັບຂອງ ເທີກີ ໄດ້ກ່າວໃນວັນອັງຄານມື້ນີ້ວ່າ ເຮືອບິນລົບໄດ້ທຳ ການໂຈມຕີທາງອາກາດໃສ່ເປົ້າໝາຍພວກກະບົດຊາວ ເຄີດ 17 ແຫ່ງ ໃນພາກຕາເວັນອອກສຽງໃຕ້ຂອງ ເທີກີ.
ຖະແຫຼງການສະບັບໜຶ່ງໄດ້ກ່າວວ່າ ການໂຈມຕີນີ້ໄດ້ແນໃສ່ພັກກຳມະ ກອນຊາວ ເຄີດ ຫຼື PKK ໃນແຂວງ Hakkari, ເຊິ່ງມີຊາຍແດນຕິດ ກັບປະເທດ ອິຣັກ ແລະ ອິຣ່ານ.
ການໂຈມຕີທາງອາກາດ ມີຂຶ້ນຫລັງຈາກການໂຈມຕີຮ້າຍແຮງຫຼາຍຄັ້ງໃນວັນຈັນວານນີ້ ທີ່ເຮັດໃຫ້ເຈົ້າໜ້າທີ່ຕຳຫຼວດສີ່ຄົນ ແລະ ທະຫານຄົນໜຶ່ງເສຍຊີວິດໃນແຂວງ Sirnak ທີ່ຢູ່ໃກ້ຄຽງ. ໃນຄືນແລ້ວ, ພວກກະບົດຊາວ ເຄີດ ກໍໄດ້ໂຈມຕີຄ້າຍທະຫານໃນແຂວງ Sirnak, ເຮັດໃຫ້ທະຫານຄົນໜຶ່ງເສຍຊີວິດ.
ເທີກີ ໄດ້ຖິ້ມລະເບີດໃສ່ເປົ້າໝາຍພວກ PKK ໃນພາກຕາເວັນອອກ ສຽງໃຕ້ຂອງ ເທີກີ ແລະ ພາກເໜືອຂອງ ອິຣັກ ຕັ້ງແຕ່ທ້າຍເດືອນ ກໍລະກົດ ຫຼັງຈາກໄດ້ປະກາດການໂຈມຕີຕໍ່ຕ້ານການກໍ່ການຮ້າຍໃໝ່. ທະຫານ ເທີກີ ຍັງໄດ້ແນເປົ້າໃສ່ພວກຫົວຮຸນແຮງລັດອິສລາມ ຢູ່ຕາມເຂດຊາຍແດນໃນ ຊີເຣຍ.
ສະຫະລັດ ແລະ ຢູໂຣບ ໄດ້ຮຽກຮ້ອງ ເທີກີ ເມື່ອສັບປະດາທີ່ຜ່ານມາ ໃຊ້ຄວາມຍັບຢັ້ງການຖິ້ມລະເບີດໃສ່ຊາວ ເຄີດ, ໂດຍກ່າວວ່າ ປະເທດດັ່ງກ່າວມີສິດໃນການປົກປ້ອງກັນ ຕົນເອງ ແຕ່ວ່າການຕອບໂຕ້ຄວນຈະ “ສົມນ້ຳສົມເນື້ອ.”
ກະຊວງການຕ່າງປະເທດ ສະຫະລັດ ໄດ້ກ່າວວ່າພວກ PKK ຄວນຍົກເລີກການກໍ່ຄວາມຮຸນແຮງ ແລະ ຄວນເປີດການເຈລະຈາກັບ ເທີກີ.
ພວກ PKK ໄດ້ຕໍ່ສູ້ກັບ ເທີກີ ຕັ້ງແຕ່ປີ 1984 ເປັນຕົ້ນມາໃນການປະທະກັນທີ່ເຮັດໃຫ້ 40,000 ຄົນເສຍຊີວິດໄປແລ້ວ.
