ຫຼາຍສິບຄົນ ເສຍຊີວິດ ໃນເຫດວາງລະເບີດ ຢູ່ Turkey (ວີດິໂອ)

ຮອງ​ນາຍົກລັດຖະມົນຕີ​ເທີ​ກີ​ເວົ້າ​ວ່າ ມີ​ເກົ້າຄົນ​ຖືກ​ກັກ​ໂຕໄວ້​ ​ໃນ​ຖານ​ສົງ​ໄສວ່າ ​ເປັນຜູ້​ວາງ​ລະ​ເບີດ​ລົດ​ສອງ​ບັ້ນ​ຕິດ​ກັນ​ເມື່ອ​ວັນ​ເສົາ​ວານ​ນີ້ ທີ່​ໄດ້​ສັງຫານ ຢ່າງ​ໜ້ອຍ 43 ຄົນນັ້ນ.

ຮອງ​ນາຍົກລັດຖະມົນຕີ Besir Atalay ບອກ​ພວກ​ນັກ​ຂ່າວ
​ໃນ​ວັນ​ອາທິດ​ມື້​ນີ້​ວ່າ ທັງ​ເກົ້າ ຄົນ​ດັ່ງກ່າວ​ກໍາລັງ​ຖືກ​ສອບ
​ປາກ​ຄໍາ​ ກ່ຽວ​ກັບ​ເຫດການໂຈມ​ຕີດັ່ງກ່າວ ແລະ​ວ່າ​ບາງ​ຄົນ​ໄດ້ສາລະພາບ​. ອົງການ​ຂ່າວຣອຍ​ເຕີ​ເວົ້າ​ວ່າ ທັງ​ເກົ້າຄົນ​ທີ່​ວ່າ​ນັ້ນ​ເປັນ​ຊາວ​ເທີ​ກີ​ທັງ​ໝົດ.

​ໃນ​ຕອນ​ເຊົ້າຂອງ​ວັນ​ອາທິດ​ມື້​ນີ້ ລັດຖະມົນຕີ​ກະຊວງ​ຖະ​ແຫຼງ
ຂ່າວ​ຊີ​ເຣຍ​ ເ​ວົ້າວ່າ ດາ​ມັສກັສບໍ່​ໄດ້​ກໍ່​ເຫດ​ລະ​ເບີດໃນ​ວັນ​ເສົາ​ວານ​ນີ້ ທີ່​ໄດ້​ສັງຫານຫຼາຍ ສິບຄົນ ​ແລະເຮັດໃຫ້ບາດເຈັບ​ອີກຫຼາຍກວ່າ 100 ຄົນ​ ຢູ່​ເມືອງ Reyhani ຂອງ​ເທີ​ກີ ທີ່ ຢູ່​ໃກ້​ຊາຍ​ແດນ​ຕິດ​ກັບ​ຊີ​ເຣຍນັ້ນ.

ທ່ານ Omran al-Zoubi ກ່າວ​ໃນ​ການປະຊຸມຖະ​ແຫຼງ​ຂ່າວວ່າ ບໍ່​ມີ​ໃຜ​ທີ່ຈະ​ມີສິດ​ທໍາ​ການ​ກ່າວຫາ​ທີ່​ບໍ່​ເປັນຄວາມ​ຈິງ ​ແລະ​ທ່ານກ່າວ​ອອກ​ມາກົງໆ ວ່າ ​ການວາງລະ​ເບີດ​ດັ່ງກ່າວ ​ບໍ່​ແມ່ນ​ຝີ​ມື​ຂອງ​ລັດຖະບານ​ຊີ​ເຣຍ.

​ເມື່ອ​ວັນ​ເສົາ​ວານ​ນີ້ ທ່ານ Ahmet Davutoglu ລັດຖະມົນຕີ​ຕ່າງປະ​ເທດເທີ​ກີ ​ໄດ້​ຖິ້ມ​
ໂທດການ​ວາງລະ​ເບີດ​ຢູ່​ໃນ​ແຂວງ Hatay ນັ້ນ​ ໃສ່​ຊີ​ເຣຍ ​ແລະ​ເວົ້າ​ວ່າ ​ເທີ​ກີມີ​ສິດ​ທີ່​ຈະ​
ເອົາ​ມາດ​ຕະການ​ທຸກ​ຢ່າງເພື່ອ​ຕອບ​ໂຕ້​ຄືນ.

ບໍ່​ມີ​ຝ່າຍ​ໃດ​ອ້າງ​ເອົາ​ຄວາມ​ຮັບຜິດຊອບ​ ຕໍ່​ເຫດການ​ວາງລະ​ເບີດ​ດັ່ງກ່າວ ​ແຕ່​ທ່ານ Bulent Arinsaid ຮອງ​ນາ​ຍົກ​ລັດຖະມົນຕີ​ເທີ​ກີ ​ກ່າວ​ວ່າ ​ລັດຖະບານ​ຂອງ​ປະທານາທິ
ບໍດີ​ຊີ​ເຣຍ ທ່ານ Bashar al-Assad ເປັນ​ຜູ້ຕ້ອງ​ສົງໄສ​ຕາມ​ເຄີຍ.