ບັນດາເຈົ້າໜ້າທີ່ເລືອກຕັ້ງທີ່ຕູນີເຊຍ ກຳລັງນັບບັດຄະແນນສຽງ
ໃນວັນຈັນມື້ນີ້ ຫຼັງຈາກການປ່ອນບັດທີ່ສຳຄັນ ເພື່ອເລືອກຕັ້ງເອົາ
ສະມາຊິກສະພາແຫ່ງຊາດຄັ້ງທຳອິດ ນັບແຕ່ຮັບຜ່ານລັດຖະທຳ
ມະນູນສະບັບໃໝ່ໃນເດືອນມັງກອນປີນີ້ເປັນຕົ້ນມາ.
ຜົນຂັ້ນຕົ້ນຂອງການເລືອກຕັ້ງ ອາດສາມາດປະກາດໃຫ້ຮູ້ຈັກໃນ
ແລງວັນຈັນມື້ນີ້ກໍເປັນໄດ້ ຊຶ່ງການນັບບັດເລືອກຕັ້ງຂັ້ນສຸດທ້າຍ
ກຳນົດຈະປະກາດໃຫ້ຊາບໃນວັນພະຫັດສັບປະດານີ້.
ກ່ອນການປ່ອນບັດນັ້ນ ເປັນທີ່ຄາດກັນວ່າ ພັກ Ennahda ຫົວ
ອິສລາມພໍປານກາງ ແລະພັກສາສະໜາຊັ້ນນຳ Nidaa Tounes
ຈະຊະນະບ່ອນນັ່ງຫຼາຍກວ່າໝູ່ຢູ່ໃນສະພາ ທີ່ມີສະມາຊິກທັງໝົດ 217 ຄົນ ນັ້ນ.
ທ່ານ Beji Caid Essebsi ຜູ້ນຳພັກ Nidaa Tounes ກ່າວວ່າ ພັກຂອງທ່ານໄດ້ເຫັນ “ຮ່ອງຮອຍຕ່າງໆໃນທາງບວກ” ທີ່ສະແດງວ່າ ອາດສາມາດມີສຽງນຳໜ້າໄດ້ ຫຼັງຈາກ
ໜ່ວຍປ່ອນບັດອັດລົງແລ້ວ ໃນວັນອາທິດວານນີ້.
ຫລັງມື້ການເລືອກຕັ້ງ ຢູ່ຕູນີເຊຍ, ວັນທີ 27 ຕຸລາ 2014
ມີພັກການເມືອງປະມານ 90 ພັກແຂ່ງຂັນກັນໃນການເລືອກຕັ້ງຄັ້ງນີ້ ອັນເປັນບາດກ້າວໄປສູ່ລະບອບປະຊາທິປະໄຕຄັ້ງຫຼ້າສຸດ ນັບແຕ່ປະຊາຊົນຕູນີເຊຍໄດ້ໂຄ່ນລົ້ມ ທ່ານ Zine El Abidine Ben Ali ຜູ້ນຳຜະເດັດການອອກຈາກຕຳແໜ່ງ ໃນປີ 2011 ເປັນຕົ້ນມາ.
ພັກ Ennahda ໄດ້ຄອບງຳການເລືອກຕັ້ງ ຫຼັງຈາກການປະຕິວັດໃນປີນັ້ນ ແລະທ່ານ Rachid Ghannouchi ຫົວໜ້າພັກ ບັນລະຍາຍການປ່ອນບັດເລືອກຕັ້ງ ໃນວັນອາທິດວານນີ້ວ່າ
“ເປັນຄັ້ງປະຫວັດສາດ.”
