ລິ້ງ ສຳຫລັບເຂົ້າຫາ

ວັນພຸດ, ໒໔ ເມສາ ໒໐໒໔

ຕູນີເຊຍປ່ອນບັດເລືອກຕັ້ງ ແບບປະຊາທິປະໄຕ ເທື່ອທໍາອິດ (ເບິ່ງວີດີໂອ)


ພວກພະນັກງານເລືອກຕັ້ງ ກໍາລັງນັບບັດຄະແນນສຽງ ຂອງການເລືອກຕັ້ງແບບປະຊາທິປະໄຕ ຄັ້ງທໍາອິດ
ຂອງປະເທດ ທີ່ນະຄອນຫລວງຕູນິສ, ວັນທີ 24 ຕຸລາ 2011.
ພວກພະນັກງານເລືອກຕັ້ງ ກໍາລັງນັບບັດຄະແນນສຽງ ຂອງການເລືອກຕັ້ງແບບປະຊາທິປະໄຕ ຄັ້ງທໍາອິດ ຂອງປະເທດ ທີ່ນະຄອນຫລວງຕູນິສ, ວັນທີ 24 ຕຸລາ 2011.

ບັນດາ​ເຈົ້າ​ໜ້າທີ່​ກໍາກັບ​ການ​ເລືອກ​ຕັ້ງທີ່​ຕູ​ນີ​ເຊຍ​ ກໍາລັງ​ພາກັນ​ນັບ​ບັດເລືອກ​ຕັ້ງ ລຸນຫລັງ​ການ​ປ່ອນ​ບັດ​ທີ່​ດໍາ​ເນີນ​ໄປ​ແບບ​ປະຊາທິປະ​ໄຕຄັ້ງ​ທໍາ​ອິດໃນປະ​ເທດ ຊຶ່ງ​ຕິດຕາມ​ມາຫລັງ​ຈາກ​ການ​ປະຕິວັດ​ທີ່​ໄດ້​ກະຕຸ້ນໃຫ້​ ເກີດ​ການ​ລຸ​ກຮື​ຂຶ້ນ​ ທີ່​ເອີ້ນ​ວ່າ ລະດູບາ​ໃໝ່​ຂອງ​ອາຫຣັບ ຫລື Arab Spring ​ໃນ​ທົ່ວ​ພາກ​ເໜືອ​ຂອງ​ທະວີບ​ອາ​ຟຣິກາ​ແລະ​ໃນ​ພາກ​ຕາ​ເວັນ​ອອກ​ກາງ​ນັ້ນ.

ຄາດ​ກັນ​ວ່າ​ ຈະບໍ່​ມີ​ການ​ປະກາດ​ຜົນການ​ເລືອກ​ຕັ້ງ​ຢ່າງ​ເປັນ​ທາງ​ການຈົນກ່ວາ​ແລງ​ວັນ​ຈັນ​ມື້​ນີ້ ຫລື​ບໍ ກໍ​ວັນ​ອັງຄານ​ມື້​ອື່ນ.

ພວກ​ປ່ອນ​ບັດພາກັນ​ໄປເລືອກຕັ້ງ​ເອົາ​ສະພາ​ລັດຖະທໍາມະນູນ​ ທີ່​ມີ 217 ບ່ອນ​ນັ່ງ ຊຶ່ງ​ຈະ​ເປັນ​ຜູ້​ແຕ່ງ​ຕັ້ງ​ຄະນະ​ລັດຖະບານ​ຊົ່ວຄາວ​ຂຶ້ນ​ແລະ​ຮ່າງ​ກົດໝາຍ​ລັດຖະທໍາ​ມະນູນ​ສະບັບ​ໃໝ່.

ຄະນະ​ກໍາມະການ​ເລືອກ​ຕັ້ງ​ທີ່​ເປັນ​ອິດ​ສະລະ​ຂອງ​ປະ​ເທດ​ກ່າວ​ວ່າ ຫລາຍກວ່າ 90 ສ່ວນ​ຮ້ອຍ​ຂອງ​ປະຊາຊົນທັງ​ໝົດ​ 4 ລ້ານ 1 ​ແສນ​ຄົນທີ່​ໄດ້ລົງທະບຽນເລືອກ​ຕັ້ງນັ້ນ​ ໄດ້​ໄປປ່ອນ​ບັດ.

ພົນລະ​ເມືອງ​ໃນ​ທົ່ວ​ປະ​ເທດ​ອາຫຣັບ​ແຫ່ງ​ນີ້​ໄດ້​ສະ​ແດງ​ຄວາມ​ຕື່ນ​ເຕັ້ນ​ແລະ​ພາກພູມ​ໃຈ​ທີ່​ໄດ້​ມີ​ໂອກາດ​ເລືອກ​ເອົາ​ຜູ້​ແທນ​ຂອງ​ຕົນຈາກ​ຫລາຍໆ ​ພັກ​ການ​ເມືອງ​ເປັນ​ເທື່ອ​ທໍາ​ອິດນັບ​ແຕ່ໄດ້​ຮັບ​ເອກະລາດ​ມາ​ໃນ​ປີ 1956. ມີພັກ​ການ​ເມືອງ​ຫລາຍ​ກວ່າ 100 ພັກສົ່ງຜູ້ສະມັກ​ຮັບ​ເລືອກ​ຕັ້ງເຂົ້າ​ປະກອບ​ສ່ວນ​ໃນ​ການ​ເລືອກ​ຕັ້ງ​ຄັ້ງ​ນີ້. ​ໃນ​ການເລືອກ​ຕັ້ງ​ຄັ້ງ​ກ່ອນໆ​ນັ້ນ ມີແຕ່ພວກ​ສະມາຊິກ​ຈາກ​ພັກ​ກາ​ນ​ເມືອງຂອງ​ລັດຖະບານເທົ່າ​ນັ້ນ​ ທີ່​ໄດ້ຮັບ​ອະນຸຍາດໃຫ້ປະກອບສ່ວນ​.

ທ່ານ​ພັນ​ກິ​ມູນ ​ເລຂາທິການ​ໃຫຍ່​ສະຫປະຊາ​ຊາດໄດ້​ສະ​ແດງ​ຄວາມ​ຊົມ​ເຊີຍ​ຕໍ່​ປະຊາຊົນ​ຕູ​ນີ​ເຊຍ ​ແລະ​ຮຽກຮ້ອງໄປ​ຍັງ​ປະຊາຊົນ​ທັງ​ໝົດ​ທີ່ມີສ່ວນ​ພົວພັນໃຫ້​ມີ​ຄວາມ​ໝາຍໝັ້ນ​ຕໍ່ການ​ດໍາ​ເນີນ​ຂັ້ນ​ຕອນ​ໄລຍະຂ້າມ​ຜ່ານ ​ທີ່ຮວມ​ເອົາ​ທຸກ​ພັກ​ຝ່າຍແລະ​ໂປ່​ງ​ໃສ​ນີ້. ​ໂຄສົກ​ປະ​ຈໍາ​ທ່ານ​ພັນ​ກິ​ມູນ​ກ່າວ​ວ່າ ການ​ເລືອກ​ຕັ້ງ​ໃນ​ວັນ​ອາທິດ​ວານ​ນີ້ ແມ່ນເປັນເຫດການຜັນ​ຂະຫຍາຍທີ່​ມີ​ຄວາມ​ໝາຍສໍາຄັນໃນ​ການ​ໂອນ​ອໍານາດແບບ​ປະຊາທິປະ​ໄຕ​ໃນ​ພາກ​ພື້ນ​ແຫ່ງນັ້ນຂອງ​ໂລກ.

XS
SM
MD
LG