ລິ້ງ ສຳຫລັບເຂົ້າຫາ

ປະຊາຊົນຕູນີເຊຍ ອອກໄປ ປ່ອນບັດເລືອກຕັ້ງ ໃນມື້ນີ້ (ເບິ່ງວີດີໂອ)

  • ສິງ ບູຣົມມະວົງ

ແມ່ຍິງຕູນີເຊຍຄົນນຶ່ງ ຖືທຸງຊາດ ໄປບ່ອນບັດເລືອກຕັ້ງໃນໜ່ວຍປ່ອນບັດ ແຫ່ງນຶ່ງໃນນະຄອນຕູນິສ ຕູນີເຊຍ. ວັນທີ 23 ຕຸລາ 2011.

ປະຊາຊົນ​ຕູ​ນີ​ເຊຍ​ພາກັນ​ເລີ້ມ​ອອກ​ໄປ​ປ່ອນ​ບັດ​ໃນ​ວັນ​ອາທິດມື້​ນີ້​ ເພື່ອ​ເລືອກ​ເອົາ​ອັນ​ທີ່​ເອີ້ນ​ວ່າ ສະພາ​ລັດຖະທໍາ​ມະນູນ ທີ່​ມີໜ້າ​ທີ່ຮ່າງ​ກົດ ໝາຍ​ລັດຖະທໍາ​ນະ​ນູນສະບັບ​ໃໝ່ ​ແລະ​ວາງ​ແຜນທີ່​ຫົນທາງການ​ເມືອງ​ສໍາລັບ​ປະ​ເທດ​ໃນ​ພາກ​ເໜືອ​ຂອງ​ທະວີບອາ​ຟຣິກາ​ແຫ່ງ​ນີ້.

ການ​ເລືອກ​ຕັ້ງ​ຄັ້ງ​ນີ້​ຈະ​ເປັນ​ການ​ເລືອກ​ຕັ້ງ​ແບບ​ປະຊາທິປະ​ໄຕ​ຄັ້ງ​ທໍາອິດ ​ນັບ​ແຕ່​ຕູ​ນີ​ເຊຍ​ໄດ້​ເປັນ​ປະ​ເທດ​ເອກະລາດ ​ໃນ​ປີ 1956 ​ເປັນ​ຕົ້ນມາ. ມີ​ພັກ​ການ​ເມືອງ​ຫລາຍ​ກວ່າ 100 ພັກ​ເຂົ້າ​ປະກອບ​ສ່ວນ​ໃນ​ການ​ເລືອກ​ຕັ້ງ​ເພື່ອ​ຍາດ​ເອົາ​ບ່ອນ​ນັ່ງ​ ຈໍານວນ 217 ບ່ອນ​ ໃນ​ສະພາ​ລັດຖະທໍາ​ມະນູນ ຊຶ່ງ​ເປັນ​ການ​ກົງກັນຂ້າມ​ຢ່າງ​ຫລວງຫລາຍ​ກັບ​ການ​ເລືອກ​ຕັ້ງ​ຫລາຍຄັ້ງ​ຜ່ານ​ມາ ​ເວລາ​ປະຊາຊົນ​ບໍ່​ມີ​ທາງ​ເລືອກ​ອື່ນ​ໃດ ນອກຈາກ​ເລືອກ​ເອົາ​ພັກ​ການ​ເມືອງ​ທີ່​ປົກຄອງ​ປະ​ເທດ​ໃນ​ປັດຈຸບັນ ​ຄືນ​ໃໝ່​ນັ້ນ.

ເມື່ອ​ໃດ​ທີ່​ແຕ່ງ​ຕັ້ງ​ຄະນະ​ລັດຖະບານ​ໃໝ່​ຂຶ້ນ​ມາແລ້ວ ສະພາ​ດັ່ງກ່າວ​ກໍ​ຈະ​ຂຽນ​ກົດໝາຍ​ລັດຖະທໍາ​ມະນູນ​ສະບັບ​ໃໝ່ ຂຶ້ນ​ມາ​ໃຊ້ແທນ​ກົດໝາຍ​ສະບັບ​ເກົ່າ ​ທີ່ໄດ້​ນໍາໃຊ້ໂດຍລັດຖະບານຜະ​ເດັດ​ການ​ມາ​ເປັນ​ເວລາ​ດົນ​ນານ​ຂອງ​ທ່ານ Zine el Abidine Ben Ali ທີ່​ໄດ້​ຖືກ​ໂຄ່ນ​ລົ້ມ​ອອກ​ຈາກ​ອໍານາດ​ໄປ​ໃນ​ການ​ປະຕິວັດ​ໃນຕູ​ນີ​ເຊຍເມື່ອ​ເດືອນມັງກອນຕົ້ນປີ​ນີ້ທີ່ໄດ້ກະ​ຕຸ້ນ​ໃຫ້​ເກີດ​ຄື້ນຟອງ​ແຫ່ງ​ການ​ປະຕິວັດ​ຂຶ້ນ ​ໃນ​ທົ່ວພາກ​ເໜືອ​ຂອງ​ທະວີບອາ​ຟຣິກາ ​ແລະ​ໃນ​ພາກ​ຕາ​ເວັນ​ອອກ​ກາງ​ ​ທີ່ເອີ້ນ​ກັນ​ວ່າ ລະດູບານ​ໃໝ່​ຂອງອາຫຣັບ ຫລື Arab Spring ນັ້ນ.

ພວກ​ນັກ​ສັງ​ເກດ​ການ​ທໍານາຍ​ວ່າ ພັກອິສລາມ Ennahdha ທີ່ນິຍົມ​ແນວທາງພໍ​ປານ​ກາງ​ ຈະໄດ້​ຮັບ​ຄະ​ແນນ​ສຽງ​ຫລາຍ​ກວ່າ​ໝູ່ ​ແຕ່​ຈະ​ບໍ່ໄດ້​ສຽງ​ຂ້າງ​ຫລາຍ. ​ ພັກ​ດັ່ງກ່າວ​ໄດ້ເລີ້ມທໍາ​ການ​ໂອ້​ລົມກັບ​ພັກອື່ນໆໄວ້​ກ່ອນ​ແລ້ວ ​ເພື່ອ​ຈະ​ຈັດ​ຕັ້ງ​ຄະນະ​ລັດຖະບານ​ປະສົມ​ຂຶ້ນ​ນັ້ນ.

ພວກ​ໜວຍປ່ອນ​ບັດ​ທັງ​ໝົດ​ຈະ​ໄດ້​ຮັບ​ການ​ເຝົ້າ​ຍາມ​ໂດຍ​ພວກ​ຕໍາຫລວດ​ ແລະ​ທະຫານ ​ແລະ​ພວກ​ນັກ​ສັງ​ເກດ​ການ​ພາຍ​ໃນ​ປະ​ເທດ​ແລະ​ຕ່າງປະ​ເທດ​ແລະ​ນັກ​ຂ່າວ​ຫລາຍ​ພັນ​ຄົນ ​ຈະໄປ​ສັກຂີ​ພິຍານ​ໃນ​ການປ່ອນບັດ​ເລືອກ​ຕັ້ງຄັ້ງ​ນີ້.

ມີ​ຫລາຍ​ສິ່ງ​ຫລາຍ​ຢ່າງ​ທີ່​ເປັນ​ເດີມ​ພັນ ​ເພາະວ່າຖ້າ​ການ​ເລືອກ​ຕັ້ງຄັ້ງ​ນີ້ຍັງ​ຜົນ​ໃຫ້​ມີ​ລັດຖະບານ​ທີ່​ດໍາ​ເນີນ​ງານ​ໄດ້​ຢ່າງ​ມີ​ປະສິດທິ​ຜົນແລ້ວ ຕູ​ນີ​ເຊຍ​ກໍ​ອາດ​ສາມາດ​ໂຜ່​ໂຕ​ຂຶ້ນ​ມາເປັນ​ແບບຢ່າງ​ສໍາລັບ​ປະ​ເທດອື່ນໆ​ໃນ​ຂົງ​ເຂດ​ໄດ້.

XS
SM
MD
LG