ລິ້ງ ສຳຫລັບເຂົ້າຫາ

logo-print

​ປ. ທ​ຣຳ ປະ​ກາດ​ວ່າ ຈະ​ປາບ​ປາມ ພວກ​ຂໍ​ລີ້​ໄພ ​ທີ່​ອາດ​ມີ​ຂຶ້ນ ໃນ​ອາ​ທິດ​ໜ້າ


ປະ​ທາ​ນາ​ທິ​ບໍ​ດີ ດໍ​ໂນ​ລ ທ​ຣຳ ກ່າວ​ຕໍ່​ພວກ​ນັກ​ຂ່າວ ໃນ​ຂະ​ນະ​ທີ່​ທ່ານ​ຍາງ​ໄປ ເດີ່ນ​ກ້ຳ​ໃຕ້ ຂອງ​ທຳ​ນຽບ​ຂາວ. (ວັນ​ທີ 22 ຕຸ​ລາ 2018)

ປະ​ທາ​ນາ​ທິ​ບໍ​ດີ​ສະ​ຫະ​ລັດ ທ່ານ​ດໍ​ໂນ​ລ ທ​ຣຳ ອີກ​ເທື່ອ​ນຶ່ງ ໃນ​ວັນ​ພະ​ຫັດ​ວານນີ້ ໄດ້​ກ່​າວ​ເຖິງ​ຄວາມ​ຢ້ານ​ກົວ​ກ່ຽວ​ກັບ​ພວກ​ຄົນ​ເຂົ້າ​ເມືອງ​ທີ່​ຜິດ​ກົດ​ໝາຍ ແລະ​ສັນຍາ​ວ່າ ຈະອອກ​ດຳ​ລັດ​ “ໃນ​ອາ​ທິດ​ໜ້ານີ້” ທີ່​ຈະ​ຈຳ​ກັດ​ຮັດ​ແຄບ​ພວກ​ຂໍ​ລີ້​ໄພ ທີ່ພວມ​ຈະ​ມາ​ເຖິງ​ຊາຍ​ແດນ​ທາງ​ໃຕ້​ຂອງ​ສະ​ຫະ​ລັດ.

ໃນ​ການ​ໂຮມ​ຊຸມ​ນຸມ​ທາງ​ການ​ເມືອງ ທີ່​ເມືອງ​ໂຄ​ລຳ​ເບຍ ລັດ​ມິ​ສ​ຊູ​ຣີ ເມື່ອ​ຄືນ​ວັນ​ພະ​ຫັດ​ວານນີ້ ປະ​ທາ​ນາ​ທິ​ບໍ​ດີ​ທ​ຣຳ ໄດ້​ກ່າວ​ເຖິງ​ຄວາມ​ຕັ້ງ​ໃຈ​ຂອງ​ທ່ານ ຫຼາຍໆຄັ້ງ ທີ່​ຈະ​ປ່ຽນ​ແປງ​ບົດ​ເພີ້ມ​ເຕີມ​ລັດ​ຖະ​ທຳ​ມະ​ນູນ​ສະ​ຫະ​ລັດ ທີ່​ໄດ້​ໃຫ້​ການ​ຄ້ຳ​ປະກັນ​ທີ່​ຈະ​ໃຫ້​ສັນ​ຊາດ​ແກ່​ບຸກ​ຄົນໃດ​ກໍ​ຕາມທີ່​ເກີດ​ຢູ່​ໃນ​ສະ​ຫະ​ລັດ. ປະ​ທາ​ນາ​ທິ​ບໍ​ດີທ​ຣຳ​ກ່າວ​ໃນ​ການ​ໂຮມ​ຊຸມ​ນຸມນີ້​ວ່າ ທ່ານບໍ່​ເຫັນ​ພ້ອມ​ຕໍ່ “ການ​ທ່ອງ​ທ່ຽວ​ເພື່ອ​ມາ​ເກີດ” ​ຊຶ່ງ​ພວກ​ແມ່​ຍິງ​ທີ່​ຖື​ພາ​ຊາວ​ຕ່າງ​ປະ​ເທດ ມີ​ການ​ກ່າວ​ວ່າ ເດີນ​ທາງ​ມາ​ຍັງສ​ະ​ຫະ​ລັດ ເພື່ອ​ຄອດ​ລູກ ທີ່​ຈະ​ເຮັດ​ໃຫ້​ລູກໆ​ຂອງ​ພວກ​ເຂົາ​ເຈົ້າ​ໄດ້​ຮັບ​ສັນ​ຊາດອາ​ເມ​ຣິ​ກັນ​ໂດຍ​ອັດ​ຕະ​ໂນ​ມັດ​ນັ້ນ.

ປ. ທ​ຣຳ ກ່າວ​ຄຳ​ປາ​ໄສ ຕໍ່​ພວກ​ສະ​ໜັບ​ສະ​ໜຸນ ທີ່​ບ່ອນ​ໂຄ​ສະ​ນາ​ຫາ​ສຽງ ຢູ່​ເມືອງ​ໂຄ​ລຳ​ເບຍ ລັດ​ມິ​ສ​ຊູ​ຣີ (ວັນ​ທີ 1 ພະ​ຈິກ 2018)
ປ. ທ​ຣຳ ກ່າວ​ຄຳ​ປາ​ໄສ ຕໍ່​ພວກ​ສະ​ໜັບ​ສະ​ໜຸນ ທີ່​ບ່ອນ​ໂຄ​ສະ​ນາ​ຫາ​ສຽງ ຢູ່​ເມືອງ​ໂຄ​ລຳ​ເບຍ ລັດ​ມິ​ສ​ຊູ​ຣີ (ວັນ​ທີ 1 ພະ​ຈິກ 2018)

ປະ​ທາ​ນາ​ທິ​ບໍ​ດີ​ທ​ຣຳ ກ່າວ​ວ່າ ທ່ານ​ສາ​ມາດ​ປ່ຽນ​ແປງ​ບົດ​ເພີ້ມ​ເຕີມ​ລັດ​ຖະ​ທຳ​ມະນູນ​ທີ 14 ດ້ວຍ​ດຳ​ລັດ​ຂ​ອງ​ຝ່າຍ​ບໍ​ລິ​ຫານແຕ່​ພວກ​ນັກ​ວິ​ເຄາະ​ທາງ​ດ້ານ​ກົດ​ໝາຍແມ່ນ​ບໍ່​ເຫັນ​ພ້ອມນຳ​ຢ່າງ​ແຂງ​ຂັນ ໂດຍ​ກ່າວ​ວ່​າ ດຳ​ລັດ​ພຽງ​ຢ່າງ​ດຽວນັ້ນ​ແມ່ນ​ບໍ່ພຽງ​ພໍ ສຳ​ລັບ​ປ່ຽນ​ແປງ​ລັດ​ຖະ​ທຳ​ມະ​ນູນ​ສະ​ຫະ​ລັດ​.

ນອກນັ້ນ​ແລ້ວ ຢູ່​ບ່ອນ​ໂຮມ​ຊຸມ​ນຸມ​ດັ່ງ​ກ່າວ ປະ​ທາ​ນາ​ທິ​ບໍ​ດີ​ທ​ຣຳຍັງ​ໄດ້​ກ່າວເຖິງ ​ການ​ຄັດ​ຄ້ານ​ຂອງ​ທ່ານຕໍ່​ອັນ​ທີ່​ເອີ້ນ​ວ່າ ການ​ເຂົ້າ​ເມືອງ “ແບບ​ຕ່ອງ​ໂສ້” ຊຶ່ງຜູ້​ທີ່​ໄດ້​ຮັບ​ສັນ​ຊາດ​ໃໝ່ ສາ​ມາດ​ນຳ​ເອົາ​ຄອບ​ຄົວ​ຍາດ​ພີ່​ນ້ອງ​ເຂົາ​ເຈົ້າ​ເຂົ້າ​ມາ​ໃນ​ສະ​ຫະ​ລັດ​ໄດ້.

ກ່ອນ​ໜ້ານີ້ ​ຢູ​ທີ່ທຳ​ນຽບ​ຂາວ ປະ​ທາ​ນາ​ທິ​ບໍ​ດີ​ທ​ຣຳ​ກ່າວ​ວ່າ ພວກ​ຄົນ​ເຂົ້າ​ເມືອງ​ ​ທີ່ຢາກຂໍ​ລີ້​ໄພ ຕ້ອງ​ຍື່ນ​ຄຳ​ຮ້ອງ ​ຢູ່​ດ່ານກວດ​ຄົນ​ເຂົ້າ​ເມືອງ ທີ່​ຖືກ​ຕ້ອງ​ຕາມ​ກົດ​ໝາຍ ແລະ​ກ່າວ​ເພີ້ມ​ວ່າ ທ່ານ​ຕ້ອງ​ການ​ຢາກ​ຈະ​ຄຸມ​ຂັງ​ພວກ​ຂໍ​ລີ້​ໄພ​ໃນ​ຈຳ​ນວນ​ເພີ້ມ​ຂຶ້ນ.

ນີ້​ແມ່ນ​ຄວາມ​ພະ​ຍາ​ຍາມ​ເທື່ອ​ຫລ້າ​ສຸດ​ຂອງ​ປະ​ທາ​ນາ​ທິ​ບໍ​ດີ ທີ່​ຈະ​ນຳ​ເອົາ​ເລື້ອງ ຄົນ​ເຂົ້າ​ເມືອງ ມາ​ເປັນ​ບັນ​ຫາ​ສຳ​ຄັນ ສຳ​ລັບ​ພັກ​ຣີ​ພັບ​ບ​ລີ​ກັນ ກ່ອນ​ການ​ປ່ອນ​ບັດ​ກາງ​ສະ​ໄໝ​ໃນ​ວັນ​ອັງ​ຄານ​ຈະ​ມານີ້ ເວ​ລາ​ຜູ້​ມີ​ສິດ​ປ່ອນ​ບັດ​ຈະ​ພາ​ກັນ​ຕັດ​ສິນຊີ້​ຂາດ​ວ່າ ພັກ​ໃດ​ຈະ​ເປັນ​ຜູ້​ກຳ​ອຳ​ນາດ​ຢູ່​ໃນ​ລັດ​ຖະ​ສະ​ພາແລະ​ສະ​ພາ​ປະ​ຈຳ​ລັດໃນ​ທົ່ວ​ປະ​ເທດ.

ຂະ​ບວນ​ພວກ​ຄົນ​ເຂົ້າ​ເມືອງ ທີ່​ພວມ​ເດີນ​ທາງ​ຢູ່​ໃນ​ເມັກ​ຊິ​ໂກ ມາ​ຍັງ​ສະ​ຫະ​ລັດ
ຂະ​ບວນ​ພວກ​ຄົນ​ເຂົ້າ​ເມືອງ ທີ່​ພວມ​ເດີນ​ທາງ​ຢູ່​ໃນ​ເມັກ​ຊິ​ໂກ ມາ​ຍັງ​ສະ​ຫະ​ລັດ

ໃນ​ຕົ້ນ​ອາ​ທິດນີ້ ປະ​ທາ​ນາ​ທິ​ບໍ​ດີ​ທ​ຣຳ ກ່າວ​ວ່າ ທ່ານ​ຈະ​ສົ່ງ​ກຳ​ລັງ​ທະ​ຫານ​ຕື່ມ​ອີກ 5,000 ຄົນ​ໄປ​ຍັງ​ເຂດ​ຊາຍ​ແດນ​ທີ່​ຕິດ​ກັບ​ເມັກ​ຊິ​ໂກ ເພື່ອ​ສະ​ກັດ​ກັ້ນ​ຂະ​ບວນ​ຄົນ​ເຂົ້າ​ເມືອງ​ຫຼາຍ​ພັນ​ຄົນ ແລະ​ກ່າວ​ວ່າທ່ານ​ຈະ​ສົ່ງ​ທະ​ຫານ​ຕື່ມ​ອີກ​ຫຼາຍພັນ​ຄົນ​ໄປ​ເພີ້ມ. ພວກ​ຄົນ​ເຂົ້າ​ເມືອງ​ເຫຼົ່າ​ນີ້ ແມ່ນ​ຍັງ​ໄກ​ຈາກ​ຊາຍ​ແດນ​ສະ​ຫະລັດ​ຫຼາຍກວ່າ 1,000 ກິ​ໂລ​ແມັດ ຊຶ່ງ​ເປັນ​ໄລ​ຍະ​ທາງ​ທີ່​ເບິ່ງ​ຄື​ວ່າ ຈະ​ໃຊ້​ເວ​ລາອີກ​ຫຼາຍໆ​ອາ​ທິດ​ໃນ​ການ​ຍ່າງ​ເພື່ອ​ຈະ​ມາ​ເຖິງ​ຊາຍ​ແດນ.

​ປະ​ທາ​ນາ​ທິ​ບໍ​ດີ​ທ​ຣຳ​ກ່າວ​ວ່າ ຈະ​ມີ​ການ​ປາບ​ປາມ ຖ້າ​ພວກ​ຄົນ​ເຂົ້າ​ເມືອງ​ຫາກແກວ່ງ​ກ້ອນ​ຫີນ​ເຂົ້າ​ໃສ່​ພວກ​ທະ​ຫານໂດຍ​ເວົ້າ​ວ່າ ພວກ​ທະ​ຫານ​ “ຈະ​ຍິງ​ຕອບໂຕ້ ໂດຍ​ຖື​ກ້ອນ​ຫີນ​ວ່າ ຄື​ກັນ​ກັບ​ປືນ.”

ອ່ານ​ຂ່າວນີ້​ຕື່ມ​ເປັນ​ພາ​ສາ​ອັງ​ກິດ

ທ່ານອາດຈະມັກເລື້ອງນີ້ຄືກັນ

XS
SM
MD
LG