ປະທານາທິບໍດີ ສະຫະລັດ ທ່ານ ດໍໂນລ ທຣຳ ໄດ້ຍົກເລີກການຢ້ຽມຢາມສຸສານ ອາ
ເມຣິກັນ ຢູ່ນອກນະຄອນຫຼວງ ປາຣີ ໃນວັນເສົາວານນີ້ ໃນລະຫວ່າງການຢ້ຽມຢາມ
ຂອງທ່ານປະທານາທິບໍດີ ເພື່ອລະນຶກເຖິງວັນຄົບຮອບ 100 ປີຂອງວັນສິ້ນສຸດສົງຄາມ
ໂລກຄັ້ງທີນຶ່ງ.
ຖະແຫຼງການສະບັບນຶ່ງຂອງທຳນຽບຂາວໄດ້ກ່າວວ່າ ການຢ້ຽມຢາມຂອງທ່ານປະທາ
ນາທິບໍດີໄດ້ຖືກຍົກເລີກຍ້ອນວ່າ ຕາຕະລາງແຜນການ ແລະ ການເດີນທາງໄດ້ປະ
ສົບຄວາມຫຍຸ້ງຍາກ ຍ້ອນສະພາບອາກາດ.
ແຕ່ກົງກັນຂ້າມ, ຄະນະຜູ້ແທນ ອາເມຣິກັນ ຄະນະນຶ່ງເຊິ່ງນຳໜ້າໂດຍເສນາທິການ
ນາຍພົນ ຈອນ ແຄລລີ ແລະ ປະທານເສນາທິການຮ່ວມ ທ່ານ ໂຈ ດັນຝອດ ໄດ້ໄປ
ຢ້ຽມຢາມສຸສານ ອາເມຣິກັນ Aisne-Marne ແລະ ອານຸສອນສະຖານ ພາຍໃຕ້ທ້ອງ
ຟ້າສີຂີ້ເຖົ່າ ແລະ ຝົນຝອຍ, ເພື່ອສະແດງຄວາມເຄົາລົບໃຫ້ແກ່ທະຫານທີ່ເສຍຊີວິດ
ໃນສົງຄາມ 2,300 ຄົນທີ່ຖືກຝັງຢູ່ທີ່ນັ້ນ.
ບໍລິເວນດັ່ງກ່າວແມ່ນສະຖານທີ່ຂອງການຕໍ່ສູ້ແຫ່ງ ແບລໂລ ວູດ (Battle of Belleau
Wood) ໃນເດືອນມິຖຸນາ 1918. ນອກຈາກຂຸມຝັງສົບຂອງທະຫານ ອາເມຣິກັນ
2,288 ຄົນແລ້ວ, ສຸສານດັ່ງກ່າວຍັງມີອານຸສາວະລີລະນຶກເຖິງທະຫານ 1,060 ຄົນ
ຜູ້ທີ່ໄດ້ຫາຍສາບສູນໄປໃນລະຫວ່າງການຕໍ່ສູ້.
ພ້ອມກັນນັ້ນໃນວັນເສົາວານນີ້, ປະທານາທິບໍດີ ຝຣັ່ງ ທ່ານ ເອັມມານູແອລ ມາຄຣົງ
ແລະ ນາຍົກລັດຖະມົນຕີ ເຢຍຣະມັນ ທ່ານນາງ ແອນເຈີລາ ເມີໂກ ກໍໄດ້ຈັບມືກັນໃນ
ລະຫວ່າງ ພິທີນຶ່ງ ຢູ່ສະຖານທີ່ໃນປ່າ ກອມເປນ (Compiegne), ທາງທິດເໜືອຂອງ
ນະຄອນຫຼວງ ປາຣີ, ເຊິ່ງແມ່ນບ່ອນທີ່ພັນທະມິດ ແລະ ເຢຍຣະມັນ ຜູ້ປະລາໄຊ ໄດ້
ເຊັນຂໍ້ຕົກລົງ ທີ່ໄດ້ເຮັດໃຫ້ສົງຄາມໂລກຄັ້ງທີນຶ່ງສິ້ນສຸດລົງ.
ໃນວັນອາທິດມື້ນີ້, ເຊິ່ງແມ່ນວັນ ສະຫງົບເສິກ, ທ່ານ ທຣຳ ຈະເຂົ້າຮ່ວມກັບຜູ້ນຳໂລກ
ຄົນອື່ນໆໃນພິທີຄົບຮອບ 100 ປີ ຢູ່ອານຸສາວະລີ ອາກ ເດິ ທຣີໂອມຟ໌ ໃນນະຄອນ
ຫຼວງ ປາຣີ. ພິທີດັ່ງກ່າວແມ່ນເພື່ອລະນຶກເຖິງທະຫານຜູ້ທີ່ໄດ້ເສຍຊີວິດເມື່ອ 100 ປີທີ່
ຜ່ານມາ ໃນສົງຄາມທີ່ໄດ້ສິ້ນສຸດລົງໃນຊົ່ວໂມງທີ 11 ວັນທີ 11 ຂອງເດືອນ 11.
