ສະພາສູງ ສະຫະລັດ ມີກຳນົດທີ່ຈະລົງຄະແນນສຽງໃນວັນພະຫັດມື້ນີ້ ກ່ຽວກັບ ຍັດຕິທີ່ຮຽກຮ້ອງໃຫ້ປະທານາທິບໍດີ ດໍໂນລ ທຣຳ “ຍົກເລີກການໃຊ້ກຳລັງທະຫານ ສະຫະລັດ ສຳລັບສ້າງຄວາມເປັນປໍລະປັກຕໍ່ ອີຣ່ານ.” ນອກຈາກວ່າການດຳເນີນການທີ່ວ່ານັ້ນ ໄດ້ຮັບການອະນຸຍາດໂດຍລັດຖະສະພາ.
ທ່ານ ທຣຳ ໄດ້ປະຕິເສດມາດຕະການດັ່ງກ່າວ, ໂດຍໂຕ້ຖຽງວ່າມັນຈະເປັນອັນຕະລາຍທີ່ຈະຈຳກັດອຳນາດໃນການເຮັດສົງຄາມຂອງທ່ານ, ແລະ ກ່ອນການລົງຄະແນນສຽງນັ້ນ ທ່ານໄດ້ຮຽກຮ້ອງໃຫ້ສະພາສູງທີ່ພັກຣີພັບບລີກັນກຳສຽງສ່ວນຫຼາຍຄັດຄ້ານມັນ.
ທ່ານ ທຣຳ ໄດ້ກ່າວໃນທວິດເຕີວ່າ “ມັນສຳຄັນຫຼາຍຕໍ່ຄວາມປອດໄພຂອງປະເທດຂອງເຮົາທີ່ສະພາສູງ ສະຫະລັດ ບໍ່ລົງຄະແນນສຽງສະໜັບສະໜຸນຍັດຕິຈຳກັດອຳນາດໃນການເຮັດສົງຄາມກັບ ອີຣ່ານ. ພວກເຮົາພວມເຮັດໄດ້ດີຫຼາຍກັບ ອີຣ່ານ ແລະ ນີ້ບໍ່ແມ່ນເວລາທີ່ຈະສະແດງຄວາມອ່ອນແອ.”
ທ່ານ ທຣຳ ໄດ້ຂຽນໃນທວິດເຕີວ່າ “ປະຊາຊົນ ອາເມຣິກັນ ສະໜັບໜູນການໂຈມຕີຂອງພວກເຮົາຕໍ່ນາຍພົນ ອີຣ່ານ ທ່ານ ກາສເຊັມ ໂຊເລມານີ ຢ່າງຖ້ວມລົ້ນ,” ເຊິ່ງຖືກຂ້າຕາຍໂດຍການອອກຄຳສັ່ງໂຈມຕີດ້ວຍເຮືອບິນບໍ່ມີຄົນຂັບຂອງທ່ານ ທຣຳ ຢູ່ສະໜາມບິນ ແບັກແດດ ໃນເດືອນທີ່ຜ່ານມາ.
ທ່ານໄດ້ກ່າວວ່າ “ຖ້າມືຂອງຂ້າພະເຈົ້າຖືກມັດໄວ້, ອີຣ່ານ ກໍຈະມີຄວາມໄດ້ປຽບ. ມັນຈະສົ່ງສັນຍານທີ່ບໍ່ດີຫຼາຍ. ພວກເດໂມແຄຣັດ ມີແຕ່ເຮັດສິ່ງນີ້ໃນຄວາມພະຍາຍາມທີ່ຈະສ້າງຄວາມອັບອາຍຂາຍໜ້າໃຫ້ພັກຣີພັບບລີກັນ. ຢ່າໃຫ້ມັນເກີດຂຶ້ນ.”
ຫຼັງຈາກໄດ້ພິຈາລະນາບົດແກ້ໄຂຫຼາຍສະບັບເພື່ອໃຫ້ກາຍເປັນຮ່າງຍັດຕິທີ່ບໍ່ມີຂໍ້ຜູກແລ້ວ, ບັນດາສະມາຊິກສະພາສູງຈະລົງຄະແນນສຽງ ກ່ຽວກັບ ຍັດຕິດດັ່ງກ່າວດ້ວຍຄວາມເປັນໄປໄດ້ວ່າ ສະມາຊິກຣີພັບບລີກັນ 5 ທ່ານຈະເຂົ້າຮ່ວມກັບສະມາຊິກພັກເດໂມແຄຣັດ 47 ຄົນໃນສະພາທີ່ມີ 100 ບ່ອນນັ່ງ ເພື່ອຮັບຮອງເອົາມາດຕະການດັ່ງກ່າວ. ມັນເກືອບແນ່ນອນວ່າ ຈະເຂົາເຈົ້າຈະໄດ້ຮັບການຄັດຄ້ານຈາກທ່ານ ທຣຳ, ດ້ວຍຜູ້ສະໜັບສະໜູນຍັດຕິດັ່ງກ່າວ ເບິ່ງຄືວ່າຈະບໍ່ສາມາດທີ່ຈະຮວບຮວມຄະແນນສຽງສອງສ່ວນສາມເພື່ອລົບລ້າງມັນ.
ສະມາຊິກສະພາສູງສັງກັດພັກເດໂມແຄຣັດ ທ່ານ ທິມ ເຄນ ຜູ້ທີ່ສະໜັບສະໜູນຍັດຕິນັ້ນ, ໄດ້ກ່າວຕໍ່ສະພາສູງວ່າ “ຍັດຕິທີ່ຖືກນຳຕໍ່ສະພາມື້ນີ້ແມ່ນ ກ່ຽວກັບ ລັດຖະສະພາ ຮຽກເອົາບົດບາດທີ່ຖືກຕ້ອງຕາມກົດໝາຍຂອງເຂົາເຈົ້າໃນການຕັດສິນໃຈ ກ່ຽວກັບ ສົງຄາມຄືນ. ຍັດຕິດັ່ງກ່າວແມ່ນຂ້ອນຂ້າງລຽບງ່າຍ. ພວກເຮົາຈະບໍ່ເຮັດສົງຄາມກັບ ອີຣ່ານ, ນອກຈາກວ່າລັດຖະສະພາຈະລົງຄະແນນສຽງເພື່ອອະນຸຍາດໃຫ້ເຮັດສົງຄາມນັ້ນ.”