ປະທານາທິບໍດີສະຫະລັດ ທີ່ຫາກໍໄດ້ຮັບເລືອກໃໝ່ ທ່ານ Donald Trump ກ່າວວ່າ
ທ່ານຈະກ່າວຕໍ່ສື່ມວນຊົນ “ໃນອານາຄົດອັນໃກ້ນີ້” ກ່ຽວກັບລັດຖະບານຂອງທ່ານ ທີ່ຖືກເລືອກເຂົ້າມາຮັບໜ້າທີ່ ແລະທຸລະກິດຂອງທ່ານ ທີ່ທ່ານຈະປ່ອຍໃຫ້ລູກຊາຍຂອງທ່ານ
ເປັນຜູ້ບໍລິຫານຈັດການນັ້ນ.
ການປະກາດໃນແລງວັນຈັນວານນີ້ ທາງ twitter ໄດ້ມີຂຶ້ນ ບໍ່ເທົ່າໃດມື້ ກ່ອນກອງປະຊຸມ
ຖະແຫຼງຂ່າວ ຊຶ່ງຖືກເລື່ອນອອກໄປ ກ່ຽວກັບວ່າທ່ານຈະແຍກຕົວເອງ ອອກຈາກທຸລະກິດ
ທີ່ມີຜົນປະໂຫຍດໃນໂລກຢ່າງໃດ ເພື່ອທ່ານຈະໄດ້ຕັ້ງໃຈຈົດຈໍ່ປະຕິບັດໜ້າທີ່ເປັນປະທານາທິບໍດີ ແລະຫຼີກລ້ຽງຂໍ້ຂັດແຍ້ງຂອງຜົນປະໂຫຍດ. ຜູ້ຊ່ອຍຂອງທ່ານ ໄດ້ກ່າວ
ໃນວັນຈັນວານນີ້ວ່າ ລາຍລະອຽດຕ່າງໆເຫຼົ່ານັ້ນ ຈະສະເໜີໃຫ້ຊາຍໃນເດືອນມັງກອນ
ທີ່ຈະມາເຖິງນີ້.
ທ່ານ Trump ໄດ້ຂຽນໄວ້ກ່ອນໜ້າວັນທີ 20 ມັງກອນ ຄືວັນດຽວກັນກັບວັນທີ່ທ່ານຈະສາບານຕົວນັ້ນ ວ່າທ່ານຈະວາງມືຈາກທຸລະກິດ ໂດຍປ່ອຍໃຫ້ຢູ່ໃນການບໍລິຫານຈັດການຂອງລູກຊາຍຂອງທ່ານ ກໍຄືທ່ານ Don ແລະທ່ານ Eric ຮວມທັງຄະນະຜູ້ບໍລິຫານຫຼາຍໆທ່ານນຳດ້ວຍ. ທ່ານໄດ້ປະຕິຍານເພີ່ມຕື່ມວ່າ “ຈະບໍ່ມີສັນຍາອັນໃໝ່ໃດໆເກີດຂຶ້ນ” ໃນຊ່ວງທີ່ທ່ານດຳລົງຕຳແໜ່ງຢູ່.
ສິ່ງທີ່ຍັງບໍ່ທັນຈະແຈ້ງຢູ່ນັ້ນ ແມ່ນວ່າ ທ່ານ Trump ຈະເຫີນຫ່າງອອກຈາກບໍລິສັດທັງຫຼາຍ ຫຼືວ່າທຸລະກິດທັງຫຼາຍຂອງການເອົາບາດກ້າວ ຈະຕົກຢູ່ໃນສະພາບ ພາຍໃຕ້ຖະແຫຼງການ “ບໍ່ມີສັນຍາໃໝ່.” ພວກຊ່ຽວຊານດ້ານກົດໝາຍ ໄດ້ກ່າວວ່າ ວິທີທາງດຽວ ສຳຫຼັບປະທານາທິບໍດີສະຫະລັດ ທີ່ຫາກໍໄດ້ຮັບເລືອກໃໝ່ ທ່ານ Trump ທີ່ຈະຫຼີກລ້ຽງຄວາມຂັດແຍ້ງໃນຜົນປະໂຫຍດຂອງຫຸ້ນຕ່າງໆໃນທຸລະກິດທັງຫຼາຍໃນທົ່ວໂລກແມ່ນຕ້ອງຂາຍມັນອອກໝົດ.
ທ່ານ Trump ພວມດຳເນີນສືບຕໍ່ ປະກອບຄະນະລັດຖະບານຂອງທ່ານ ດ້ວຍ ປະທານບໍລິສັດນ້ຳມັນຍັກໃຫຍ່... ທ່ານ Rex Tillerson ທີ່ຄາດຫວັງຈະປະກາດໃຫ້ເປັນລັດຖະ
ມົນຕີການຕ່າງປະເທດ ໃນເຊົ້າວັນອັງຄານມື້ນີ້. ແຫຼ່ງຂ່າວຫຼາຍແຫ່ງ ທີ່ບົ່ງຊີ້ໃຫ້ເຫັນເຖິງ
ການປະກອບຄະນະຢ່າງເປັນທາງການນັ້ນ ຍັງກ່າວອີກວ່າ ອະດີດ ຜູ້ປົກຄອງລັດ Texas ທ່ານ Rick Perry ຈະຖືກເລືອກໃຫ້ເປັນຜູ້ນຳຂອງກະຊວງພະລັງງານ.
