ປະທານາທິບໍດີສະຫະລັດ ທ່ານ ດໍໂນລ ທຣໍາ ໄດ້ເຊັນລົງນາມຄໍາສັ່ງຝ່າຍບໍລິຫານ ທີ່ກ່ຽວຂ້ອງກັບປັນຍາປະດິດ ຫຼື AI ໃນວັນພະຫັດວານນີ້ ເພື່ອ “ເຮັດໃຫ້ອາເມຣິກາເປັນນະຄອນຫຼວງຂອງໂລກ ໃນດ້ານປັນຍາປະດິດ,” ອີງຕາມຜູ້ຊ່ວຍຂອງທ່ານ ທີ່ກ່າວຕໍ່ບັນດານັກຂ່າວໃນຫ້ອງການ ໂອໂວລ (Oval) ຫຼື ຮູບຊົງໄຂ່ ຂອງທໍານຽບຂາວ.
ຄໍາສັ່ງດັ່ງກ່າວ, ໄດ້ກໍານົດຂອບເຂດເວລາ 180 ວັນສໍາລັບແຜນປະຕິບັດງານຂອງປັນຍາປະດິດ ໃນການສ້າງນະໂຍບາຍ “ເພື່ອຮັກສາ ແລະເສີມຂະຫຍາຍຄວາມເປັນຜູ້ນໍາທາງດ້ານ AI ຂອງອາເມຣິກາຢູ່ໃນທົ່ວໂລກ, ເພື່ອສົ່ງເສີມຄວາມຈະເລີນຮຸ່ງເຮືອງຂອງມະນຸດ, ຄວາມສາມາດໃນການແຂ່ງຂັນທາງດ້ານເສດຖະກິດ, ແລະຄວາມໝັ້ນຄົງແຫ່ງຊາດ.”
ທ່ານ ທຣໍາ, ຍັງໄດ້ບອກໃຫ້ທີ່ປຶກສາດ້ານ AI ແລະຜູ້ຊ່ວຍດ້ານຄວາມໝັ້ນຄົງແຫ່ງຊາດຂອງທ່ານ ເຮັດວຽກເພື່ອລຶບລ້າງນະໂຍບາຍ ພ້ອມທັງກົດລະບຽບທີ່ໄດ້ວາງໄວ້ໂດຍອະດີດປະທານາທິບໍດີ ໂຈ ໄບເດັນ ນໍາອີກດ້ວຍ.
ໃນວັນຈັນທີ່ຜ່ານມາ, ທ່ານ ທຣໍາ ໄດ້ທໍາການຍົກເລີກຄຳສັ່ງຝ່າຍບໍລິຫານ ປີ 2023 ເຊິ່ງລົງນາມໂດຍ ທ່ານ ໄບເດັນ, ທີ່ພະຍາຍາມຫຼຸດຜ່ອນຄວາມສ່ຽງທີ່ AI ອາດມີຕໍ່ບັນດາ ຜູ້ບໍລິໂພກ, ພະນັກງານ ແລະ ຕໍ່ຄວາມໝັ້ນຄົງຂອງແຫ່ງຊາດ.
ຄໍາສັ່ງຂອງ ທ່ານ ໄບເດັນ ຮຽກຮ້ອງໃຫ້ຜູ້ພັດທະນາລະບົບ AI ທີ່ອາດມີຄວາມສ່ຽງຕໍ່ຄວາມໝັ້ນຄົງແຫ່ງຊາດ, ເສດຖະກິດ, ສາທາລະນະສຸກ ຫຼື ຄວາມປອດໄພຂອງ ສະຫະລັດ ນັ້ນ, ຕ້ອງແຈ້ງໃຫ້ຊາບຜົນຂອງການທົດລອງດ້ານຄວາມປອດໄພກັບ ລັດຖະບານ ສະຫະລັດ, ໂດຍໃຫ້ສອດຄ່ອງກັບລັດຖະທໍາມະນູນວ່າດ້ວຍການຜະລິດໃນດ້ານການປ້ອງກັນປະເທດ, ກ່ອນທີ່ພວກມັນຈະຖືກເຜີຍແຜ່ຕໍ່ສາທາລະນະ.
ທ່ານ ທຣໍາ ຍັງໄດ້ລົງນາມໃນຄໍາສັ່ງຝ່າຍບໍລິຫານ ເພື່ອສ້າງຕັ້ງກຸ່ມເຮັດວຽກທາງດ້ານສະກຸນເງິນ Crypto ທີ່ມີໜ້າທີ່ໃນຂອບເຂດຂອງກົດລະບຽບໃໝ່ ສໍາລັບຊັບສິນດິຈິຕອນ ແລະການສໍາຫຼວດໃນການສ້າງຄັງສະກຸນເງິນ Crypto.
ມາດຕະການທີ່ໄດ້ຖືກຄາດການໄວ້ຢ່າງຫຼວງຫຼາຍນີ້ ຍັງໄດ້ສັ່ງໃຫ້ມີການປົກປ້ອງ ພວກບໍລິສັດທີ່ໃຫ້ບໍລິການດ້ານການທະນາຄານສໍາລັບເງິນ Crypto, ແລະຫ້າມການສ້າງສະກຸນເງິນ Crypto ຂອງທະນາຄານກາງ ທີ່ສາມາດແຂ່ງຂັນກັບສະກຸນເງິນ Crypto ຕ່າງໆທີ່ມີຢູ່ແລ້ວ.
ຟໍຣັມສະແດງຄວາມຄິດເຫັນ