ພຽງບໍ່ເທົ່າໃດມື້ ຫຼັງຈາກທີ່ມີການກ່າວຢ້ຳວ່າ ທາງເລືອກທາງທະຫານ ເພື່ອຮັບມືກັບ
ເກົາຫຼີເໜືອ ແມ່ນກຳລັງຢູ່ໃນການພິຈາລະນາ ປະທານາທິບໍດີ Donald Trump
ໄດ້ກ່າວວ່າ ທ່ານເຕັມໃຈທີ່ຈະພົບປະ ກັບຜູ້ນຳເກົາຫຼີເໜືອ ທ່ານ Kim Jong Un.
ຄວາມອາດເປັນໄປໄດ້ໃນການຫັນປ່ຽນຢ່າງໃຫຍ່ ໃນທ່າທີຂອງສະຫະລັດ ຕໍ່ປະເທດ
ທີ່ ເປັນສັດຕູໃນເຂດເອເຊຍ ມີຂຶ້ນໃນຂະນະທີ່ພຽງຢາງຍັງສືບຕໍ່ທຳການທົດລອງ
ລູກສອນໄຟຂີປະນາວຸດ ແລະເຊື່ອວ່າ ພ້ອມແລ້ວ ທີ່ຈະທຳການທົດລອງອາວຸດ
ນິວເຄລຍ ໃຕ້ດິນຄັ້ງທີ 6.
“ຖ້າຫາກວ່າ ມັນຈະເປັນສິ່ງທີ່ສົມຄວນ ສຳຫຼັບຂ້າພະເຈົ້າ ທີ່ຈະພົບປະກັບລາວ,
ຂ້າ ພະເຈົ້າຈະເຮັດແທ້ ຂ້າພະເຈົ້າຖືເປັນກຽດທີ່ຈະກະທຳເຊັ່ນນີ້.” ນັ້ນຄືຄຳເວົ້າ
ຂອງປະ ທານາທິບໍດີ ທີ່ໄດ້ກ່າວເຖິງທ່ານ Kim ໃນການໃຫ້ສຳພາດກັບໂທລະພາບ
ອົງການຂ່າວ Bloomberg ໃນວັນຈັນວານນີ້.
ທ່ານຍັງກ່າວຕໍ່ໄປວ່າ “ພວກທີ່ເປັນນັກການເມືອງສ່ວນໃຫຍ່ ຈະບໍ່ເວົ້າເຊັ່ນນີ້ ແຕ່ວ່າ ຂ້າພະເຈົ້າສາມາດບອກທ່ານໄດ້ວ່າ ພາຍໃຕ້ສະຖານະການທີ່ເໝາະສົມ ຂ້າພະເຈົ້າ ກໍຈະສາມາດພົບລາວໄດ້. ພວກເຮົາມີຂ່າວໃໝ່ທີ່ໜ້າຕື່ນເຕັ້ນ.” ການໃຫ້ຄວາມເຫັນ
ທີ່ວ່ານີ້ ແມ່ນຢູ່ໃນຊ່ວງ 30 ນາທີຂອງການໃຫ້ສຳພາດທີ່ຫ້ອງການ Oval Office ທີ່ີມີຂຶ້ນໃນຂະນະທີ່ກຳປັ່ນບັນທຸກເຮືອບິນຂອງສະຫະລັດ ໄດ້ມຸ່ງໜ້າໄປຍັງແຫຼມເກົາຫຼີ.
ເຊີນຊົມ: ທ່ານ Spicer ກ່າວເຖິງການທີ່ທ່ານ Trump ອາດພົບປະກັບຜູ້ນຳເກົາຫຼີເໜືອ
ໃນການໃຫ້ສຳພາດທາງໂທລະພາບ ທີ່ໄດ້ອອກອາກາດໃນວັນອາທິດຜ່ານມານີ້
ທາງຕາໜ່າງ CBS ໃນລາຍການ “Face the Nation” ປະທານາທິບໍດີ ໄດ້ສະແດງ
ອອກເຖິງການກ່າວຍົກຍ້ອງ ທ່ານ Kim ທີ່ຍັງສາມາດຮັກສາອຳນາດຂອງລາວໄວ້ໄດ້
ໃນປະເທດທີ່ປົກຄອງດ້ວຍລະບອບຜະເດັດການ ທີ່ທ່ານໄດ້ສືບຕໍ່ອຳນາດຈາກພໍ່
ຂອງທ່ານ ໃນໄວ 20 ກວ່າປີ ຊຶ່ງເອີ້ນລາວວ່າ “ລາວເປັນຄົນທີ່ສະຫຼາດ.”
ໂຄສົກປະຈຳທຳນຽບຂາວ ທ່ານ Sean Spicer ໄດ້ປະເຊີນກັບຄຳຖາມກ່ຽວກັບ
ຄວາມຄິດເຫັນຂອງທ່ານ Trump ໃນວັນຈັນວານນີ້.
“ປະທານາທິບໍດີ Trump ເຂົ້າໃຈບໍ່ວ່າ ການຂົ່ມຂູ່ຂອງເກົາຫຼີເໜືອ ແລະທ່ານ ຈະຕ້ອງກະທຳທຸກສິ່ງຢ່າງທີ່ຈຳເປັນ ທີ່ວ່າສະຖານະການນັ້ນແມ່ນເໝາະສົມ ທີ່ຈະປົກປ້ອງປະເທດຊາດຂອງພວກເຮົາຈາກການຂົ່ມຂູ່ ຂອງພວກເຂົາ,” ຊຶ່ງທ່ານ
Spicer ໄດ້ກ່າວໄວ້ ຜູ້ຊຶ່ງໄດ້ກ່າວວ່າ ການພົບປະກັນລະຫວ່າງທ່ານ Trump
ກັບທ່ານ Kim ນັ້ນ “ສະຖານະການທີ່ແຈ່ມແຈ້ງນັ້ນ ແມ່ນຍັງບໍ່ທັນມີຂຶ້ນ ໃນຂະນະນີ້.”
ເຈົ້າໜ້າທີ່ຄົນຫຼ້າສຸດຂອງສະຫະລັດ ທີ່ໄດ້ພົບປະກັບຜູ້ນຳເກົາຫຼີເໜືອ ຊຶ່ງໃນເວລານັ້ນ ແມ່ນລັດຖະມົນຕີການຕ່າງປະເທດທ່ານນາງ Madeleine Albright. ການພົບປະກັນ
ໃນພຽງຢາງ ປີ 2000ແມ່ນກັບພໍ່ຂອງຜູ້ນຳຄົນປະຈຸບັນ ທ່ານ Kim Jong Il. ສະຫະລັດ ແລະເກົາຫຼີເໜືອ ແມ່ນຍັງບໍ່ເຄີຍມີສາຍພົວພັນທາງການທູດ ຊຶ່ງກັນແລະກັນເລີຍ.
ອ່ານຂ່າວນີ້ເພີ້ມຕື່ມເປັນພາສາອັງກິດ
