ທ່ານ ດໍໂນລ ທຣຳ ໄດ້ວາງເງິນຄ້ຳປະກັນມູນຄ່າ 175 ລ້ານໂດລາສະຫະລັດ ໃນຄະດີສໍ້ໂກງທາງແພ່ງ ໃນນະຄອນນິວຢອກ ເມື່ອວັນຈັນວານນີ້, ເພື່ອຫຼີກລ່ຽງການຍຶດຊັບສິນໂດຍໜ່ວຍງານຂອງລັດ ທີ່ອາດສົ່ງຜົນກະທົບຕໍ່ອານາຈັກທຸລະກິດຂອງອະດີດປະທານາທິບໍດີ ສະຫະລັດ, ອີງຕາມອົງການຂ່າວຣອຍເຕີສ.
ທ່ານ ທຣຳ ຈາກພັກຣີພັບບລີກັນ ເຊິ່ງກຽມຈະປະເຊີນໜ້າກັບປະທານາທິບໍດີ ຈາກພັກເດໂມແຄຣັດ ທ່ານ ໂຈ ໄບເດັນ ໃນການເລືອກຕັ້ງ ໃນເດືອນພະຈິກ ຂອງສະຫະລັດ, ຊຶ່ງໃນວັນທີ 16 ກຸມພາ ໄດ້ຖືກພົບເຫັນວ່າ ຕ້ອງຮັບຜິດຊອບ ສຳລັບການສໍ້ໂກງ ທີ່ແຈ້ງມູນຄ່າຊັບສົມບັດລວມຂອງທ່ານສູງຂຶ້ນຫຼາຍພັນລ້ານໂດລາ ເພື່ອຈະໄດ້ຮັບເງື່ອນໄຂໃນການກູ້ເງິນ ແລະເງືອນໄຂໃນດ້ານການປະກັນໄພທີ່ດີຂຶ້ນ.
ໃນເບື້ອງຕົ້ນ ທ່ານທຣໍາ ຈຳເປັນຕ້ອງວາງເງິນຄ້ຳປະກັນຈຳນວນ 454 ລ້ານໂດລາ, ແຕ່ສານອຸທອນ ໃນວັນທີ 25 ມີນານີ້ ຍັງຄົງບັງຄັບໃຊ້ຄໍາຕັດສິນຂອງຜູ້ພິພາກສາ ທ່ານ ອາເທີ ເອນໂກຣອນ (Arthur Engoron) ໃນເງື່ອນໄຂທີ່ ທ່ານ ທຣຳ ຈະຕ້ອງຈ່າຍເງິນຈໍານວນນ້ອຍກວ່ານັ້ນ ພາຍໃນ 10 ມື້.
ຄະນະຜູ້ພິພາກສາສາມຄົນຂອງສານອຸທອນ ຈະຮັບຟັງຄຳອຸທອນຂອງທ່ານ ທຣຳ ຕາມຂໍ້ດີຕ່າງໆ. ການຕັດສິນຂອງສານອຸທອນທີ່ໄດ້ຫຼຸດຜ່ອນເງິນຄໍ້າປະກັນ ບໍ່ໄດ້ຊີ້ບອກວ່າ ຄະນະຜູ້ພິພາກສາດັ່ງກ່າວຈະຕັດສິນແນວໃດ ໃນທີ່ສຸດ.
ເງິນຄໍ້າປະກັນດັ່ງກ່າວ ໄດ້ປ້ອງກັນບໍ່ໃຫ້ ໄອຍະການສູງສຸດຂອງ ລັດນິວຢອກ ທ່ານ ນາງ ເລທິເຊຍ ເຈມສ໌ (Letitia James) ຕິດຕາມຊັບສິນຂອງທ່ານ ທຣຳ, ເຊິ່ງລວມທັງ Trump Tower, ຣີສອດ ແລະສະຫນາມກອຟ ຂະໜາດ 370 ເອກເກີ ຂອງທ່ານ ໃນ ເມຶອງເວັສເຊັສເຕີ (Westchester) ແລະບ້ານພັກ Mar-a-Lago estate ໃນ ລັດຟລໍຣີດາ.
ທ່ານ ທຣຳ ໄດ້ປະຕິເສດການກະທຳຜິດ ແລະກ່າວວ່າ ຄະດີດັ່ງກ່າວແມ່ນເປັນການວິທິການໂຈມຕີທາງດ້ານການເມືອງ ໂດຍ ທ່ານນາງ ເຈມສ໌ (James), ສະມາຊິກພັກເດໂມແຄຣັດ ທີ່ຟ້ອງຮ້ອງ ທ່ານ ໃນປີ 2022.
ຟໍຣັມສະແດງຄວາມຄິດເຫັນ