ລິ້ງ ສຳຫລັບເຂົ້າຫາ

logo-print

ທ່ານ ທ​ຣຳ ປົດ​ເຈົ້າ​ໜ້າ​ທີ່ ລະ​ດັບ​ສູງ​ ຂອງ​ທຳ​ນຽບ​ຫ້າ​ແຈ ອອກ​ຈາກ​ຕຳ​ແໜ່ງ


ປະ​ທາ​ນາ​ທິ​ບໍ​ດີ ດໍ​ໂນ​ລ ທ​ຣຳ ກ່າວ​ຄຳ​ປາ​ໄສ​ຢູ່​ຫ້ອງ​ການ​ປະ​ທາ​ນາ​ທິ​ບໍ​ດີ ໃນ​ທຳ​ນຽບ​ຂາວ.

ປະ​ທາ​ນາ​ທິ​ບໍ​ດີ​ ສະ​ຫະ​ລັດ ທ່ານ ດໍ​ໂນ​ລ ທ​ຣຳ ໄດ້​ປົດ​ເຈົ້າ​ໜ້າ​ທີ່​ໆ​ຮັບ​ຜິດ​ຊອບ ກ່ຽວ​ກັບ ​ນະ​ໂຍ​ບາຍ​ ລະ​ດັບ​ສູງ​ຂອງ​ທຳ​ນຽບ​ຫ້າ​ແຈ ​ອອກ​ຈາກ​ຕຳ​ແໜ່ງ​ໃນ​ວັນ​ພຸດ​ວານນີ້, ເປັນ​ສະ​ມາ​ຊິກ​ອາ​ວຸ​ໂສ​ຄົນຫຼ້າ​ສຸດ​ຂອງ​ລັດ​ຖະ​ບານ​ ທີ່​ໄດ້​ສູນ​ເສຍ​ວຽກ​ງານ ເຊິ່ງ​ປາ​ກົດ​ວ່າ​ຍ້ອນ​ຄວາມ​ໂມ​ໂຫ​ທີ່​ຍັງ​ມີ​ຢູ່​ຂອງ​ທ່ານ ທ​ຣຳ ກ່ຽວ​ກັບ ການ​ຟ້ອງ​ຮ້ອງ ແລະ ຢູ​ເຄ​ຣນ.

ລັດ​ຖະ​ມົນ​ຕີ​ຊ່ວຍ​ກະ​ຊວງ​ປ້ອງ​ກັນ​ປະ​ເທດ ທີ່​ຮັບ​ຜິດ​ຊອບ​ກ່ຽວ​ກັບ​ນະ​ໂຍ​ບາຍ ທ່ານ ຈອນ ຣູດ ໄດ້​ໃຫ້​ການ​ຢືນ​ຢັນ​ເມື່ອ​ປີ​ກາຍນີ້​ວ່າ ຢູ​ເຄ​ຣນ ໄດ້​ທຳ​ຄວາມ​ກ້າວ​ໜ້າ​ພຽງ​ພໍ​ໃນ​ການ​ຕໍ່​ສູ້​ກັບ​ການ​ສໍ້​ລາດ​ບັງຫຼວງ ເພື່ອ​ໃຫ້​ໄດ້​ຮັບ​ເງິນ​ຊ່ວຍ​ເຫຼືອ​ທາງ​ທະ​ຫານ​ຂອງ ສະ​ຫະ​ລັດ ເກືອບ 400 ລ້ານ​ໂດ​ລາ, ສີ່​ເດືອນ​ກ່ອນ​ທີ່​ເງິນ​ດັ່ງ​ກ່າວ​ໄດ້​ຖືກ​ປ່ອຍ​ຢ່າງ​ແທ້​ຈິງ.

ທ່ານ ຣູດ ບໍ່​ໄດ້​ກ່າວ​ເຖິງ ຢູ​ເຄ​ຣນ ໃນ​ຈົດ​ໝາຍ​ລາ​ອອກ​ຕໍ່​ທ່ານ ທ​ຣຳ, ມີ​ແຕ່​ເວົ້າ​ວ່າ​ທ່ານ​ມີ​ຄວາມ​ເຂົ້າ​ໃຈ​ ຈາກ​ລັດ​ຖະ​ມົນ​ຕີ​ປ້ອງ​ກັນ​ປະ​ເທດ​ວ່າ​ທ່ານ ທ​ຣຳ ໄດ້​ຂໍ​ໃຫ້​ລາວ​ລາ​ອອກ​ຈາກ​ຕຳ​ແໜ່ງ.

ໂຄ​ສົກ​ທຳ​ນຽບ​ຫ້າ​ແຈ​ທ່ານ​ນຶ່ງ​ມີ​ແຕ່​ໄດ້​ເວົ້າ​ວ່າ “ທ່ານ​ປະ​ທາ​ນາ​ທິ​ບໍ​ດີ​ມີ​ໂອ​ກາດ ແລະ ຄວາມ​ສາ​ມາດ​ທີ່​ຈະ​ມີ​ທີມ​ງານ​ທີ່​ທ່ານ​ຢາກ​ໄດ້​ ໃນ​ຕຳ​ແໜ່ງ​ນະ​ໂຍ​ບາຍ” ແລະ “ສາ​ມາດ​ທຳ​ການ​ຕັດ​ສິ​ນ​ໃຈ​ທີ່​ຈະ​ຫັນ​ຫາ​ທິດ​ທາງ​ອື່ນ.”

ຫຼັງ​ຈາກ​ລັດ​ຖະ​ສະ​ພາ​ໄດ້​ອະ​ນຸ​ມັດ​ເງິນ​ເກືອບ 400 ລ້ານ​ໂດ​ລາ​ໃນ​ການ​ຊ່ວຍ​ເຫຼືອ​ທີ່​ຕ້ອງ​ການ​ຢ່າງ​ແຮງ​ໃຫ້ ຢູ​ເຄ​ຣນ ນັ້ນ, ທ່ານ ຣູດ ໄດ້​ໃຫ້​ການ​ຢືນ​ຢັນ​ໃນ​ເດືອນ​ພຶດ​ສະ​ພາ 2019 ວ່າ ຢູ​ເຄ​ຣນ “ໄດ້​ທຳ​ການ​ດຳ​ເນີນ​ການ​ທີ່​ສຳ​ຄັນ ເພື່ອ​ປ້ອງ​ກັນ ແລະ ປະ​ຕິ​ຮູບ​ສະ​ຖາ​ບັນ​ ສຳ​ລັບ​ຈຸດ​ປະ​ສົງ​ການຫຼຸດ​ຜ່ອນ​ການ​ສໍ້​ລາດ​ບັງຫຼວງ.” ການ​ໃຫ້​ຄຳ​ຢືນ​ຢັນ​ດັ່ງ​ກ່າວ​ແມ່ນ​ຈຳ​ເປັນ​ ກ່ອນ​ທີ່​ເງິນ​ດັ່ງ​ກ່າວ​ຈະ​ສາ​ມາດ​ຖືກ​ປ່ອຍ​ອອກ​ໄດ້.

ແຕ່​ການ​ໃຫ້​ຄຳ​ຢືນ​ຢັນ​ຂອງ​ທ່ານ ຣູດ ໄດ້​ທຳ​ລາຍ​ການ​ຢືນ​ຢັດ​ຂອງ​ທຳ​ນຽບ​ຂາວ​ທີ່​ວ່າ ການ​ສໍ້​ລາດ​ບັງຫຼວງ​ໃນ ຢູ​ເຄ​ຣນ ແມ່ນ​ບັນ​ຫາ​ທີ່​ກຳ​ລັງ​ເກີດ​ຂຶ້ນ​ຢູ່​ແມ່ນ​ເຫດ​ຜົນ​ທີ່​ຈະ​ສືບ​ຕໍ່​ກັກ​ເງິນ​ທຶນ​ນັ້ນ​ໄວ້.

ທຳ​ນຽບ​ຂາວ ໄດ້​ຢືນ​ຢັດ​ມາ​ຕະຫຼອດ​ວ່ານີ້​ແມ່ນ​ເຫດ​ຜົນ, ແມ່ນ​ກະ​ທັ້ງ​ນັກ​ການ​ທູດ​ລະ​ດັບ​ສູງ ສະ​ຫະ​ລັດ ໄດ້​ເລີ່ມ​ທີ່​ຈະ​ຮູ້​ວ່າ ທ່ານປະ​ທາ​ນາ​ທິ​ບໍ​ດີ​ຢາກ​ໃຫ້ ຢູ​ເຄ​ຣນ ດຳ​ເນີນ​ການ​ສືບ​ສວນ​ສອບ​ສວນ​ ຜູ້​ລົງ​ແຂ່ງ​ຂັນ​ເອົາ​ຕຳ​ແໜ່ງ​ປະ​ທາ​ນາ​ທິ​ບໍ​ດີ​ສັງ​ກັດ​ພັກ​ເດ​ໂມ​ແຄ​ຣັດ ທ່ານ ໂຈ ໄບ​ເດັນ ເພື່ອ​ເປັນ​ການ​ແລກ​ປ່ຽນ​ກັບ​ການ​ຊ່ວຍ​ເຫຼືອ.

ທ່ານ ຣູ​ດ ໄດ້​ກ່າວ​ຕໍ່​ບັນ​ດາ​ນັກ​ຂ່າວ​ປີ​ກາຍນີ້​ວ່າ “ໃນ​ສອງ​ສາມ​ອາ​ທິດ​ຫຼັງ​ຈາກ​ໄດ້​ເຊັນ​ການ​ຢືນ​ຢັນ​ນັ້​ນ, ຂ້າ​ພະ​ເຈົ້າ​ຮູ້​ວ່າ​ການ​ຊ່ວຍ​ເຫຼືອ​ນັ້ນ​ໄດ້​ຖືກ​ກັກ​ໄວ້. ຂ້າ​ພະ​ເຈົ້າ​ບໍ່​ເຄີຍ​ໄດ້​ຮັບ​ການ​ອະ​ທິ​ບາຍ​ທີ່​ກະ​ຈ່າງ​ແຈ້ງ ນອກ​ຈາກວ່າ​ມັນ​ມີ​ຄວາມ​ເປັນ​ຫ່ວງ ກ່ຽວ​ກັບ ການ​ສໍ້​ລາດ​ບັງຫຼວງ​ໃນ ຢູ​ເຄ​ຣນ.

ອ່ານ​ຂ່າວນີ້​ເປັນ​ພາ​ສາ​ອັງ​ກິດ

ທ່ານອາດຈະມັກເລື້ອງນີ້ຄືກັນ

XS
SM
MD
LG