ປະທານາທິບໍດີສະຫະລັດ ທ່ານດໍໂນລ ທຣຳ ໄດ້ເລື່ອນການພົບປະ ທີ່ມີການຄາດໝາຍ
ກັນໄວ້ເປັນຢ່າງສູງ ເພື່ອສົນທະນາກ່ຽວກັບການຢູ່ໃນຕຳແໜ່ງຕໍ່ໄປຂອງຮອງລັດຖະມົນ
ຕີກະຊວງຍຸຕິທຳທ່ານຣອດ ໂຣເຊັນສໄຕນ໌. ມີລາຍງານວ່າປະທານາທິບໍດີ ພວມພິຈາລະ
ນາ ທີ່ຈະປົດທ່ານອອກຈາຕຳແໜ່ງ ຊຶ່ງເປັນຜູ້ດູແລການສືບສວນພິເສດກ່ຽວກັບການ
ແຊກແຊງຂອງຣັດເຊຍເຂົ້າໃນການເລືອກ ຕັ້ງປີ 2016 ຊຶ່ງຈະພົບປະກັບທ່ານ ໃນອາທິດ
ໜ້ານີ້.
ໂຄສົກທຳນຽບຂາວ ທ່ານນາງແຊຣາ ຮັກກາບີ ແຊນເດີຣສ໌ ກ່າວຢູ່ໃນຖະແຫຼງການວ່າ
ທັງສອງທ່ານໄດ້ໂອ້ລົມກັນໃນວັນພະຫັດວານນີ້ແລະຕົກລົງທີ່ຈະເລື່ອນເວລາອອກໄປ
ເພື່ອບໍ່ໃຫ້ເປັນການຫັນເຫຄວາມສົນໃຈ ໄປຈາກການຮັບຟັງຄຳໃຫ້ການ ຂອງຄະນະ
ກຳມະການຕຸລາການສະພາສູງ ຈາກຜູ້ພິພາກສາ ແບຣັຕ ຄາແວນໍ ແລະທ່ານນາງຄຣິສ
ຕິນ ເບລຊີ ຝອດ.
ປະທານາທິບໍດີໄດ້ຕ້ອງຕິກະຊວງຍຸຕິທຳ ໃນການຮັບມືກັບການສືບສວນກ່ຽວກັບການ
ແຊກແຊງຂອງຣັດເຊຍມາເປັນເວລາຫລາຍເດືອນແລ້ວ ແຕ່ຄວາມເຄັ່ງຕຶງລະຫວ່າງ
ທ່ານທຣຳ ແລະທ່ານໂຣເຊັນສໄຕນ໌ ປາກົດວ່າ ໄດ້ມີເພີ້ມຂຶ້ນ ໃນອາທິດແລ້ວນີ້ ເວລາ
ໜັງສືພິມນິວຢອກໄທມ໌ ໄດ້ລາຍງານວ່າ ທ່ານໂຣເຊັນສໄຕນ໌ ໄດ້ສະເໜີແນະ ໃຫ້ບັນທຶກ
ສຽງທ່ານທຣຳຢ່າງລັບໆ ເພື່ອໄວ້ເປັນຫລັກຖານ ໃນຄວາມຕັ້ງໃຈທີ່ສະແດງໃຫ້ເຫັນວ່າ
ປະທານາທິບໍດີບໍ່ເໝາະສົມທີ່ຈະປົກຄອງປະເທດ. ທ່ານໂຣເຊັນສະໄຕນ໌ ໄດ້ອອກຖະ
ແຫລງການ 2 ສະບັບປະຕິເສດຕໍ່ການກ່າວຫາດັ່ງກ່າວ.
ໃນຕອນເຊົ້າວັນພະຫັດວານນີ້ ທີ່ປຶກສາປະທານາທິບໍດີ ທ່ານນາງແຄລລີອານ ຄອນເວ
ກ່າວຢູ່ໃນລາຍການໂທລະພາບ “ຟັອກສ໌ ແອນ ແຟຣນສ໌” ວ່າ ທັງທ່ານທຣຳ ແລະທ່ານ
ໂຣເຊັນສໄຕນ໌ “ຕ່າງກໍໄດ້ເຫັນພ້ອມທີ່ຈະໂອ້ລົມກັນແລະແກ້ໄຂບັນຫາດັ່ງກ່າວ ໃຫ້ລຸ
ລ່ວງໄປທັງໝົດ.”
ບັນດາພັນທະມິດພັກຣີພັບບລິກັນຂອງປະທານາທິບໍດີ ກຳລັງຮຽກຮ້ອງໃຫ້ທ່ານໂຣ
ເຊັນສໄຕນ໌ ໄປໃຫ້ການຕໍ່ລັດຖະສະພາ ກ່ຽວກັບການສະເໜີ ທີ່ມີການກ່າວຫາວ່າ ໃຫ້
ລັກບັນທຶກສຽງທ່ານທຣຳແບບລັບໆ ແລະຄຳຖະແຫລງຂອງທ່ານໂຣເຊັນສໄຕນ໌ ກ່ຽວ
ກັບບົດແກ້ໄຂລັດຖະທຳມະນູນຂໍ້ທີ 25 ຊຶ່ງເປັນຂັ້ນຕອນ ທີ່ກຳນົດໄວ້ ໃນການປົດປະ
ທານາທິບໍດີ ອອກຈາກຕຳແໜ່ງ.
ໂດຍຜ່ານການຂຽນລົງທາງທວິດເຕີ ສະມາຊິກສະພາຕ່ຳທ່ານມາກ ມີໂດສ ປະທານ
ກຸ່ມເສລີພາບທີ່ເປັນພັນທະມິດກັບທຣຳ ກ່າວວ່າຄວາມບໍ່ສາມາດທີ່ຈະສອບຖາມຮອງ
ລັດຖະມົນຕີກະຊວງຍຸຕິທຳ ກ່ຽວກັບບັນຫາດັ່ງກ່າວ ຈະເທົ່າກັບ ເປັນ “ປະຖິ້ມໜ້າທີ່.”
ກຸ່ມເສລີພາບ ຫຼື Freedom Caucus ໄດ້ອອກຖະແຫລງການຢ່າງເປັນທາງການ
ຮຽກຮ້ອງໃຫ້ທ່ານໂຣເຊັນສໄຕນ໌ ໄປໃຫ້ການ.
