ເຖິງແມ່ນການເຈລະຈາ ທີ່ປະເທດຫວຽດນາມ ໄດ້ພັງທະລາຍລົງ ໃນອາທິດນີ້ກໍຕາມ ແຕ່ປະທານາທິບໍດີສະຫະລັດ ທ່ານດໍໂນລ ທຣຳ ເບິ່ງຄືວ່າ ບໍ່ມີຄວາມຮູ້ສຶກໂກດແຄ້ນໃດໆ ຕໍ່ຜູ້ນຳຂອງເກົາຫຼີເໜືອ ທ່ານກິມ ຈົງ ອຶນ ໂດຍເອີ້ນທ່ານກິມວ່າ “ຜູ້ນຳທີ່ແທ້ຈິງ.”
ໃນລາຍການໃຫ້ສຳພາດທາງໂທລະພາບທີ່ມີການບັນທຶກພາບຢູ່ຮາໂນ່ຍກັບ Sean Hannity ຂອງລາຍການ Fox News ທີ່ອອກອາກາດໃນຄືນວັນພະຫັດວານນີ້ ປະທານາທິບໍດີທຣຳ ໄດ້ກ່າວເຖິງ ທ່ານກິມວ່າ “ສະຫຼາດ ເທົ່າທີ່ສາມາດເປັນໄດ້” ແລະ “ປ່ຽນໃຈງ່າຍ.”
ນອກນັ້ນ ທ່ານທຣຳຍັງເວົ້າວ່າ ທ່ານມັກນິໄສຂອງທ່ານກິມແລະທ່ານກິມກໍມັກນິໄສທ່ານ. “ບາງຄົນເວົ້າວວ່າ ໂອ ເຈົ້າບໍ່ຄວນຈະມັກລາວ. ຂ້າພະເຈົ້າຂໍເວົ້າວ່າ ເປັນຫຍັງຈຶ່ງບໍ່ຄວນມັກລາວ.” ທ່ານກ່າວວ່າ ພວກທ່ານທັງສອງ “ຖືກນິໄສກັນເປັນຢ່າງດີ.”
ມີການກຽມໂຕະອາຫານສຳລັບກິນເຂົ້າທ່ຽງສະເຫຼີມສະຫຼອງທີ່ໂຮງແຮມເມໂທຣໂພລ ແລະກະກຽມພິທີເຊັນຂໍ້ຕົກລົງສຳລັບທ່ານທຣຳ ແລະທ່ານກິມ. ແຕ່ລາຍການທັງສອງໄດ້ຖືກຍົກເລີກຢ່າງຟ້າວຟັ່ງກ່ອນທ່ຽງຂອງວັນພະຫັດວານນີ້ ເຮັດໃຫ້ການພົບປະສຸດຍອດຄັ້ງທີສອງສິ້ນສຸດລົງກ່ອນກຳນົດ ໂດຍພວກຜູ້ນຳຂອງທັງສອງປະເທດ.
ປະທານາທິບໍດີທຣຳ ກ່າວຕໍ່ກອງປະຊຸມຖະແຫຼງຂ່າວ ກ່ອນອອກເດີນທາງ ຈາກນະຄອນຫຼວງຮາໂນ່ຍຂອງຫວຽດນາມວ່າ “ເຈົ້າຕ້ອງໄດ້ກະກຽມສະເໝີທີ່ຈະຍ່າງອອກ” ທ່ານກ່າວຕື່ມວ່າ “ຂ້າພະເຈົ້າສາມາດ ທີ່ຈະລົງນາມ ໃນສິ່ງໃດສິ່ງນຶ່ງມື້ນີ້” ແລະໃຫ້ການຢືນຢັນວ່າ “ພວກເຮົາມີເອກກະສານພ້ອມແລ້ວ ທີ່ຈະລົງນາມ.”
ປະທານາທິບໍດີທຣຳ ກ່າວຕື່ມວ່າ ທ່ານກິມ ຕ້ອງການຢາກໃຫ້ຍົກເລີກ ການລົງໂທດທັງໝົດ ແລະທ່ານກ່າວວ່າ ສະຫະລັດບໍ່ສາມາດເຮັດຈັ່ງຊັ້ນໄດ້. ທ່ານທຣຳໃຫ້ການອະທິບາຍວ່າ “ພວກເຂົາເຈົ້າເຕັມໃຈ ທີ່ຈະປົດອາວຸດນິວເຄລຍ ໃນພາກສ່ວນໃຫຍ່ໆທີ່ພວກເຮົາຕ້ອງການ ແຕ່ພວກເຮົາບໍ່ສາມາດຍົກເລີກການລົງໂທດທັງໝົດຍ້ອນເລື້ອງນັ້ນ.” ທ່ານກ່າວວ່າ ພວກເຂົາເຈົ້າໄດ້ໂອ້ລົມ ກ່ຽວກັບການທັບມ້າງ ໂຮງໄຟຟ້ານິວເຄລຍຢົງບີຢອນແຕ່ເລື້ອງທີ່ຊັບຊ້ອນແມ່ນເຕົາແຍກທາດຢູເຣນຽມອີກແຫ່ງນຶ່ງ.
ອີງຕາມທ່ານທຣຳແລ້ວ ທ່ານກິມໄດ້ສັນຍາ ໃນງານລ້ຽງຮັບຮອງອາຫານຄ່ຳຄືນກ່ອນວ່າ ເກົາຫຼີເໜືອຈະບໍ່ທຳການທົດລອງອາວຸດນິວເຄລຍຫຼືລູກສອນໄຟໃດໆຕື່ມອີກ.
ລັດຖະມົນຕີຕ່າງປະເທດເກົາຫຼີເໜືອ ທ່ານນີ ຢົງ ໂຮ ທີ່ກອງປະຊຸມຖະແຫຼງຂ່າວໃນຕອນທ່ຽງຄືນ ແບບທີ່ບໍ່ຄ່ອຍເຫັນກັນ ຢູ່ນະຄອນຫຼວງຮາໂນ່ຍ ໄດ້ປະກາດວ່າຈຸດຢືນໃນການເຈລະຈາຂອງປະເທດທ່ານ ຈະບໍ່ມີການປ່ຽນແປງໃດໆເຖິງແມ່ນສະຫະລັດຈະເປີດການເຈລະຈາຕື່ມອີກກໍຕາມ.
ຢູ່ທີ່ການພົບປະສຸດຍອດເປັນເວລາສອງມື້ນັ້ນ ຝ່າຍອາເມຣິກັນໄດ້ຮຽກຮ້ອງໃຫ້ມີການຜ່ອນຜັນຕື່ມອີກຂໍ້ນຶ່ງ ຈາກພຽງຢາງ ນອກເໜືອໄປຈາກ ການທັບມ້າງ ໂຮງໄຟຟ້ານິວເຄລຍຢົງບີຢອນແລ້ວ ອີງຕາມ ຄຳຖະແຫຼງຂອງທ່ານນີ ຕໍ່ພວກນັກຂ່າວ ຢູ່ທີ່ໂຮງແຮມ Melia ບ່ອນທີ່ທ່ານກິມພັກຢູ່ນັ້ນ.
