ລິ້ງ ສຳຫລັບເຂົ້າຫາ

logo-print

ທ່ານ ທ​ຣຳ: ຖ້າ​ສັນ​ຍາ​ ສະ​ຫງົບ​ເສິກ ດຳ​ເນີນ​ຕໍ່​ໄປ, ຂ້າ​ພະ​ເຈົ້າ​ຈະ​ເອົາ​ຊື່ ຂອງ​ຂ້າ​ພະ​ເຈົ້າ ​ໃສ່​ຂໍ້​ຕົກ​ລົງ ສັນ​ຕິ​ພາບ ຕາ​ລີ​ບານ


​ປະ​ທາ​ນາ​ທິ​ບໍ​ດີ ດໍ​ໂນ​ລ ທ​ຣຳ ໃຫ້​ຄຳ​ເຫັນ​ຕໍ່​ສື່ມວນ​ຊົນ ໃນ​ຂະ​ນະ​ທີ່​ທ່ານ​ເດີນ​ທາງ​ອອກ​ຈາກ​ທຳ​ນຽບ​ຂາວ ໄປ​ປະ​ເທດ ອິນ​ເດຍ. 23 ກຸມ​ພາ, 2020.

ປະ​ທາ​ນາ​ທິ​ບໍ​ດີ ສະ​ຫະ​ລັດ ທ່ານ ດໍ​ໂນ​ລ ທ​ຣຳ ໄດ້​ກ່າວ​ໃນ​ວັນ​ອາ​ທິດ​ວານນີ້​ວ່າ ສັນ​ຍາສະ​ຫງົບ​ເສິ​ກສ່ວນ​ນຶ່ງ 7 ວັນ​ກັບ​ກຸ່ມ​ຕາ​ລີ​ບານ ອັ​ຟ​ກາ​ນິ​ສ​ຖານ ແມ່ນໄດ້ “ດຳ​ເນີນ​ການ​ປະ​ຕິ​ບັດ​ການ” ແລະ ມັນ​ອາດ​ນຳ​ໄປ​ສູ່​ການ​ເຊັນ​ຂໍ້​ຕົກ​ລົງ​ສັນ​ຕິ​ພາບ​ຂອງ​ກັບ​ກຸ່ມ​ກະ​ບົດ​ໃນ​ທີ່​ສຸດ ເຊິ່ງ​ມີ​ກຳ​ນົດ​ໃນ​ອາ​ທິດນີ້.

ຄຳ​ເຫັນ​ຂອງ​ທ່ານ ທ​ຣຳ ໄດ້​ມີ​ຂຶ້ນ​ນຶ່ງວັນຫຼັງ​ຈາກ “ການຫຼຸດ​ຜ່ອນ​ຄວາມ​ຮຸນ​ແຮງ” ໄດ້​ມີ​ຜົນ​ບັງ​ຄັບ​ໃຊ້​ທົ່ວ ອັ​ຟ​ກາ​ນິ​ສ​ຖານ ໃນ​ວັນ​ເສົາ​ທີ່​ຜ່ານ​ມາ, ພ້ອມ​ດ້ວຍ​ກຸ່ມ​ຕາ​ລີ​ບານ ກັບ ກອງ​ກຳ​ລັງ​ ອັ​ຟ​ກາ​ນິ​ສ​ຖານ ໄດ້​ຕົກ​ລົງ​ກັນ​ທີ່​ຈະ​ບໍ່​ເປີດ​ການ​ປະ​ຕິ​ບັດ​ການ​ໂຈມ​ຕີ​ຕ່າງໆ​ເປັນ​ເວ​ລາ​ນຶ່ງ​ອາ​ທິດ.

ທ່ານ ທ​ຣຳ ໄດ້​ກ່າວ​ຕໍ່​ບັນ​ດາ​ນັກ​ຂ່າວ​ກ່ອນ​ການ​ເດີນ​ທາງ​ໄປ ອິນ​ເດຍ ວ່າ “ຂ້າ​ພະ​ເຈົ້າ​ຢາກ​ເຫັນວ່າ ​ໄລ​ຍະ​ເວ​ລາ​ນຶ່ງ​ອາ​ທິດນີ້​ຈະ​ເປັນ​ແນວ​ໃດ.” ທ່ານ​ໄດ້​ກ່າວ​ວ່າ ໄລ​ຍະ​ເວ​ລາ​ການ​ສະ​ຫງົບ​ເສິກ “ໄດ້​ດຳ​ເນີນ​ຂຶ້ນ” ແຕ່​ທ່ານ ທ​ຣຳ ໄດ້​ກ່າວ​ຢ້ຳ​ວ່າ ຄວາມ​ກ້າວ​ໃນ​ວັນ​ທີ່​ເຫຼືອ​ແມ່ນ​ມີ​ຄວາມ​ສຳ​ຄັນ​ ເພື່ອ​ເອົາ​ບາດ​ກ້າວ​ຕໍ່​ໄປ​ໃນ​ຂະ​ບວນ​ການ​ສັນ​ຕິ​ພາບ ອັ​ຟ​ກາ​ນິ​ສ​ຖານ.

ການຫຼຸດ​ຜ່ອນ​ຄວາມ​ຮຸນ​ແຮງ” ແມ່ນ​ມີ​ຈຸດ​ປະ​ສົງ​ທີ່​ຈະ​ປູ​ທາງ​ໄປ​ສູ່​ການ​ເຊັນ​ຂໍ້​ຕົກ​ລົງ​ຮອບ​ດ້ານ​ລະ​ຫວ່າງ ສະ​ຫະ​ລັດ ກັບ ພວກ​ເຈົ້າ​ໜ້າ​ທີ່​ກຸ່ມ​ຕາ​ລີ​ບານ ໃນ​ປະ​ເທດ ກາ​ຕ້າ ໃນ​ອາ​ທິດນີ້ ທີ່​ຈະກະ​ກຽມ​ການ​ຖອນ​ກຳ​ລັງ ສະ​ຫະ​ລັດ ເພື່ອ​ສິ້ນ​ສຸດ​ສົງ​ຄາມ​ທີ່​ຍາວທີ່​ສຸດ​ຂອງ ອາ​ເມ​ຣິ​ກາ ນັ້ນ.

ທ່ານ ທ​ຣຳ ໄດ້​ກ່າວ​ເມື່ອ​ຖືກ​ຖາມ​ວ່າ​ທ່ານ​ຈະ​ເຊັນ​ຂໍ້​ຕົກ​ລົງ​ລະ​ຫວ່າງ ສະ​ຫະ​ລັດ ກັບ ກຸ່ມ​ຕາ​ລີ​ບານ ຫຼືບໍ່​ໃນ​ວັນ​ເສົາ​ທີ່​ຜ່ານ​ມາ​ນັ້ນ, ທ່ານ​ໄດ້​ຕອບ​ວ່າ “ຖ້າ​ມັນ​ໄດ້​ຜົນ​ໃນ​ໄລ​ຍະ​ເວ​ລາບໍ່​ເຖິງ​ນຶ່ງ​ອາ​ທິດນີ້, ຂ້າ​ພະ​ເຈົ້າ​ຈະ​ເອົາ​ຊື່​ຂອງ​ຂ້າ​ພະ​ເຈົ້າ​ໃສ່​ມັນ. ແມ່ນ​ແລ້ວ. ມັນ​ເຖິງ​ເວ​ລາ​ກັບ​ບ້ານ​ແລ້ວ.”

ປະ​ທາ​ນາ​ທິ​ບໍ​ດີ ສະ​ຫະ​ລັດ ໄດ້​ກ່າວ​ວ່າ “ແລະ ເຂົາ​ເຈົ້າ​ຢາກ​ທີ່​ຈະ​ຢຸດ. ຂ້າ​ພະ​ເຈົ້າ​ຄິດ​ວ່າ ພວກ​ຕາ​ລີ​ບານ ກໍ​ຢາກ​ເຮັດ​ຂໍ້​ຕົກ​ລົງ​ຄື​ກັນ. ເຂົາ​ເຈົ້າ​ເມື່ອຍ​ຕໍ່​ສູ້​ແລ້ວ.”

ຄູ່​ປໍ​ລະ​ປັກ​ທັງ​ສອງ​ຝ່າຍ​ນັ້ນ​ໄດ້​ຕົກ​ລົງ​ກັນ ກ່ຽວ​ກັບ ຮ່າງ​ຂໍ້​ຕົກ​ລົງ​ສະ​ບັບ​ນຶ່ງ ໃນ​ການ​ເຈ​ລະ​ຈາ​ທີ່​ມີ​ການ​ໂຕ້​ແຍ້ງ​ກັນ​ໄປ​ມາເປັນ​ໄລ​ຍະ​ເວ​ລາ 18 ເດືອນ, ເຊິ່ງ​ເປັນ​ເຈົ້າ​ພາບ​ໂດຍ​ລັດ​ຖະ​ບານ ໂດ​ຮາ, ປະ​ເທດ ກາ​ຕ້າ. ປະ​ເທດ​ທີ່​ຕັ້ງ​ຢູ່ອ່າວ​ເປີ​ເຊຍ ດັ້ງ​ກ່າວ ແມ່ນ​ບ່ອນ​ທີ່​ກຸ່ມ​ຕາ​ລີ​ບານ ຕັ້ງ​ຫ້ອງ​ການ​ທາງ​ການ​ເມືອງ​ຂອງ​ພວກ​ເຂົາ​ຢູ່.

ໃນ​ຂະ​ນະ​ດຽວ​ກັນ, ນັກ​ການ​ທູດ​ອາ​ວຸ​ໂສ ກະ​ຊວງ​ການ​ຕ່າງ​ປະ​ເທດ ກາ​ຕ້າ ທ່ານ​ນຶ່ງ​ໄດ້​ເດີນ​ທາງ​ໄປ​ຢ້ຽມ​ຢາມ​ນະ​ຄອນຫຼວງ​ ກາ​ບູ​ລ ຂອງ ອັ​ຟ​ກາ​ນິ​ສ​ຖານ ໃນ​ວັນ​ອາ​ທິດ​ວານນີ້ ເຊິ່ງ​ລາວ​ໄດ້​ພົບ​ປະ​ກັບ​ປະ​ທາ​ນາ​ທິ​ບໍ​ດີ ອາ​ສ​ຣັ​ຟ ກາ​ນີ ແລະ ນັກ​ການ​ເມືອງ​ສອງ​ຄົນ​ເພື່ອ​ປຶກ​ສາ​ຫາ​ລື ກ່ຽວ​ກັບ ພິ​ທີ​ເຊັນ​ສັນ​ຍາ​ທີ່​ໃກ້​ຈະ​ມາ​ເຖິງນີ້, ພ້ອມ​ກັບ​ບັນ​ຫາ​ອື່ນໆ. ທ່ານ ມຸດ​ລັກ ບິນ ມາ​ເຈັດ ອາ​ລ-ກາ​ຕາ​ນີ ຕໍ່​ມາ​ໄດ້​ເປີດ​ເຜີຍ​ລາຍ​ລະ​ອຽດ ກ່ຽວ​ກັບ ການ​ພົບ​ປະ​ຂອງ​ລາວ​ກັບ​ໂທ​ລະ​ພາບ TOLO ຂອງ ອັ​ຟ​ກາ​ນິ​ສ​ຖານ.

ໂທ​ລະ​ພາບ​ດັ່ງ​ກ່າວ​ໄດ້​ກ່າວ​ຢ້ຳ​ຄຳ​ເວົ້າ​ຂອງ​ທ່ານ ອາ​ລ-ກາ​ຕາ​ນີ ວ່າ “ປະ​ເທດ ແລະ ອົງ​ການ​ທີ່​ຂ້ອນ​ຂ້າ​ງ​ສຳ​ຄັນ, ສະ​ມາ​ຊິກ​ຖາ​ວອນ ແລະ ບໍ່​ຖາ​ວອນ​ໃນ​ສະ​ພາ​ຄວາມ​ໝັ້ນ​ຄົງ, ບັນ​ດາ​ປະ​ເທດ​ເພື່ອ​ນບ້ານ ແລະ ຜູ້​ມີ​ສ່ວນ​ຮ່ວມ​ທຸກ​ຝ່າຍ. ທຸກ​ປະ​ເທດ​ທີ່​ຈະ​ສະ​ໜັບ​ສະ​ໜູນ​ຂະ​ບວນ​ການ​ສັນ​ຕິ​ພາບ​ຂອງ ອັ​ຟ​ກາ​ນິ​ສ​ຖານ ຈະ​ເຂົ້າ​ຮ່ວມ​ໃນ​ພິ​ທີ​ເຊັນ​ສັນ​ຍາ.” ທ່ານ​ທູດ​ໄດ້​ກ່າວ​ຕື່ມ​ວ່າ “ຫວັງ​ວ່າ, ພວກ​ເຮົາ​ຈະ​ສາ​ມາດ​ສະຫຼຸບ ແລະ ເຊັນ​ມັນ​ໃນ​ນະ​ຄອນຫຼວງ ໂດ​ຮາ ໃນ​ວັນ​ທີ 29 ຂອ​ງ​ເດືອນນີ້.”

ອ່ານ​ຂ່າວນີ້​ເປັນ​ພາ​ສາ​ອັງ​ກິດ

ທ່ານອາດຈະມັກເລື້ອງນີ້ຄືກັນ

XS
SM
MD
LG