ປະທານາທິບໍດີທີ່ຖືກເລືອກໃໝ່ ທ່ານ Donald Trump ໄດ້ກ່າວຕໍ່ການໂຮມຊຸມນຸມທີ່ລັດ Louisiana ທາງພາກໃຕ້ຂອງສະຫະລັດໃນວັນສຸກວານນີ້ ໂດຍໂຄສະນາຫາສຽງໃຫ້ແກ່ຜູ້ສະໝັກຂອງພັກຣີພັບບລີກັນ ໃນການເລືອກຕັ້ງສະມາຊິກສະພາສູງບ່ອນສຸດທ້າຍຂອງສະຫະລັດ.
ທ່ານ Trump ກ່າວຕໍ່ພວກສະໜັບສະໜຸນ ທີ່ການໂຮມຊຸມນຸມ ຢູ່ນະຄອນຫຼວງຂອງລັດ ເມືອງ Baton Rouge ວ່າ “ພວກເຮົາຕ້ອງການທ່ານ John ທີ່ວໍຊິງຕັນ” ແລະຮຽກຮ້ອງໃຫ້ພວກເຂົາເຈົ້າພາກັນໄປປ່ອນບັດໃນວັນເສົາມື້ນີ້.
ທ່ານ John Kennedy ຊຶ່ງໃນເວລານີ້ເປັນຫົວໜ້າດ້ານການເງິນຂອງລັດກຳລັງທຳການເລືອກຕັ້ງຮອບສອງ ແຂ່ງກັບຜູ້ສະໝັກຂອງພັກເດໂມແຄຣັດ ທ່ານ Foster Campbell ເອົາບ່ອນນັ່ງໃນສະພາສູງທີ່ຫວ່າງລົງໂດຍສະມາຊິກຂອງພັກຣີພັບບລີກັນ ທ່ານ David Vitter ທີ່ອອກກິນເບ້ຍບຳນານ. ບຸກຄົນທັງ 2 ແມ່ນໄດ້ຮັບຄະແນນຫຼາຍກວ່າໝູ່ໃນການເລືອກຕັ້ງທົ່ວໄປ ໃນເດືອນແລ້ວນີ້ ແຕ່ກໍປາກົດວ່າ ບໍ່ມີຜູ້ໃດໄດ້ຮັບຄະແນນກາຍ 50 ເປີເຊັນ ຍ້ອນວ່າມີຜູ້ສະໝັກທັງໝົດຫລາຍກວ່າ 20 ຄົນ.
ການໄດ້ຮັບໄຊຊະນະຂອງທ່ານ Kennedy ຈະເຮັດໃຫ້ພັກຣີພັບບລີກັນຍັງສາມາດກຳສຽງສ່ວນຫຼາຍຢູ່ໃນສະພາສູງ ດ້ວຍຄະແນນສຽງ 52 ຕໍ່ 48.
ຫລັງຈາກນັ້ນ ທ່ານ Trump ກໍເດີນທາງໄປຮ່ວມ ການໂຮມຊຸມນຸມທີ່ລັດມີຊິແກນ ບ່ອນ ທີ່ທ່ານໄດ້ໄປປາກົດໂຕ ຮ່ວມກັບປະທານ ແລະ ຫົວໜ້າບໍລິຫານ ຂອງບໍລິສັດ Down Chemical ທ່ານ Andrew Liveris ທີ່ປະທານາທິບໍດີເລືອກໃໝ່ກ່າວວ່າ ທ່ານຈະເປັນຫົວໜ້າສະພາຜູ້ຜະລິດຂອງອາເມຣິກັນ.
ທ່ານ Trump ກ່າວວ່າ ສະພານີ້ຈະມີໜ້າທີ່ໃນການຊອກຫາຊ່ອງທາງເພື່ອນຳເອົາອຸດສາ ຫະກຳໃນຈຳນວນຕື່ມອີກເຂົ້າມາໃນສະຫະລັດ. ທ່ານ Trump ທີ່ໂຄສະນາຫາສຽງ ພາຍໃຕ້ຄຳຂວັນທີ່ວ່າ ເຫັນແກ່ຊາວອາເມຣິກັນກ່ອນອື່ນໝົດ ກ່າວວ່າ ລັດຖະບານຂອງທ່ານ ຈະປະຕິບັດຕາມລະບຽບທີ່ງ່າຍໆ 2 ຂໍ້ ຄືຊື້ເຄື່ອງທີ່ຜະລິດໂດຍຄົນອາເມຣິກັນແລະຈ້າງຄົນອາເມຣິກັນ.
