ເມື່ອຮອງປະທານາທິບໍດີ ຄາມາລາ ແຮຣິສ ແລະ ອະດີດປະທານາທິບໍດີ ດໍໂນລ ທຣຳ ຍົກປະເດັນທີ່ຮ້ອນແຮງຕ່າງໆຂຶ້ນມາເວົ້າໃນການຫາສຽງເລືອກຕັ້ງປະທານາທິບໍດີ ສະຫະລັດ ນັ້ນ, ຖ້າຫາກມີການເວົ້າເຖິງເລື່ອງນະໂຍບາຍ ສະຫະລັດ ແລະ ຈີນ ຂຶ້ນມາ, ທັງສອງທ່ານຕ່າງກໍພະຍາຍາມເຊື່ອມໂຍງໃຫ້ກ່ຽວກັບຄວາມກັງວົນຂອງຄົນໃນປະເທດສະເໝີ.
ທ່ານ ຫຼິວ ຢາເຫວີຍ ຜູ້ອຳນວຍການໂຄງການຈີນຂອງສູນ ຄາເຕີ ກ່າວວ່າ ຜູ້ມີສິດເລືອກຕັ້ງຊາວອາເມຣິກັນ ມີຄວາມກັງວົນ ກ່ຽວກັບ ປະເດັນພາຍໃນປະເທດຫຼາຍກວ່າ. ການສຳຫຼວດຄວາມຄິດເຫັນໄດ້ສະແດງໃຫ້ເຫັນວ່າ ເລື່ອງທີ່ບອກວ່າເປັນໄພຄຸກຄາມຈາກຈີນ ຄືປະເດັນທີ່ມີຄວາມສຳຄັນຮອງຈາກເລື່ອງເສດຖະກິດ, ຄົນເຂົ້າເມືອງ, ສິດທິໃນການເຮັດແທ້ງລູກ, ສະພາບອາກາດ ແລະ ປະຊາທິປະໄຕ.
ການສຳຫຼວດຢູ່ອົງການ YouGov ໃນ ສະຫະລັດ ໄດ້ເປີດເຜີຍວ່າ ມີພຽງສ່ວນນ້ອຍຂອງຜູ້ມີສິດເລືອກຕັ້ງທີ່ເຫັນວ່າ ນະໂຍບາຍຕ່າງປະເທດເປັນນຶ່ງໃນສາມປະເດັນທີ່ສຳຄັນສຳລັບຕົນ ແລະ ພົບດ້ວຍວ່າ ຜູ້ສະໜັບສະໜູນທ່ານ ທຣຳ ສົນໃຈໃນເລື່ອງນະໂຍບາຍຕ່າງປະເທດຫຼາຍກວ່າຜູ້ສະໜັບສະໜູນທ່ານນາງ ແຮຣິສ ເລັກນ້ອຍ.
ຖ້າຫາກຜູ້ຊິງຕຳແໜ່ງປະທານາທິບໍດີໃນປີນີ້ຈະຕ້ອງເວົ້າ ກ່ຽວກັບ ຈີນ ໃນການຫາສຽງນັ້ນ ສິ່ງທີ່ຖືກນຳສະເໜີອອກມາກໍເປັນມຸມມອງຈາກຄົນໃນປະເທດຫຼາຍ ກວ່າ.
ຕົວຢ່າງເຊັ່ນ ໃນການຫາສຽງທີ່ນະຄອນ ນິວຢອກ ເມື່ອວັນທີ 27 ຕຸລາທີ່ຜ່ານມາ ທ່ານ ທຣຳ ໄດ້ເວົ້າເຖິງ ຈີນ 2 ຄັ້ງ ໂດຍກ່າວວ່າ ຖ້າຫາກ ສະຫະລັດ ແລະ ຈີນ ຈະຕ້ອງເຮັດສົງຄາມກັນ, ສະຫະລັດ ຈະ “ເອົາຊະນະພວກເຂົາໄດ້” ແລະ ວ່າທ່ານຈະ “ຮັບຜ່ານກົດໝາຍ Trump Reciprocal Trade Act ຊຶ່ງໝາຍຄວາມວ່າ ຖ້າ ຈີນ ຫຼື ປະເທດອື່ນໆທີ່ເກັບພາສີນຳເຂົ້າ 100 ຫຼື 200 ເປີເຊັນ ພວກເຮົາກໍຈະເກັບພາສີນຳເຂົ້າ 100 ຫຼື 200 ເປີເຊັນຈາກພວກເຂົາ ດ້ວຍ.”
ແຕ່ທ່ານນາງ ແຮຣິສ ບໍ່ໄດ້ເວົ້າເຖິງ ຈີນ ໃນລະຫວ່າງການຫາສຽງເມື່ອວັນທີ 27 ຕຸລາທີ່ຜ່ານມາໃນລັດ ເພັນຊິລເວເນຍ ຊຶ່ງເປັນນຶ່ງໃນລັດທີ່ມີການແຂ່ງຂັນສຳຄັນ ແລະ ບໍ່ໄດ້ເວົ້າ ກ່ຽວກັບ ຈີນ ຫຼາຍໃນຕະຫຼອດການໂຄສະນາຫາສຽງທີ່ຜ່ານມາ.
ແຕ່ໃນການປະຊຸມໃຫຍ່ພັກເດໂມແຄຮັດ ໃນເດືອນສິງຫາທີ່ຜ່ານມາ ທ່ານນາງ ແຮຣິສ ກ່າວວ່າ ທ່ານນາງຈະດຳເນີນການຕ່າງໆໃຫ້ແນ່ໃຈວ່າ ສະຫະລັດ ຈະເປັນຜູ້ຊະນະໃນການແຂ່ງຂັນເພື່ອເປັນຜູ້ນຳໂລກ ໃນດ້ານປັນຍາປະເທດ (AI) ແລະ ກິດຈະການດ້ານອະວະກາດ.
ນອກນັ້ນຕົວແທນພັກເດໂມແຄຣັດ ຍັງຈະພະຍາຍາມຫຼຸດຄວາມສ່ຽງ ທີ່ມຸ່ງເນັ້ນການຫຼຸດການເພິ່ງພາກັນລະຫວ່າງ ສະຫະລັດ ແລະ ຈີນ ໃນເລື່ອງເທັກໂນໂລຈີທີ່ທັນສະໄໝ ໂດຍຫຼັກໆນັ້ນຕ້ອງການເຮັດໃຫ້ ວໍຊິງຕັນ ບໍ່ກາຍເປັນຜູ້ສົ່ງເສີມ ປັກກິ່ງ ໃນການປັບປຸງຄວາມສາມາດທາງທະຫານໃຫ້ທັນສະໄໝ ແຕ່ກໍເຕືອນໃຫ້ລະວັງ ກ່ຽວກັບ ການດຳເນີນນະໂຍບາຍທາງເສດຖະກິດທີ່ເນັ້ນເລື່ອງການໃຊ້ອັດຕາພາສີນຳເຂົ້າກັບ ຈີນ ຕາມຄວາມເຫັນຂອງທ່ານນາງ ອາລີ ວີນ ນັກວິໄຈອາວຸໂສຈາກຸ່ມ International Crisis.
ຟໍຣັມສະແດງຄວາມຄິດເຫັນ