ມັນເປັນຂໍ້ຕົກລົງການຄ້າທີ່ໃຫຍ່ທີ່ສຸດ ແລະດີທີ່ສຸດໃນໂລກ ນັ້ນຄືສິ່ງທີ່ປະທານາທິບໍດີ
ສະຫະລັດ ທ່ານ ດໍໂນລ ທຣຳ ແລະ ບັນດາສະມາຊິກໃນຄະນະລັດຖະບານຂອງທ່ານ
ພວມປະກາດໂຄສະນາກ່ຽວກັບຂໍ້ຕົກລົງການຄ້າສະບັບໃໝ່ ທີ່ພວກເພິ່ນ ໄດ້ບັນລຸກັບ
ປະເທດການາດາ ແລະເມັກຊິໂກ ທີ່ເປັນເພື່ອນບ້ານ.
ທ່ານ ທຣຳ ໄດ້ທຳນາຍໄວ້ວ່າ “ຂໍ້ຕົກທີ່ເປັນຂີດໝາຍນີ້ ຈະສົ່ງເງິນ ແລະວຽກເຮັດ
ງານທຳໃຫ້ຫລັ່ງໄຫລເຂົ້າມາໃນສະຫະລັດ ແລະ ເຂົ້າມາ ໃນອາເມຣິກາ ເໜືອ.”
ຫຼັງຈາກ ທີ່ໄດ້ປຶກສາຫາລືກັນໃນນາທີສຸດທ້າຍ ກ່ອນໜ້າເສັ້ນຕາຍທີ່ໄດ້ຕັ້ງໄວ້ ໃນເວລາ
ທ່ຽງຄືນຂອງວັນອາທິດແລ້ວນີ້ ສະຫະລັດແລະການາດາ ໄດ້ປະກາດ ວ່າ ພວກເພິ່ນໄດ້
ບັນລຸຂໍ້ຕົກລົງ ທີ່ອະນຸຍາດໃຫ້ດັດແກ້ຂໍ້ຕົກລົງສາມຝ່າຍ ກັບ ເມັກຊິໂກ ເພື່ອໃຊ້ແທນ
ຂໍ້ຕົກລົງການຄ້າເສລີ ໃນອາເມຣິກາເໜືອ ຫຼື NAFTA ທີ່ມີຜົນບັງຄັບໃຊ້ມາໄດ້ເກືອບ 25 ປີແລ້ວນັ້ນ.
ທ່ານ ທຣຳ ໄດ້ກ່າວຖະແຫລງໃນໄຊຊະນະ ຢູ່ທີ່ສວນກຸຫຼາບ ຂອງທຳນຽບຂາວ ບ່ອນທີ່ ບັນດາສະມາຊິກ ໃນຄະນະລັດຖະບານຂອງທ່ານຈຳນວນນຶ່ງ ຢືນອ້ອມ ທ່ານ ແລະ ບັນດາຄູ່ເຈລະຈາການຄ້າຂອງທ່ານຜູ້ທີ່ໄດ້ເຮັດວຽກເພື່ອບັນລຸຂໍ້ຕົກ ລົງສະບັບໃໝ່
ລະຫວ່າງ ສະຫະລັດ ເມັກຊິໂກ ແລະ ການາດາ ທີ່ເອີ້ນຫຍໍ້ວ່າ USMCA.
ຂໍ້ຕົກລົງດັ່ງກ່າວ ຊຶ່ງມີມູນຄ່າການຄ້າຂາຍ 1200 ຕື້ໂດລາຕໍ່ປີນັ້ນ ແມ່ນຕັ້ງຢູ່ ບົນພື້ນຖານ
ຂອງ “ຄວາມເປັນທຳ ແລະການໄດ້ຮັບຜົນປະໂຫຍດນຳກັນ” ອີງຕາມ ທ່ານ ທຣຳ ຜູ້ທີ່ກ່າວຕື່ມວ່າ ຊຶ່ງໄດ້ມີການບັນລຸກັນ ຫຼັງຈາກໄດ້ມີການບໍ່ລົງລອຍກັນກັບຄູ່ຕຳແໜ່ງ
ຈາກເມັກຊິໂກຊີຕີຄື ທ່ານ ເອນຣີເກ ປີຍາ ນີເອໂຕ ແລະ ຈາກອອດຕາວາ ຄື ທ່ານຈັສຕິນ
ທຣູໂດ.
ທ່ານທຣຳ ໄດ້ກ່າວອີກວ່າ ທ່ານໄດ້ໂອ້ລົມກັບຜູ້ນຳທັງສອງ ໃນວັນຈັນວານນີ້.
ຂໍ້ຕົກລົງດັ່ງກ່າວ ຈະລວບລວມເອົາຂົງເຂດອາເມຣິກາເໜືອ “ໃຫ້ເປັນເຂດອັນ ນຶ່ງອັນ
ດຽວທີ່ມີການແຂ່ງຂັນຫຼາຍທີ່ສຸດຂອງໂລກ” ອີງຕາມຂໍ້ຄວາມ ທີ່ປະທາ ນາທິບໍດີເມັກຊິໂກ ໄດ້ຂຽນລົງໃນທວີດເຕີ້.
ສ່ວນທ່ານ ທຣູໂດ ໄດ້ຂຽນລົງທວີດເຕີ້ວ່າ “ຂໍ້ຕົກລົງນີ້ ເຮັດໃຫ້ຄູ່ການຄ້າຂອງ ພວກເຮົາ ເຂັ້ມແຂງຂຶ້ນຕື່ມອີກ ແລະ ປະຊາຊົນໃນທົ່ວອາເມຣິກາເໜືອ ຈະໄດ້ ຮັບຜົນປະໂຫຍດ.”
ຂໍ້ຕົກລົງນີ້ຄາດກັນວ່າ ຈະມີການລົງນາມ ພາຍໃນ 60 ວັນ ໂດຍຜູ້ນຳທັງສາມ ອາດເປັນ
ໄປໄດ້ວ່າ ຢູ່ທີ່ກອງປະຊຸມສຸດຍອດ ກຸ່ມ 20 ປະເທດ ຫຼື G-20 ໃນ ທ້າຍເດືອນພະຈິກ ຈະມາເຖິງນີ້ ຢູ່ໃນປະເທດອາເຈັນຕິນາ.
ອ່ານຂ່າວນີ້ເພີ້ມຕື່ມເປັນພາສາອັງກິດ
