ໃນຂະນະທີ່ທ່ານສະແດງໃຫ້ເຫັນຢ່າງແຈ້ງຂຶ້ນຫລາຍ ຢູ່ໃນການໂຄສະນາຫາສຽງອີກຄັ້ງນຶ່ງ ວ່າຈະຊິງເອົາຕຳແໜ່ງໃນທໍານຽບຂາວໃນປີ 2024, ອະດີດ ປະທານາທິບໍດີສະຫະລັດ, ທ່ານດໍໂນລ ທຣຳ ກໍາລັງປະເຊີນກັບການສືບສວນຄະດີອາຍາຂອງລັດຖະບານກາງ ແລະຂອງລັດທີ່ສໍາຄັນ ຕໍ່ການກະທໍາຂອງທ່ານໃນທັນທີທັນໃດ ພາຍຫລັງການໂຄສະນາຫາສຽງເລືອກຕັ້ງຄືນໃຫມ່ ຂອງທ່ານລົ້ມແຫລວ ໃນປີ 2020 ນັ້ນໂລດ.
ການເຂົ້າໄປຄົ້ນເຮືອນ ໂດຍເຈົ້າໜ້າທີ່ສັນຕິບານກາງ ຫລື FBI ທີ່ບໍ່ເຄີຍມີມາ ກ່ອນໃນວັນຈັນວານນີ້ ຢູ່ທີ່ບ້ານພັກມາ-ອາ-ລາໂກ (Mar-a-Lago) ຂອງ ທ່ານທຣຳໃນລັດຟລໍຣິດາ ແມ່ນຕົວຊີ້ບອກຄັ້ງຫຼ້າສຸດວ່າ ພວກນັກສືບສວນຍັງ ເພັ່ງເລັງໃສ່ປະທານາທິບໍດີຄົນທີ 45 ຂອງປະເທດຢູ່. ລາຍງານກ່າວວ່າ ພວກນັກສືບສອບສວນໄດ້ຊອກຫາເອກະສານລັບທີ່ເຂົາເຈົ້າຄິດວ່າ ທ່ານອາດຈະເອົາໄປນຳທ່ານ ໃນເວລາທີ່ທ່ານອອກຈາກນະຄອນຫລວງວໍຊິງຕັນ ໃນປີກາຍນີ້.
ການເຂົ້າຊອກຄົ້ນແມ່ນໄດ້ຮັບອະນຸຍາດຈາກສານ ແລະອາດຈະໄດ້ຮັບການອະນຸມັດໃນລະດັບສູງສຸດຈາກກະຊວງຍຸຕິທໍາ. ແຕ່ລາຍລະອຽດຂອງໃບສັ່ງຄົ້ນ ທີ່ເຈົ້າໜ້າທີ່ສືບສວນໄດ້ຍື່ນ ແລະໃຫ້ເຫດຜົນກ່ຽວກັບການຄົ້ນນັ້ນ ແລະທັງຊື່ຂອງຜູ້ພິພາກສາ ທີ່ອະນຸຍາດໃຫ້ຄົ້ນນັ້ນ ຍັງບໍ່ທັນເປັນທີ່ຮູ້ຈັກກັນຢ່າງເປີດເຜີຍເທື່ອ. ທຳນຽບຂາວກ່າວວ່າ ຕົນບໍ່ໄດ້ຮັບແຈ້ງການກ່ຽວກັບການເຂົ້າໄປກວດຄົ້ນໃນຄັ້ງນີ້ເລີຍ.
ພາຍໃຕ້ກົດໝາຍ ວ່າດ້ວຍການບັນທຶກຂອງປະທານາທິບໍດີ ປີ 1978, ບັນທຶກຢ່າງເປັນທາງການຂອງປະທານາທິບໍດີ ແລະຮອງປະທານາທິບໍດີທຸກຄົນ ແມ່ນຍັງເປັນຂອງສາທາລະນະຢູ່ ເຖິງແມ່ນວ່າພວກເພິ່ນຈະອອກຈາກ ຕຳແໜ່ງໄປແລ້ວກໍຕາມ. ຂໍ້ກຳນົດຂອງລັດຖະບັນຍັດກໍແມ່ນວ່າ ເອກະສານແມ່ນຂອງປະຊາຊົນອາເມຣິກັນ, ບໍ່ແມ່ນຂອງບຸກຄົນ ທີ່ເປັນຜູ້ນໍາຂອງປະເທດນັ້ນ.
ປະມານນຶ່ງປີຫຼັງຈາກທ່ານອອກຈາກຕໍາແໜ່ງໄປ ທ່ານທຣຳ ໄດ້ເອົາເອກະສານ 15 ກ່ອງຈາກການເປັນປະທານາທິບໍດີຂອງທ່ານໄປຄືນໃຫ້ຫ້ອງການເກັບມ້ຽນເອກະສານ ຫລື National Archives, ເຊິ່ງບາງອັນໄດ້ເວົ້າວ່າ ມີເອກະສານລັບລວມຢູ່ນຳ. ແຕ່ບັນດານັກສືບສວນ ທີ່ຄົ້ນຫາຫ້ອງການຂອງທ່ານທຣຳ ແລະ ເປີດຕູ້ນິລະໄພ ຢູ່ບ້ານພັກໃນແຄມທະເລຢູ່ລັດຟລໍຣິດາຂອງທ່ານໃນວັນຈັນຜ່ານມານີ້ ໄດ້ເອົາເອກະສານເພີ່ມອີກ ທີ່ບໍ່ໄດ້ຖືກສົ່ງຄືນໃນເດືອນມັງກອນນັ້ນ.
ທ່ານທຣຳ ໄດ້ຕຳໜິການຄົ້ນຫາດັ່ງກ່າວຫລາຍ ເໝືອນກັນກັບການສືບສວນ ທີ່ກ່ຽວຂ້ອງກັບການເລືອກຕັ້ງ ໂດຍເວົ້າວ່າ ມັນເປັນການພະຍາຍາມທີ່ຈະເຮັດໃຫ້ທ່ານບໍ່ສາມາດລົງແຂ່ງຂັນອີກເທື່ອນຶ່ງ ໃນປີ 2024 ນີ້ໄດ້.
"ນີ້ແມ່ນເວລາທີ່ມືດມົນສໍາລັບປະເທດຊາດຂອງພວກເຮົາ, ຍ້ອນວ່າເຮືອນທີ່ ສວຍງາມຂອງຂ້າພະເຈົ້າ, ບ້ານພັກມາ-ອາ-ລາໂກ (Mar-A-Lago) ໃນເມືອງ ພາມບີສ (Palm Beach), ລັດຟລໍຣິດາ ປັດຈຸບັນ ແມ່ນກຳລັງຖືກປິດລ້ອມ, ຖືກບຸກເຂົ້າກວດຄົ້ນ, ແລະຍຶດຄອງໂດຍເຈົ້າໜ້າທີ່ FBI ທີ່ເປັນກຸ່ມໃຫຍ່," ນັ້ນຄືຄຳເວົ້າຂອງອະດີດປະທານາທິບໍດີທີ່ກ່າວຢູ່ໃນຖະແຫຼງການສະບັບນຶ່ງ.
