ຜູ້ສະໝັກເປັນປະທານາທິບໍດີຂອງພັກຣີພັບບລີກັນ ທ່ານ Donald Trump ໄດ້ຍຸຕິການຕັ້ງຄຳຖາມ ກ່ຽວກັບປະເທດ ທີ່ປະທານາທິບໍດີ ບາຣັກ ໂອບາມາ ເກີດ ໂດຍປະກາດວ່າ ທ່ານ “ເກີດຢູ່ໃນສະຫະລັດ ບໍ່ມີຫຍັງຫຼາຍກວ່ານັ້ນ.”
ຜູ້ທີ່ໄດ້ຮັບການສະເໜີແຕ່ງຕັ້ງຈາກພັກຣີພັບບລີກັນໃນປີ 2011 ແມ່ນຜູ້ຢູ່ເບື້ອງ ຫຼັງຂະບວນການ ທີ່ໂຕ້ຖຽງວ່າ ຖ້າບໍ່ມີຫລັກຖານຢັ້ງຢືນແລ້ວ ປະທານາທິບໍດີໂອ ບາມາ ແມ່ນເກີດຢູ່ຕ່າງປະເທດ. ນັບຕັ້ງແຕ່ນັ້ນມາທ່ານ Trump ໄດ້ປະຕິເສດທີ່ຈະກ່າວໂດຍກົງວ່າ ທ່ານມີຄວາມເຊື່ອແບບໃດ ຈົນເທົ່າວັນສຸກວານນີ້ທ່ານຈຶ່ງໄດ້ເຮັດໃຫ້ຄວາມຄຸມເຄືອດັ່ງ ກ່າວສິ້ນສຸດລົງ.
ໃນການໂຄສະນາຫາສຽງຢູ່ທີ່ວໍຊິງຕັນນັ້ນ ທ່ານ Trump ໄດ້ຖິ້ມໂທດໃສ່ຄູ່ແຂ່ງຈາກພັກເດໂມແຄຣັດ ທ່ານນາງ Hillary Clinton ທີ່ເປັນຜູ້ລິເລີ້ມກ່ຽວກັບຂ່າວນອງນັນນີ້ໃນລະ ຫວ່າງການໂຄສະນາຫາສຽງເມື່ອປີ 2008 ເວລາທ່ານນາງລົງສະໝັກ ແຂ່ງກັບທ່ານໂອບາມານັ້ນ. ສື່ມວນຊົນຈຳນວນນຶ່ງໄດ້ພາກັນສືບສວນກ່ຽວກັບການກ່າວຫາດັ່ງກ່າວແລະພົບວ່າ ບໍ່ມີຫລັກຖານໃດໆໃຫ້ການສະໜັບສະໜຸນກ່ຽວກັບເລື້ອງນີ້.
ຫລັງຈາກ ອອກຖະແຫລງການແລ້ວ ມີການຄາດກັນວ່າ ທ່ານ Trump ຈະນຳພາພວກນັກຂ່າວໄປຊົມໂຮງແຮມໃໝ່ຂອງທ່ານ ທີ່ນະຄອນວໍຊິງຕັນ. ແຕ່ເວລາຄະນະໂຄສະນາຫາສຽງຂອງ Trump ປະກາດວ່າ ມີແຕ່ພວກຖ່າຍຮບ ແລະມືກ້ອງໄດ້ຮັບອະນຸຍາດໃຫ້ເຂົ້າຮ່ວມ ແຕ່ພວກມືກ້ອງໂທລະພາບ ໄດ້ຖືກຫ້າມບໍ່ໃຫ້ເຂົ້າຮ່ວມ ຊຶ່ງບັນດາຫົວໜ້າອົງ ການຂ່າວຕ່າງໆທີ່ນະຄອນວໍຊິງຕັນ ໄດ້ຖອນພວກນັກຂ່າວຂອງຕົນແລະລຶບວິດີໂອດັ່ງ ກ່າວຖິ້ມ.
ຫົວໜ້າໂທລະພາບຂ່າວ Fox ປະຈຳນະຄອນວໍຊິງຕັນ ທ່ານ Bryan Boughton ໄດ້ຖະແຫຼງໃນຖານະຜູ້ຕາງໜ້າ ຂອງອົງການຂ່າວຕ່າງໆ ວ່າ “ສະມາຊິກຂອງພວກນັກຂ່າວໄດ້ຕັດສິນໃຈບໍ່ເຂົ້າຮ່ວມໃນການໄປຢ້ຽມຢາມໂຮງແຮມຂອງ ທ່ານ Trump ທີ່ນະຄອນວໍຊິງຕັນໃນມື້ນີ້ ຍ້ອນຄະນະບັນນາທິການຂອງພວກເຮົາ ໄດ້ຖືກຫ້າມບໍ່ໃຫ້ເຂົ້າຮ່ວມໃນການ ຖ່າຍວີດີໂອ. ພວກນັກຂ່າວໂທລະພາບ ຕາມປົກກະຕິແລ້ວ ຈະບໍ່ເຂົ້າຮ່ວມໃນການເກັບກຳຂ່າວໃດໆ ທີ່ພວກນັກຂ່າວຫຼືຜູ້ກຳກັບຂອງພວກເຮົາບໍ່ໄດ້ຮັບອະນຸຍາດໃຫ້ໄປຮ່ວມ.”
ທ່ານນາງ Hillary Clinton ທີ່ໂຄສະນາຫາສຽງຢູ່ວໍຊິງຕັນຄືກັນ ໃນວັນສຸກວານນີ້ບໍ່ໄດ້ ໃຫ້ຄວາມສຳຄັນໃດໆຕໍ່ການດຳເນີນຄວາມພະຍາຍມຂອງທ່ານ Trump ຕໍ່ການຕັ້ງຄຳຖາມກ່ຽວກັບບ່ອນເກີດຂອງປະທານາທິບໍດີໂອບາມາ.
