ປະທານາທິບໍດີສະຫະລັດ ທ່ານດໍໂນລ ທຣຳ ປະຕິເສດວ່າລັດຖະບານຂອງທ່ານ ບໍ່ໄດ້ແຊກແຊງ ໃນການສະເໜີ ການລົງໂທດຕໍ່ຜູ້ທີ່ທ່ານໄວ້ເນື້ອເຊື່ອໃຈດ້ານການເມືອງ ທີ່ຖືກພົບເຫັນວ່າ ມີຄວາມຜິດໃນຖານຕົວະຕໍ່ສະພາ.
ປະທານາທິບໍດີທຣຳໄດ້ຕອບຄຳຖາມນັກຂ່າວຄົນນຶ່ງຢູ່ທຳນຽບຂາວ ໃນຕອນບ່າຍວັນອັງຄານວານນີ້ວ່າ “ຂ້າພະເຈົ້າຢູ່ຫ່າງຈາກສິ່ງຕ່າງໆພໍສົມຄວນທີ່ຜູ້ຄົນອາດຈະບໍ່ເຊື່ອ. ຂ້າພະເຈົ້າບໍ່ໄດ້ເວົ້າກັບເຂົາເຈົ້າ. ຂ້າພະເຈົ້າຄິດວ່າຂໍ້ສະເໜີນັ້ນເປັນທີ່ໜ້າຢາກຫົວ. ຂ້າພະເຈົ້າຄິດວ່າການລົງໂທດທັງໝົດເປັນທີ່ໜ້າຢາກຫົວ ເປັນການໝິ່ນປະໝາດແກ່ປະເທດຂອງພວກເຮົາ.”
ບັນດາໄອຍະການລັດຖະບານກາງໃນມື້ກ່ອນນີ້ ໄດ້ສະເໜີໃຫ້ຕັດສິນ ຕິດຄຸກແຕ່ ເຈັດຫາເກົ້າປີ ສຳລັບທ່ານໂຣເຈີ ສະໂຕນ ເພື່ອນຂອງທ່ານທຣຳ ຜູ້ປະເຊີນໜ້າກັບການກ່າວຫາຕ່າງໆ ຢູ່ໃນການສືບສວນຂອງໄອຍະການພິເສດ ທ່ານໂຣເບີດ ມັນເລີໃນເວລານັ້ນ ກ່ຽວກັບການແຊກແຊງຂອງຣັດເຊຍເຂົ້າໃນການເລືອກຕັ້ງປີ 2016.
ຢູ່ໃນການສົ່ງຂໍ້ຄວາມທາງທວິດເຕີໃນວັນອັງຄານວານນີ້ ທ່ານທຣຳໄດ້ຮ້ອງຂໍ້ສະເໜີນັ້ນວ່າ “ຄວາມລົ້ມແຫຼວຂອງຄວາມເປັນທຳ” ແລະຕໍ່ມາໃນມື້ນັ້ນ ກະຊວງຍຸຕິທຳໄດ້ກ່າວຕໍ່ສານ ຢູ່ໃນການຍື່ນຂໍ້ສະເໜີຂັ້ນຕົ້ນນັ້ນວ່າ “ອາດຖືກພິຈາລະນາວ່າຮ້າຍແຮງເກີນໄປ ແລະບໍ່ທ່ຽງທຳ.”
ການຕ່າວປີ້ນດັ່ງກ່າວໄດ້ເຮັດໃຫ້ບັນດາຜູ້ຕຳນິຮ້ອງໂຮບໍ່ເຫັນພ້ອມ ແລະເຮັດໃຫ້ກະຊວງຍຸຕິທຳຕົກຢູ່ໃນວິກິດການ ໂດຍເຮັດໃຫ້ໄອຍະການສີ່ຄົນ ພາກັນຖອນອອກຈາກການດຳເນີນການດ້ານກົດໝາຍ.
ປະທານາທິບໍດີໄດ້ປະຕິເສດທີ່ຈະໃຫ້ຄວາມເຫັນໃດໆເວລາຖາມໂດຍບັນດານັກຂ່າວວ່າ ທ່ານໄດ້ພິຈາລະນາທີ່ຈະໃຫ້ການອະໄພຍະໂທດໃຫ້ແກ່ທ່ານສະໂຕນຫຼືບໍ່.
ປະທານາທິບໍດີທຣຳ ຕອບວ່າ “ຂ້າພະເຈົ້າບໍ່ຢາກເວົ້າກ່ຽວກັບເລື້ອງນີ້ເທື່ອ.” ພວກເຈົ້າໜ້າທີ່ກະຊວງຍຸຕິທຳກ່າວວ່າ ເຂົາເຈົ້າໄດ້ເອົາບາດກ້າວຢູ່ເບື້ອງຫຼັງຕໍ່ຂໍ້ສະເໜີໄລຍະຍາວ ສຳລັບນັກຫຼອກລວງທາງການເມືອງຜູ້ທີ່ໄດ້ຖືກພົບເຫັນວ່າມີຄວາມຜິດໃນຂໍ້ຫາເຈັດຂໍ້ໃນເດືອນພະຈິກ ຮວມທັງຕົວະຕໍ່ສະພາ ແລະຂົ່ມຂູ່ພິຍານຄົນນຶ່ງໃນຄະດີຂອງທ່ານ.
ທ່ານສະໂຕນມີກຳນົດທີ່ຈະຖືກຕັດສິນລົງໂທດຢູ່ ວໍຊິງຕັນ ໃນອາທິດໜ້ານີ້.
ກະຊວງຍຸຕິທຳກ່າວວ່າ ຕົນໄດ້ຕັດສິນໃຈ ທີ່ຈະຮ້ອງຂໍໃຫ້ມີການລົງໂທດໄລຍະສັ້ນສຳລັບທ່ານສະໂຕນໃນຕອນແລງວັນຈັນ ກ່ອນທ່ານທຣຳໄດ້ສົ່ງຂໍ້ຄວາມທາງທວິດເຕີ ກ່ຽວກັບຄະດີຢູ່ໃນເວລາເດິກດື່ນຂອງວັນອັງຄານ ເຖິງແມ່ນບໍ່ໄດ້ປະກາດໃຫ້ຮູ້ຫຼາຍຊົ່ວໂມງຈົນກວ່າ ທ່ານທຣຳໄດ້ກ່າວໄວ້ຢູ່ໃນທວິດເຕີ.
