ຜູ້ສະໝັກເປັນປະທານາທິບໍດີຈາກພັກຣີພັບບລີກັນ ທ່ານ Donald Trump ແລະຄູ່ແຂ່ງ ຈາກພັກເດໂມແຄຣັດ ທ່ານນາງ Hillary Clinton ຕ່າງກໍໄດ້ພາກັນຕຳໜິຕິຕຽນກັນແລະ ກັນໜັກຂຶ້ນ ນຶ່ງມື້ຫຼັງຈາກທີ່ມີການອອກໂທລະພາບ ການສົນທະນາກ່ຽວກັບ ຄວາມໝັ້ນ ຄົງແຫ່ງຊາດ ເຊິ່ງໄດ້ເຮັດໃຫ້ທັງສອງທ່ານກາຍເປັນຈຸດສົນໃຈທີ່ສຳຄັນ.
ໃນການປາກົດໂຕທີ່ໂຮງຮຽນແຫ່ງນຶ່ງໃນນະຄອນ Cleveland ລັດ Ohio ທ່ານ Trump ໄດ້ກ່າວວ່າ ຜົນງານໃນແລງວັນພຸດຜ່ານມາ ຂອງທ່ານນາງ Clinton ເປັນຫລັກຖານຕື່ມ ທີ່ວ່າ ທ່ານນາງບໍ່ເໝາະສົມ ທີ່ຈະເປັນຜູ້ບັນຊາການສູງສຸດ. ທ່ານ Trump ໄດ້ກ່າວຕໍ່ໄປ ວ່າ ທ່ານນາງ Clinton ສືບຕໍ່ປະຕິເສດທີ່ຈະຮັບເອົາຄວາມຮັບຜິດຊອບຕໍ່ນະໂຍບາຍໃນ ເຂດພາກຕາເວັນອອກກາງຂອງ ທ່ານນາງທີ່ໄດ້ປະສົບກັບຄວາມ “ລົ້ມແຫຼວ” ໃນຂະນະ ທີ່ເປັນລັດຖະມົນຕີການຕ່າງປະເທດ.
ທ່ານ Trump ໄດ້ເອີ້ນທ່ານນາງ Clinton ວ່າ “ພ້ອມທີ່ຈະໃຊ້ຄວາມຮຸນແຮງ” ເພື່ອຈະຮຸກຮານປະເທດຕ່າງໆ ແລະ ໂຄ່ນລົ້ມລະບອບການປົກຄອງ ເຊິ່ງໄດ້ກໍ່ໃຫ້ເກີດ “ຄວາມເສຍ ຫາຍ ແລະການເສຍຊີວິດ” ໃນລີເບຍ ອີຣັກ ແລະຊີເຣຍ.
ທ່ານ Trump ໄດ້ອ້າງວ່າ ໃນເວລາ ທີ່ທ່ານນາງ Clinton ເປັນລັດຖະມົນຕີການຕ່າງປະ ເທດຢູ່ນັ້ນ ທ່ານນາງດຳເນີນທຸລະກິດທີ່ຜິດກົດໝາຍທາງອາຍາໂດຍມອບສິ່ງຕອບແທນ ຕໍ່ບັນດາຜູ້ບໍລິຈາກ ແກ່ມູນນິທິການກຸສົນ Clinton ແລະໄດ້ກ່າວຫາທ່ານນາງເລື່ອງການ ທັບໂທລະສັບຫຼາຍໜ່ວຍ ດ້ວຍໄມ້ຄ້ອນຕີ ເພື່ອຊຸກເຊື່ອງຫຼັກຖານ ຈາກພວກສືບສວນ.
ທ່ານ Trump ໄດ້ບົ່ງບອກວ່າ ພວກຄົນຜູ້ໃດທີ່ສະໜັບສະໜູນ ທ່ານນາງ Clinton ໃຫ້ ເປັນປະທານາທິບໍດີ ແມ່ນເປັນຜູ້ທີ່ “ຖືກຫລອກລວງ.”
ສ່ວນທ່ານນາງ Clinton ໄດ້ກ່າວໃນລະຫວ່າງການໂຄສະນາຫາສຽງທີ່ເມືອງ Charlotte ລັດ North Carolina ວ່າ ຄວາມເຫັນຂອງທ່ານ Trump ທີ່ວ່າ ປະທານາທິບໍດີ ຣັດເຊຍ ທ່ານ Vladimir Putin ເປັນຄືຜູ້ນຳທີ່ເຂັ້ມແຂງ ກວ່າປະທານາທິບໍດີບາຣັກ ໂອບາມານັ້ນ ເຮັດໃຫ້ທ່ານນາງ “ຕື່ນຕົກໃຈ.”
ທ່ານນາງໄດ້ກ່າວວ່າ “ອັນນັ້ນ ແມ່ນບໍ່ຮັກຊາດເລີຍ ມັນບໍ່ພຽງແຕ່ເປັນການດູໝິ່ນຕໍ່ສະຖາ ບັນ ແລະຕໍ່ບຸກຄົນຜູ້ທີ່ດຳລົງຕຳແໜ່ງ. ມັນເປັນຕາຢ້ານແລະມັນເປັນອັນຕະລາຍແທ້ໆ.”
ທ່ານນາງ Clinton ຍັງໄດ້ຕຳໜິຕິຕຽນ ຕໍ່ອັນທີ່ທ່ານ Trump ເອີ້ນວ່າ “ແຜນການລັບ” ເພື່ອເອົາຊະນະກຸ່ມລັດອິສລາມ. ທ່ານນາງກ່າວວ່າ ມັນເປັນຄວາມລັບ ເພາະວ່າທ່ານບໍ່ ມີແຜນການຫຍັງເລີຍ. ທ່ານນາງຍັງໄດ້ຈັບຜິດທ່ານ Trump ໃນການໃຫ້ຄວາມເຫັນ ຕໍ່ ສາທາລະນະ ໃນແລງວັນພຸດ ກ່ຽວກັບການໄດ້ຮັບການລາຍງານໂດຍສະຫລຸບກ່ຽວກັບ ຄວາມລັບແຫ່ງຊາດສຳລັບຜູ້ສະໝັກເປັນປະທານາທິບໍດີ.
