ທ່ານ Donald Trump ຜູ້ສະໝັກປະທານາທິບໍດີ ຂອງພັກຣີພັບ
ບລີກັນໄດ້ຍົກເລີກການໂຮມຊຸມນຸມໂຄສະນາຫາສຽງທີ່ສະໜາມ
ກິລານະຄອນ Chicago ໃນຄືນວັນສຸກວານນີ້ ຫຼັງຈາກພວກປະ
ທ້ວງຫຼາຍພັນຄົນ ໄປຮວມຕົວກັນ ຢູ່ທີ່ນັ້ນ ແລະປະທະກັບພວກ
ສະໜັບສະໜຸນທ່ານ Trump.
ກ່ອນໜ້າການຂຶ້ນໄປກ່າວ ໂຄສະນາຫາສຽງຂອງທ່ານ Trump
ນັ້ນ ພວກປະທ້ວງຈຳນວນນຶ່ງ ໄດ້ບຸກເຂົ້າໄປ ໃນສະໜາມກິລາ
ມະຫາວິທະຍາໄລອິລລີນອຍທີ່ນະຄອນ Chicago ແລະກໍເກີດ
ເຫດການອຶກກະທຶກນອງນັນຂຶ້ນ ເວລາຝູງຊົນ ຢູ່ທີ່ນັ້ນ ໄດ້ຮ້ອງ
ຄຳຂວັນ ທັງສະໜັບສະໜຸນແລະຕໍ່ຕ້ານທ່ານ Trump ຮວມທັງ
ຄຳເວົ້າທີ່ຫຍາບຄາຍບໍ່ສຸພາບ.
ທ່ານ Trump ໄດ້ອອກຖະແຫຼງການສະບັບນຶ່ງ ປະກາດເລື່ອນການໂຮມຊຸມນຸມອອກໄປ. ທ່ານຮຽກຮ້ອງໃຫ້ທຸກຄົນອອກໄປຈາກສະຖານທີ່ດັ່ງກ່າວດ້ວຍຄວາມສະຫງົບແລະທ່ານ
ກ່າວວ່າ ທ່ານບໍ່ຢາກເຫັນຜູ້ໃດໄດ້ຮັບບາດເຈັບ.
ຫລັງຈາກມີການຕໍ່ສູ້ກັນ ຢ່າງຊຸນລະມຸນໄດ້ເກີດຂຶ້ນໃນໝູ່ພວກທີ່ໄປໂຮມຊຸມນຸມກັນແລ້ວ ຕຳຫລວດ ແລະຍາມຮັກສາຄວາມສະຫງົບ ກໍໄດ້ເຂົ້າໄປແຍກ ທັງສອງກຸ່ມອອກຈາກກັນ.
ຮູບຂ່າວຈາກໂທລະພາບສະແດງໃຫ້ເຫັນວ່າໄດ້ເກີດການປະທະກັນລະຫວ່າງກຸ່ມນ້ອຍໆ
ຂອງພວກທີ່ໄປໂຮມຊຸມນຸມ ໂດຍທີ່ຈຳນວນນຶ່ງ ໄດ້ຍູ້ກັນໄປມາແລະຕົບຕີກັນ. ໃນເວລາຕໍ່
ມາຕຳຫຼວດໄດ້ຂັບໄລ່ຝູງຊົນໃຫ້ອອກໜີໄປ.
ຕຳຫຼວດກ່າວວ່າ ບໍ່ໄດ້ມີການຈັບກຸມເກີດຂຶ້ນ ແລະກໍບໍ່ມີລາຍງານວ່າ ມີຜູ້ໃດໄດ້ຮັບບາດ
ເຈັບ.
ພວກສະໜັບສະໜຸນທ່ານ Trump ບາງຄົນກ່າວວ່າ ພວກປະທ້ວງທີ່ພາກັນໄປບ່ອນໂຮມ
ຊຸມທີ່ນະຄອນ Chicago ມີຈຸດປະສົງຢາກໃຫ້ປິດການໂຮມຊຸມນຸມດັ່ງກ່າວ ແລະຕັ້ງໃຈທີ່
ຈະສ້າງບັນຫາ. ແຕ່ການກໍ່ຄວາມຮຸນແຮງ ທີ່ແນໃສ່ພວກຄັດຄ້ານ ທ່ານ Trump ນັ້ນ ໄດ້
ເກີດຂຶ້ນມາແລ້ວຢູ່ບ່ອນໂຄສະນາຫາສຽງອື່ນໆ. ທ່ານ Trump ຍັງໄດ້ຖືກກ່າວຫາວ່າເປັນ
ຜູ້ກໍ່ໃຫ້ເກີດສະພາບການນີ້ ຊຶ່ງອະນຸຍາດໃຫ້ມີການກໍ່ຄວາມຮຸນແຮງຕໍ່ຕ້ານພວກປະທ້ວງ
ໂດຍໄດ້ຕິຕຽນພວກປະທ້ວງ ເວລາມີການລົບກວນເກີດຂຶ້ນ ໃນຂະນະທີ່ມີການໂຄສະນາ
ຫາສຽງນັ້ນ.
