ປະທານາທິບໍດີສະຫະລັດ ທ່ານດໍໂນລ ທຣຳ ອາດຈະສົ່ງກຳລັງທະຫານສະຫະລັດຫຼາຍເຖິງ 15,000 ຄົນ ໄປຍັງຊາຍແດນເມັກຊິໂກ ເພື່ອສະກັດກັ້ນຂະບວນຄົນເຂົ້າເມືອງຈາກອາເມຣິກາກາງ ຊຶ່ງຫຼາຍໆຄົນໃນຈຳນວນດັ່ງກ່າວ ແມ່ນຕ້ອງການຂໍລີ້ໄພ ບໍ່ໃຫ້ຂ້າມເຂົ້າມາໃນສະຫະລັດ.
ປະທານາທິບໍດີໄດ້ກ່າວເຖິງພວກຄົນເຂົ້າເມືອງຈຸນີ້ ຫຼັງຈາກກ່ອນໜ້ານັ້ນ ເອີ້ນ ພວກເຂົາເຈົ້າວ່າ “ມັນເປັນກຸ່ມຄົນທີ່ອັນຕະລາຍ ເປັນສະມາຊິກຸ່ມອັນທະພານ ແລະແກັ່ງຕ່າງໆ.”
ແຕ່ແມ່ຍິງຄົນນຶ່ງ ຈາກແອລຊາລວາດໍ ແລະເປັນສ່ວນນຶ່ງຂອງຂະບວນຄົນເຂົ້າເມືອງທີ່ມຸ່ງໜ້າຂຶ້ນເໜືອມາຍັງສະຫະລັດ ກ່າວວ່າ ນາງຢາກໃຫ້ປະທານາທິບໍດີທຣຳຮູ້ວ່າ ນາງແລະບຸກຄົນອື່ນໆໃນຂະບວນ ບໍ່ແມ່ນ “ພວກຄົນບໍ່ດີ.”
ນາງກ່າວຕື່ມວ່າ “ພວກເຮົາບໍ່ແມ່ນໄປທີ່ນັ້ນ ເພື່ອລັກຂະໂມຍ ຫຼືເຮັດໃຫ້ຜູ້ໃດຕົກຢູ່ໃນອັນຕະລາຍ. ພວກເຮົາຢາກເຮັດວຽກໂດຍໃຊ້ມືທີ່ທຸກຍາກຂອງພວກເຮົາ ດ້ວຍຢາດເຫື່ອ ແລະຫາເງິນເລັກໆນ້ອຍໆ. ພວກເຮົາສວດມົນພາວະນາຂໍໃຫ້ພະເຈົ້າປະທານໃຫ້ພວກເຮົາໄປເຖິງທີ່ນັ້ນ ແລະກໍຫາວຽກການເຮັດໄດ້.”
ຈຳນວນທະຫານ 15,000 ຄົນ ຂອງທ່ານທຣຳ ແມ່ນສູງກວ່າຈຳນວນທະຫານ 5,200 ຄົນ ທີ່ທຳນຽບຫ້າແຈໄດ້ສົ່ງໄປເຂດຊາຍພ້ອມກັບກຳລັງຮັກສາດິນແດນ
2,100 ຄົນ ທີ່ປະຈຳການຢູ່ທີ່ນັ້ນແລ້ວ. ເຈົ້າໜ້າທີ່ກະຊວງປ້ອງກັນປະເທດສະຫະລັດ ແຈ້ງໃຫ້ວີໂອເອຊາບວ່າ ທະຫານໃນຈຳນວນຕື່ມອີກ ປະມານ 2,000 ຄົນຈະໄດ້ຮັບຄຳສັ່ງໃຫ້ກຽມພ້ອມ ເພື່ອໄປຊ່ວຍພວກທະຫານທີ່ຖືກສັ່ງການໃຫ້ປະຕິບັດໜ້າທີ່ຢູ່ໃນເຂດຊາຍແດນ.
ດ້ວຍເຫດນີ້ຈຶ່ງຈະເຮັດໃຫ້ຈຳນວນທະຫານຖືກສົ່ງໄປປະຈຳການຢູ່ໃນເຂດຊາຍແດນທາງໃຕ້ຂອງສະຫະລັດ ຫຼາຍກວ່າຈຳນວນທະຫານອາເມຣິກັນທີ່ກຳລັງສູ້ລົບກັບພວກກໍ່ການຮ້າຍຢູ່ໃນອີຣັກ ແລະຊີເຣຍ. ມີທະຫານອາເມຣິກັນປະມານ14,000 ຄົນ ປະຕິບັດໜ້າທີ່ຢູ່ໃນອັຟການິສຖານ.
ລັດຖະມົນຕີ ກະຊວງປ້ອງກັນປະເທດສະຫະລັດ ທ່ານຈິມ ແມັດຕິສ ກ່າວຕໍ່ພວກນັກຂ່າວທີ່ທຳນຽບຫ້າແຈ ໂດຍປະຕິເສດວ່າ ການສົ່ງກຳລັງທະຫານໄປປະຈຳຢູ່ເຂດຊາຍແດນນັ້ນວ່າເປັນການສະແດງໂລດໂຜນເພື່ອສ້າງຄວາມສົນໃຈທາງການເມືອງ ເພື່ອຊ່ວຍພັກຣີພັບບລີກັນ ໃນການເລືອກຕັັ້ງກາງສະໄໝຊຶ່ງຈະມີຂຶ້ນໃນອາທິດໜ້ານີ້.
