ຣັດເຊຍກ່າວວ່າ ຕົນໄດ້ໄກ່ເກ່ຍ ໃຫ້ມີການຕໍ່ອາຍຸ ການຢຸດຍິງອອກໄປອີກ 72 ຊົ່ວໂມງ ໃນເຂດທ້ອງຖິ່ນທີ່ເມືອງ Aleppo ຊຶ່ງໄດ້ຮັບຄວາມເສຍຫາຍຮ້າຍແຮງ ບ່ອນທີ່ຫວ່າງມໍ່ໆ ມານີ້ມີການສູ້ລົບກັນລະຫວ່າງອຳນາດການປົກຄອງຊີເຣຍແລະພວກຕໍ່ຕ້ານລັດຖະບານ ທີ່ເຮັດໃຫ້ເກືອບ 300 ຄົນເສຍຊີວິດ.
ອົງການຂ່າວ Interfax ຂອງຣັດເຊຍ ກ່າວວ່າ ການຢຸດຍິງຂັ້ນຕົ້ນເປັນເວລາສອງມື້ ທີ່ໄດ້ ໝົດອາຍຸລົງໃນຕອນເຊົ້າວັນເສົາມື້ນີ້ ຕາມເວລາທ້ອງຖິ່ນໃນຊີເຣຍ ໄດ້ຖືກຕໍ່ອອກໄປອີກ ໂດຍການສະເໜີຂອງຣັດເຊຍ.”
ອົງການຂ່າວຂອງຣັດເຊຍ ກ່າວວ່າ ກະຊວງປ້ອງກັນປະເທດຣັດເຊຍ ຍັງໄດ້ປະກາດວ່າ ການຢຸດຍິງສຳລັບແຂວງ Latakia ໃນພາກເໜືອຂອງຊີເຣຍນັ້ນ ກໍໄດ້ຖືກຕໍ່ອອກໄປອີກ 72 ຊົ່ວໂມງ.
ສະຫະລັດ ແລະ ຣັດເຊຍ ໄດ້ປະກາດກ່ຽວກັບການຢຸດຍິງໃນເຂດທ້ອງຖິ່ນ ທີ່ແຂວງ Latakia ແລະເຂດ Ghouta ຕາເວັນອອກ ຊຶ່ງເປັນຊານເມືອງ ຂອງ ນະຄອນຫຼວງ Damascus ໃນອາທິດແລ້ວນີ້ ໃນຄວາມພະຍາຍາມເພື່ອສືບຕໍ່ ໃຫ້ມີການຍຸຕິຄວາມ ເປັນປໍລະປັກໃນທົ່ວປະເທດ ທີ່ໄດ້ປະກາດໃນເດືອນກຸມພາບໍ່ໃຫ້ພັງທະລາຍລົງທັງໝົດ.
ຄວາມຮຸນແຮງທີ່ເພີ້ມທະວີຂຶ້ນໃນເມືອງ Aleppo ແລະຂົງເຂດອຶ່ນໆໄດ້ຂົ່ມຂູ່ທີ່ຈະເຮັດ ໃຫ້ການເຈລະຈາທາງດ້ານການເມືອງ ລະຫວ່າງອຳນາດການປົກຄອງຊີເຣຍ ແລະພວກ ຕໍ່ຕ້ານ ແຕກຫັກລົງ ພ້ອມທັງຄວາມພະຍາຍາມຂອງນາໆຊາດ ເພື່ອຕໍ່ສູ້ກັບກຸ່ມລັດ ອິສລາມ.
ໂຄສົກກະຊວງຕ່າງປະເທດສະຫລັດ ທ່ານ John Kirby ກ່າວວ່າ ສະຫະລັດຍິນດີນຳ ການຕໍ່ອາຍຸ ການຢຸດຍິງທີ່ເມືອງ Aleppo ທີ່ໄດ້ເປັນຜົນເຮັດໃຫ້ຄວາມຮຸນແຮງໂດຍລວມ ຫລຸດຜ່ອນລົງ. ແຕ່ທ່ານກໍກ່າວວ່າ ສະຫະລັດຍັງສືບຕໍ່ຊອກຫາຊ່ອງທາງເພື່ອໃຫ້ມີຜົນໃນ ຂອບເຂດທີ່ກວ້າງຂວາງກວ່ານີ້.
