ເບິ່ງວີດີໂອ ພາສາອັງກິດ:
ປະຊາຊົນຫລາຍລ້ານຄົນໃນທົ່ວໂລກ ພາກັນອອກມາເບິ່ງໃນປີ 2004 ເວລາດາວພະສຸກ
ໂຄຈອນຜ່ານກາຍໜ້າດວງຕາເວັນ ທີ່ຫຼຽວເຫັນໄດ້ຈາກໂລກເຮົາ ເປັນເທື່ອທໍາອິດນັບຕັ້ງ
ແຕ່ປີ 1882 ເປັນຕົ້ນມາ.
ການໂຄຈອນຜ່ານກາຍໜ້າພະອາທິດ ຂອງດາວພະສຸກ ຫລືວີນັສ ແມ່ນໄດ້ເກີດຂຶ້ນຫົກ
ຄັ້ງເທົ່ານັ້ນ ນັບຕັ້ງແຕ່ໄດ້ມີການສັງເກດເຫັນປາກົດການດັ່ງກ່າວເທື່ອທໍາອິດ ດ້ວຍກ້ອງ
ໂທລະທັດ ຫຼືກ້ອງເບິ່ງດາວ ໃນປີ 1639 ແລະເທື່ອດຽວເທົ່ານັ້ນ ນັບຕັ້ງແຕ່ມີການປະດິດ
ໂທລະພາບຂຶ້ນມາ.
ຕາມທີ່ເຫັນຈາກວີດີໂອຂອງ
ປາກົດການເມື່ອປີ 2004 ນັ້ນ
ດາວພະສຸກຈະປະກົດໃຫ້ເຫັນ
ແຕ່ເງົາ ເປັນຈຸດດໍານ້ອຍໆຢູ່
ຜິວໜ້າດວງຕາເວັນ.
ມັນເປັນປາກົດການທີ່ບໍ່ທໍາມະດາ
ແຕ່ກໍບໍ່ເຖິງວ່າເປັນປາກົດການທີ່
ໜ້າເບິ່ງໜ້າຊົມ.
ທ່ານ David DeVorkin ຜູ້ກໍາ
ກັບດູແລ ພະແນກປະວັດສາດ
ດ້ານດາລາສາດຂອງຫໍພິພິທະ
ພັນອາກາດແລະອະວະກາດແຫ່ງຊາດ Smithsonian ທີ່ວໍຊິງຕັນດີຊີ ອະທິບາຍວ່າ:
“ສິ່ງທີ່ເກີດຂຶ້ນແທ້ໆນັ້ນ ສໍາລັບຄົນທໍາມະດາສາມັນທີ່ບໍ່ຮູ້ວ່າມັນເກີດຂຶ້ນນັ້ນ ກໍແມ່ນບໍ່ມີ
ຄວາມໝາຍຫຍັງ. ຄືມັນຈະບໍ່ມີການປ່ຽນແປງໃດໆໃນຄວາມແຈ້ງສະຫວ່າງຂອງທ້ອງຟ້າ
ແລະພວກນົກກໍຈະບໍ່ຟ້າວບິນກັບຄືນມານອນຮັງ ຫຼືວ່າເກີດສິ່ງໃດສິ່ງນຶ່ງໃນທໍານອງນັ້ນ.
ແຕ່ຖ້າທ່ານຮູ້ວ່າ ມັນກໍາລັງເກີດຂຶ້ນ ມັນກໍເປັນເລຶ່ອງທີ່ໜ້າສົນໃຈແທ້ໆ.”
ມັນເປັນເລື່ອງທີ່ໜ້າສົນໃຈ ສ່ວນນຶ່ງນັ້ນ ກໍຍ້ອນວ່າມັນຫາເບິ່ງໄດ້ຍາກຫຼາຍເພາະວ່າ ດົນດົນ
ມັນຈຶ່ງເກີດຂຶ້ນເທື່ອນຶ່ງ. ປາກົດການດາວພະສຸກໂຄຈອນຜ່ານກາຍໜ້າພະອາທິດນັ້ນ ຈະເກີດ
ຂຶ້ນເປັນຄູ່ ຄືຈະເກີດຂື້ນສອງເທື່ອໃນເວລາໃກ້ໆກັນ ຫາກແຕ່ວ່າປາກົດການແຕ່ລະຄູ່ນັ້ນ ຈະ
ຫ່າງກັນ ຫຼາຍກວ່ານຶ່ງສັດຕະວັດ ຫຼືນຶ່ງຮ້ອຍປີ. ການໂຄຈອນຜ່ານກາຍໜ້າພະອາທິດຂອງ
ດາວພະສຸກ ທີ່ກໍາລັງຈະເກີດຂຶ້ນໃນມື້ອື່ນມື້ຮືນີ້ ເປັນຄູ່ຂອງປາກົດການທີ່ເກີດຂຶ້ນໃນປີ 2004
ທີ່ໄດ້ສ້າງຄວາມຕື່ນເຕ້ນໃຫ້ແກ່ປະຊາຊົນໃນທົ່ວໂລກ ໂຮມທັງທ່ານ DeVorkin ທີ່ອະທິບາຍວ່າ:
“ຖ້າຫາກພວກເຮົາເບິ່ງຕາເວັນຢ່າງປອດໄພແລ້ວ ເຮົາຈະເຫັນຈຸດນຶ່ງຢູ່ຂອບດວງຕາເວັນ
ຊຶ່ງມີຂະໜາດປະມານ ນຶ່ງ ສ່ວນ 30 ຂອງຈານດວງຕາເວັນ ແລະໃນໄລຍະເວລາຜ່ານໄປ
ສອງ-ສາມຊົ່ວໂມງ ມັນກໍຈະຄ່ອຍໆເຄື່ອນຜ່ານໜ້າດວງຕາເວັນ ໄປເລື້ອຍໆ ຈົນຜ່ານ
ເລີຍອອກໄປ.”
ທ່ານ Devorkin ໃຫ້ຂໍ້ສັງເກດອີກວ່າ ຫຼັກສໍາຄັນກໍຄືໃຫ້ເບິ່ງຢ່າງປອດໄພ ຄືບໍ່ຄວນຈ້ອງຕາ
ເບິ່ງຕາເວັນໂດຍກົງ ແຕ່ໃຫ້ໃຊ້ແວ່ນຕາກັນແດດ ແລະກ້ອງໂທລະທັດ ທີ່ມີແຜ່ນກອງແສງ
ບໍ່ໃຫ້ເຫຼື້ອມຕາ.
ໃນຂະນະທີ່ປະຊາຊົນບາງຄົນໃນສັດຕະວັດນີ້ພາກັນຕື່ນເຕ້ນກັບປາກົດການດັ່ງກ່າວ ບັນດາ
ນັກວິທະຍາສາດໃນຫຼາຍສັດຕະວັດຜ່ານມາ ໄດ້ໃຊ້ປາກົດການນີ້ ເປັນຄໍາຕອບຕໍ່ຄໍາຖາມ
ຕ່າງໆກ່ຽວກັບລະບົບສຸລິຍະຈັກກະວານ. ທ່ານ Devorkin ກ່າວວ່າ
“ບັນດານັກດາລາສາດທັງຫຼາຍ ໄດ້ຮຽນຮູ້ໃນສັດຕະວັດທີ່ 17 ວ່າ ຖ້າເຮົາສາມາດ
ກໍາໜົດເວລາ ການໂຄຈອນຜ່ານກາຍໜ້າພະອາທິດຂອງດາວພະສຸກນີ້ ໄດ້ຢ່າງທ່ຽງ
ກົງ ແລະສາມາດຈັບເວລາໄດ້ຢ່າງຖືກຕ້ອງທີ່ສຸດເທົ່າຈະເຮັດໄດ້ຈາກສອງເຂດ ທີ່ຢູ່ໄກ
ກັນຄົນລະຟາກໂລກນັ້ນ ເຮົາກໍອາດສາມາດໃຊ້ກໍາໜົດເວລາທີ່ແຕກຕ່າງກັນສອງອັນ
ນັ້ນ ມາຄໍານວນຈາກສາມດ້ານເພື່ອໃຫ້ຮູ້ວ່າ ພວກເຮົາຢູ່ຫ່າງໄກສໍ່າໃດຈາກດວງຕາ
ເວັນ ແລະນັ້ນຄືຄໍາຖາມພື້ນຖານຂໍ້ນຶ່ງ.”
ບັນດານັກວິທະຍາສາດ ນັກດາລາສາດ ແລະນັກຜະຈົນໄພ ໂຮມທັງກັບຕັນ James Cook
ນັກສໍາຫຼວດຊາວອັງກິດທີ່ມີຊື່ສຽງ ໄດ້ເລິ່ມການເດີນທາງເພື່ອສໍາຫຼວດ ແລະເກັບກໍາຂໍ້ມູນ
ຕ່າງໆກ່ຽວກັບການໂຄຈອນຜ່ານກາຍໜ້າພະອາທິດ ເປັນຄູ່ກັນຂອງດາວພະສຸກນີ້ ໃນຊຸມ
ປີ 1760.
ຫລັງຈາກປາກົດການໃນປີນີ້ແລ້ວ ເທື່ອໜ້າທີ່ດາວພະສຸກຈະວຽນມາ ໂຄຈອນຜ່ານກາຍໜ້າ
ພະອາທິດອີກ ກໍແມ່ນໃນປີ 2117 ພຸ້ນ.
ໝາຍເຫດຈາກບັນນາທິການ: ປາກົດການນີ້ຈະເກີດຂຶ້ນໃນວັນອັງຄານ ຢູ່ສະຫະລັດ ເວລາ
2209 ຕາມເວລາສາກົນ ຫລື 6:09 ໂມງແລງ ໄປຫາຕາເວັນຕົກດິນ. ສ່ວນຢູ່ແຖວເອເຊຍ
ຕາເວັນອອກສຽງໃຕ້ ຫລືປະເທດລາວ ຈະແມ່ນຕັ້ງແຕ່ຕາເວັນຂຶ້ນ ຫລືປະມານ 5:09 ຕອນ
ເຊົ້າຂອງວັນທີ 6 ມີຖຸນາ ໄປຈົນໝົດເວລາ ຄື ປະມານ 6 ຊົ່ວໂມງເຄິ່ງ ຕາມແຜ່ນທີ່ຂ້າງລຸ່ມນີ້.
ສະນັ້ນ ທ່ານຍັງມີເວລາໄດ້ເບິ່ງຢູ່ ແຕ່ຢາລືມໃຊ້ແວ່ນຕາທີ່ມີສິ່ງກັນແສງແດດກ້າ ເພື່ອຄວາມ
ປອດໄພ..
ເບິ່ງລາຍງານວີດີໂອອີກເລື້ອງນຶ່ງ ກ່ຽວກັບການໂຄຈອນມາຜ່ານໜ້າພະອາທິດ
ຂອງດາວພະສຸກ: