ຄະນະກະຊວງແຜນການ ແລະການລົງທຶນຂອງລາວລາຍງານ ໃນໂອກາດການເດີນ
ທາງຢ້ຽມຢາມປະເທດລາວ ຢ່າງເປັນທາງການຂອງທ່ານ ເຈື່ອງເຕິ້ນຊາງ ປະທານປະ
ເທດຫວຽດນາມ ໃນລະຫວ່າງວັນທີ 9-11 ກຸມພາທີ່ຜ່ານມານີ້ວ່າ ນັບແຕ່ປີ 1993
ເປັນຕົ້ນມາ ເຖິງປັດຈຸບັນນີ້ ມີບັນດາບໍລິສັດຈາກຫວຽດນາມໄດ້ພາກັນເຂົ້າມາລົງທຶນ
ຢູ່ໃນລາວແລ້ວຈໍານວນທັງໝົດ 432 ໂຄງການ ຊຶ່ງຄິດເປັນມູນຄ່າການລົງທຶນສະສົມ
ລວມກັນຫຼາຍກວ່າ 5,100 ລ້ານໂດລາ.
ການລົງທຶນຂອງບັນດາບໍລິສັດຈາກຫວຽດນາມ ໃນລາວດັ່ງກ່າວນີ້ ໄດ້ເນັ້ນໜັກທັງ
ໃນດ້ານຂຸດຄົ້ນບໍ່ແຮ່ ພະລັງງານໄຟຟ້າ ດ້ານການບໍລິການ ແລະດ້ານກະສິກໍາ-ປ່າໄມ້.
ໂດຍສະເພາະໃນດ້ານພະລັງງານໄຟຟ້າ ກໍປາກົດວ່າມີບໍລິສັດຈາກຫວຽດນາມ 7 ບໍລິ
ສັດ ທີ່ໄດ້ລົງທຶນກໍ່ສ້າງເຂື່ອນຜະລິດກະແສໄຟຟ້າຈໍານວນ 15 ໂຄງການຢູ່ໃນລາວ
ໂດຍມີເປົ້າໝາຍທີ່ຈະສົ່ງກະແສໄຟຟ້າ ທີ່ຜະລິດໄດ້ສ່ວນໃຫຍ່ໄປປະເທດຫວຽດນາມ
ບໍ່ໜ້ອຍກວ່າ 3,357 MW ນັບຈາກທ້າຍປີ 2015 ເປັນຕົ້ນໄປ.
ການລົງທຶນຂອງຫວຽດນາມ
ໃນໂຄງການກໍ່ສ້າງເຂື່ອນຜະ
ລິດກະແສໄຟຟ້າໃນລາວດັ່ງ
ກ່າວນີ້ ຖືເປັນສ່ວນນຶ່ງຂອງ
ການລົງທຶນຂອງຫວຽດນາມ
ທີ່ເພີ້ມຂຶ້ນນັບມື້ ຊຶ່ງກໍປາກົດວ່າ
ຫວຽດນາມມີມູນຄ່າລົງທຶນ
ສະສົມໃນລາວແຊງໜ້າປະເທດ
ໄທຂຶ້ນມາເປັນອັນດັບ 2 ຫຼືເປັນ
ຮອງພຽງແຕ່ຈີນເທົ່ານັ້ນ ໃນປັດ
ຈຸບັນນີ້.
ສໍາລັບເຂດທີ່ພາກທຸລະກິດຂອງຫວຽດນາມໄດ້ລົງທຶນຫຼາຍທີ່ສຸດໃນລາວນັ້ນ ກໍຄືເຂດ
ນະຄອນຫຼວງວຽງຈັນ ທີ່ມີມູນຄ່າການລົງທຶນເຖິງ 1,888 ລ້ານໂດລາ ຫຼືຄິດເປັນ 52%
ຂອງມູນຄ່າການລົງທຶນທັງໝົດຂອງຫວຽດນາມໃນລາວ. ສ່ວນເຂດແຂວງຊາຍແດນ ທີ່ພາກທຸລະກິດຂອງຫວຽດນາມ ໄດ້ເຂົ້າມາລົງທຶນຫຼາຍທີ່ສຸດກໍຄືແຂວງເຊກອງ, ຕິດ
ຕາມດ້ວຍແຂວງຈໍາປາສັກ ແລະ ອັດຕະປືຕາມລໍາດັບ. ແຕ່ເຂດທີ່ບໍ່ມີການລົງທຶນຂອງ
ຫວຽດນາມເລີຍນັ້ນກໍມີພຽງແຕ່ແຂວງບໍ່ແກ້ວເທົ່ານັ້ນ. ແຕ່ກໍ່ເຊື່ອໝັ້ນວ່າ ພາກທຸລະກິດ
ຂອງຫວຽດນາມຈະພາກັນຂະຫຍາຍການລົງທຶນໄປໃນທຸກໆເຂດແຂວງທົ່ວປະເທດລາວ
ໃນໄລຍະໝໍ່ໆນີ້.
ທັງນີ້ກໍ່ເນື່ອງຈາກວ່າ ທັງສອງປະເທດໄດ້ເປີດກວ້າງການຮ່ວມມືທາງເສດຖະກິດລະຫວ່າງ
ກັນ ນັບຈາກປີ 1993 ແລະໄດ້ມີການຕົກລົງໃນສັນຍາວ່າດ້ວຍການສົ່ງເສີມແລະປົກປ້ອງ
ການລົງທຶນລະຫວ່າງກັນ ນັບຕັ້ງແຕ່ປີ 1996 ເປັນຕົ້ນມາແລ້ວ. ໃນປະຈຸບັນທາງການທັງ
ສອງຝ່າຍກໍກໍາລັງຮ່ວມກັນ ພິຈາລະນາປັບປຸງສັນຍາວ່າ ດ້ວຍການສົ່ງເສີມ ແລະປົກປ້ອງ
ການລົງທຶນດັ່ງກ່າວ ໃຫ້ມີຄວາມທັນສະໄໝອີກດ້ວຍ ດັ່ງທີ່ທ່ານ ສົມດີ ໄດ້ຖະແຫຼງຊີ້ແຈງ
ໃນຕອນນຶ່ງວ່າ:
“ເພື່ອຕອບສະໜອງການສົ່ງເສີມການລົງທຶນໃນ
ສະພາບແວດລ້ອມເສດຖະກິດ-ສັງຄົມອັນໃໝ່ນີ້
ສອງປະເທດພວກເຮົາກໍາລັງດໍາເນີນການທົບທວນ
ສັນຍາສະບັບດັ່ງກ່າວຮ່ວມກັນ ແລະຄາດວ່າຈະໃຫ້
ສໍາເລັດໃນທ້າຍປີນີ້ ພ້ອມດຽວກັນນັ້ນສອງຝ່າຍ
ໄດ້ເອົາໃຈໃສ່ກໍານົດທິດລະອຽດ ແລະສ້າງເງື່ອນໄຂ
ອໍານວຍຄວາມສະດວກໃຫ້ແກ່ບັນດາຫົວໜ່ວຍ
ທຸລະກິດຂອງທຸກພາກສ່ວນເສດຖະກິດຂອງແຕ່
ລະຝ່າຍ ໃຫ້ເຂົ້າໄປລົງທຶນຂອງກັນ ແລະກັນ.”
ພາຍໃຕ້ສັນຍາວ່າດ້ວຍການສົ່ງເສີມ ແລະປົກປ້ອງການລົງທຶນດັ່ງກ່າວນີ້ ທັງສອງຝ່າຍກໍຈະ
ສົ່ງເສີມໃຫ້ມີການພົວພັນທາງເສດຖະກິດຫຼາຍຮູບແບບ ແລະມີການອໍານວຍຄວາມສະດວກ
ໃຫ້ກັບພາກທຸລະກິດການຄ້າ, ການລົງທຶນ ແລະພັດທະນາການເຊື່ອມຕໍ່ທາງດ້ານການຄົມ
ມະນາຄົມ-ຂົນສົ່ງລະຫວ່າງກັນຢ່າງຄົບຊຸດ ແລະຢ່າງທົ່ວເຖິງຕະຫຼອດພາກເໜືອຮອດພາກ
ໃຕ້ໃຫ້ໄດ້ ຢ່າງເປັນຮູບປະທໍາ.
ສໍາລັບໃນໂອກາດການເດີນທາງຢ້ຽມຢາມປະເທດລາວ ຢ່າງເປັນທາງການຂອງປະທານປະ
ເທດຫວຽດນາມ ໃນຄັ້ງ່າຫລ້າສຸດນີ້ ທາງການຂອງສອງຝ່າຍກໍໄດ້ລົງນາມໃນອານຸສັນຍາ
ວ່າດ້ວຍການສ້າງບຸກຄະລາກອນລາວ ຢູ່ຫວຽດນາມ ແຜນການຮ່ວມມືປະຈໍາປີ 2012 ສັນ
ຍາກູ້ຢືມເງິນຈາກທະນາຄານຮຸ້ນສ່ວນ ອຸດສາຫະກໍາ ແລະການຄ້າຂອງຫວຽດນາມ ສັນຍາ
ຂຸດຄົ້ນແລະປຸງແຕ່ງ ເກືອກາລີ ຢູ່ທີ່ແຂວງຄໍາມ່ວນ ແລະການກໍ່ສ້າງສະໜາມບິນ ຢູ່ແຂວງ
ອັດຕະປີ.