ລັດຖະມົນຕີການຕ່າງປະເທດ ສະຫະລັດ ທ່ານ ໄມຄ໌ ພອມພຽວ ໄດ້ກ່າວວ່າ ທ່ານມີແຜນທີ່ຈະປຶກສາຫາລື ກ່ຽວກັບບັນຫາສິດທິມະນຸດ ກັບບັນດາຜູ້ນຳ ຊາອຸດີ ອາຣາເບຍ ໃນລະຫວ່າງການຢ້ຽມຢາມປະເທດດັ່ງກ່າວ, ໂດຍສະເພາະ ກ່ຽວກັບ ສະພາບຂອງແພດໝໍ ອາເມຣີກັນ ເຊື້ອສາຍ ຊາອຸ ຜູ້ກຳລັງປະເຊີນກັບຂໍ້ກ່າວຫາຕ່າງໆຢູ່ທີ່ນັ້ນ.
ທ່ານ ພອມພຽວ ໄດ້ເດີນທາງຮອດ ຊາອຸດີ ອາຣາເບຍ ໃນວັນພຸດວານນີ້ສຳລັບການຢ້ຽມຢາມສາມວັນ, ເມື່ອທ່ານຈະພົບປະກັບກະສັດ ຊາລມານ, ແລະ ອົງມົງກຸດ ໂມຮຳມັດ ບິນ ຊາລມານ ແລະ ລັດຖະມົນຕີການຕ່າງປະເທດ ທ່ານ ໄຟຊາລ ບິນ ເຟີຮານ, ອີງຕາມການກ່າວຂອງກະຊວງການຕ່າງປະເທດ.
ທ່ານ ພອມພຽວ ໄດ້ກ່າວວ່າ ທ່ານຈະລົມກັບບັນດາຜູ້ນຳ ຊາອຸ ກ່ຽວກັບ ແພດ ອາເມຣິກັນ ເຊື້ອສາຍ ຊາອຸ ທ່ານ ວາລິດ ຟີໄຕຮີ, ຜູ້ທີ່ຖືກຄວບຄຸມຕົວ ໃນເດືອນພະຈິກ 2017 ທ່າມກາງການປາບປາມຕໍ່ຕ້ານການສໍ້ລາດບັງຫຼວງທີ່ບໍ່ເຄີຍມີມາກ່ອນຂອງເຈົ້າຊາຍ ຊາອຸ ທີ່ໄດ້ຈັບບັນດາລັດຖະມົນຕີ, ເຈົ້າຊາຍອາວຸໂສ ແລະ ນັກທຸລະກິດ.
ທ່ານ ພອມພຽວ ໄດ້ກ່າວຕໍ່ບັນດານັກຂ່າວໃນນະຄອນຫຼວງ ອາດິສ ອາບາບາ ກ່ອນເດີນທາງໄປ ຊາອຸດີ ອາຣາເບຍ ວ່າ “ຂ້າພະເຈົ້າແນ່ໃຈວ່າ ຂ້າພະເຈົ້າຈະຍົກເອົາບັນຫານັ້ນ ແລະ ບັນຫາກ່ຽວກັບ ສິດທິມະນຸດຢ່າງກວ້າງຂວາງຂຶ້ນມາ ໂອ້ລົມເຊັ່ນກັນ.”
ປະມານ 200 ຄົນໄດ້ຖືກຄວບຄຸມຕົວເປັນເວລາຫຼາຍອາທິດ ແລະ ຫຼາຍເດືອນຢູ່ໂຮງແຮມແຫ່ງນຶ່ງໃນນະຄອນຫຼວງ ຣີຢາດ ແລະ ໄດ້ບັງຄັບໃຫ້ສະຫຼະຊັບສິນມູນຄ່າຫຼາຍຕື້ໂດລາ ໃຫ້ລັດຖະບານ ຊາອຸດີ ອາຣາເບຍ.
