ຮັກສາການຊົ່ວຄາວ ເອກອັກຄະລັດຖະທູດສະຫະລັດ ປະຈຳປະເທດຈີນ ທ່ານ David Rank ໄດ້ລາອອກຢ່າງກະທັນຫັນ ໂດຍກ່າວຕໍ່ເພື່ອນຮ່ວມງານຂອງທ່ານວ່າ ທ່ານຈະລາອອກ ຈາກກະຊວງຕ່າງປະເທດ ຍ້ອນບໍ່ເຫັນພ້ອມກັບການຕັດສິນໃຈຂອງປະທານາທິບໍດີ ດໍໂນລ ທຣຳ ທີ່ໄດ້ຖອນສະຫະລັດ ອອກຈາກຂໍ້ຕົກລົງປາຣີ ໃນສັບປະດາແລ້ວ.
ເຈົ້າໜ້າທີ່ສະຫະລັດ ທີ່ຮູ້ເລື່ອງໃນການລາອອກຈາກຕຳແໜ່ງຂອງທ່ານ Rank ໄດ້ກ່າວວ່າ ທ່ານໄດ້ປະກາດອອກບຳນານ ໃນວັນຈັນວານນີ້ ໃນປະຊຸມຕອບຄຳຖາມຂອງໝູ່ພະນັກງານ ສະຖານທູດ.
ກະຊວງການຕ່າງປະເທດໄດ້ໃຫ້ການຢືນຢັນ ກ່ຽວກັບການປະກາດທີ່ວ່ານີ້ ໂດຍກ່າວວ່າ “ມັນເປັນການຕັດສິນໃຈຂອງສ່ວນບຸກຄົນ” ແຕ່ບໍ່ໄດ້ໃຫ້ລາຍລະອຽດຫຍັງເພີ່ມຕື່ມ ກ່ຽວກັບການອອກຈາກຕຳແໜ່ງດັ່ງກ່າວນີ້.
ທ່ານ Rank ໄດ້ຮັບຕຳແໜ່ງເປັນຮອງຫົວໜ້າ ທີ່ສະຖານທູດ ນັບຕັ້ງແຕ່ເດືອນມັງກອນ ປີ 2016 ເປັນຕົ້ນມາ ແລະໄດ້ຮັບໜ້າທີ່ ເປັນຮັກສາການເອກອັກຄະລັດຖະທູດ ຈົນກວ່າຜູ້ທີ່ທ່ານທຣຳແຕ່ງຕັ້ງໃຫ້ເອກອັກຄະລັດຖະທູດ ຊຶ່ງແມ່ນອະດີດຜູ້ປົກຄອງລັດ ໄອໂອວາ ທ່ານ Terry Branstad ຈະໄປຮັບໜ້າທີ່ຢ່າງເປັນທາງການໃນທ້າຍເດືອນນີ້. ທ່ານ Branstad ແມ່ນໄດ້ຮັບການຢືນຢັນໃຫ້ເຂົ້າຮັບຕຳແໜ່ງດັ່ງກ່າວ ໃນເດືອນແລ້ວນີ້.
ທ່ານ Rank ໄດ້ເຮັດວຽກໃຫ້ກະຊວງການຕ່າງ
ປະເທດ ມາໄດ້ 27 ປີ ແລ້ວ ແລະເປັນທັງທີ່
ປຶກສາທາງການເມືອງ ທີ່ສະຖານເອກອັກຄະ
ລັດຖະທູດສະຫະລັດ ປະຈຳອັຟການິສຖານ
ແຕ່ປີ 2011ຫາ 2012.
ທ່ານ Rank ໄດ້ກາຍມາເປັນເອກອັກຄະລັດ
ຖະທູດຄົນທີ 2 ທີ່ໄດ້ປະກາດຕໍ່ສາທາລະນະ
ໃນການແຕກແຍກກັບທ່ານທຣຳໃນໄລຍະ
ສອງສາມມື້ທີ່ຜ່ານມານີ້. ທ່ານ Lewis
Lukens ຮັກສາການເອກອັກຄະລັດຖະທູດ
ສະຫະລັດປະຈຳອັງກິດກໍໄດ້ກ່າວຍ້ອງຍໍ
ເຈົ້າຄອງນະຄອນລອນດອນ ທ່ານ Sadiq
Khan ຢ່າງເປັນການເປີດເຜີຍ ໃນການເອົາ
ບາດກ້າວຂອງທ່ານ ຕໍ່ການໂຈມຕີກໍ່ການ
ຮ້າຍ ໃນວັນທ້າຍສັບປະດາຜ່ານມານີ້ ຫຼັງຈາກທີ່ທ່ານທຣຳ ໄດ້ຂຽນຕຳນິຕິຕຽນທ່ານລົງ twitter ນັ້ນ.
“ຂ້າພະເຈົ້າຂໍສັນລະເສີນການນຳພາທີ່ເຂັ້ມແຂງຂອງເຈົ້າຄອງນະຄອນລອນດອນ ທີ່ໄດ້ນຳ ພາເມືອງດັ່ງກ່າວໄປໜ້າ ຫຼັງຈາກການໂຈມຕີ,” ນັ້ນຄືຄຳເວົ້າຂອງທ່ານ Lukens ໄດ້ກ່າວໄວ້.
ໃນເຊົ້າວັນອາທິດຜ່ານມານີ້ ທ່ານທຣຳ ໄດ້ຕຳນິຕິຕຽນ ການເປັນຜູ້ນຳຂອງເຈົ້າຄອງນະ ຄອນລອນດອນ ທ່ານ Khan ຫລັງຈາກການໂຈມຕີໃນວັນເສົາຜ່ານມານີ້ທີ່ໄດ້ສັງຫານ ຢ່າງນ້ອຍ 7 ຄົນ ແລະບາດເຈັບສິບກວ່າຄົນ.
